1 John 4

Thawaisingbu chang yengu

4 Achanbasa, thawai khudingbu thajaganu, adubu thawaising adu Ishordagira chang yengu; maramdi ayamba Ishorgi wa takthoksinnabasing taibangpan-gi manungda chathokkhre. 2 Asina Ishorgi thawai adubu nakhoina khangi: Jesus Christana hakchang oina lakle haiba yaba thawai khuding Ishordagini; 3 Aduga Jesusbu yadaba thawai khuding Ishordagi natte. Amasung asi antiChristagi thawaini, mahak lak-i haiba magi maramda nakhoina tare, aduga houjikmak mahak taibangpanda leiri. 

4 Nakhoidi Ishorgini, nungsiba angangsa, aduga nakhoina makhoibu ngamle; maramdi nakhoida leiriba Ibungo mahak aduna taibangpanda leiriba mahak adudagi henna chaoi. 5 Mahkoina taibangpanbagini, maram aduna makhoina taibangpanbagi ngangi, aduga taibangpanbana makhoigi wa tai. 6 Eikhoidi Ishorgini, Ishorbu khangba mahak aduna eikhoigi wa tai; Ishorgi nattaba mahak aduna eikhoigi wa tade. Asidagi eikhoina achumbagi thawaibu amasung aranbagi thawaibu khangi.

Ishorgi nungsiba amasung mioibagi nungsiba

7 Achanbasa, eikhoina amaga amaga nungsinasi; maramdi nungsiba Ishordagini, aduga nungsiba mi khuding Ishordagi pokpani, amasung Ishorbu khangi. 

8 Nungsidaba mahak aduna Ishorbu khangde; maramdi Ishordi nungsibani. 

9 Asina Ishorgi nungsiba adu eikhoigi maramda phongdokpire, haibadi, Ishorna macha nipa amata ngaiba adubu, eikhoina Ibungo adugi mapanna hingnanaba, taibangpanda thabirakle. 10 Asida nungsiba lei, haibadi, eikhoina Ishorbu nungsire haiba natte, adubu Ishorna eikhoibu nungsibiraduna Ibungo mahakki macha nipa adubu eikhoigi papkidamak senggatpinaba oina thabire. 

11 Achanbasa, Ishorna eikhoibu asup nungsibirabadi, eikhoinasu amaga amaga nungsinapham thok-i. 

12 Ishorbu kana amatana khak ude; eikhoina amaga amaga nungsinarabadi, Ishorna eikhoida itattattana lei; aduga Ibungo mahakpu nungsiba adu eikhoida mapung phaba oihalle. 

13 Asina eikhoina Ibungo mangonda amasung Ibungo mahakna eikhoida itattattana lei haiba eikhoina khangi, maramdi Ibungo mahakna eikhoida Ibungo mahakki thawaidagi pibire. 14 Amasung mapana macha nipa adubu taibangpanbagi kanbiba mapu oina thabire haiba eikhoina ure, amasung sakhi piri. 15 Jesus Christabu Ishorgi macha nipani haina kanagumbana haidokcharabadi, Ishorna mangonda amasung mahakna Ishorda itattattana lei. 16 Aduga eikhoigi maramda Ishorgi nungsiba leiba adu eikhoina khangi, amasung thajare. Ishordi nungsibani, amasung nungsibada itattattana leiriba mahak aduna Ishorda itattattana lei, aduga Ishorna mangonda itattattana lei. 17 Asida eikhoigi nungsiba adu mapung phahanbire, maduna Ishorna wayelggadaba numit aduda eikhoina thouna phana leinabani, maramdi Ibungona oiribagumna eikhoinasu taibangpanda oiribani. 18 Nungsibada akiba leite, adubu mapung phaba nungsibana akiba tanthokki, maramdi akibadi cheirakka loinei, Akiba mahak adu nungsibada mapung phaba natte. 

19 Eikhoina nungsi, maramdi Ibungo mahakna eikhoibu hanna nungsibire. 20 Kanagumba mina, eina Ishorbu nungsi, hairaga machin manaobu tukkacharabadi, mahakti chinthiba mini; maramdi mahakna uraba machin manaobu nungsidaba mahak aduna udriba Ishorbu nungsiba ngamde. 21 Amasung Ishorbu nungsiba mahak aduna machin manaobusu nungsigadabani haiba yathang asi eikhoina Ibungodagi phangi.