Matthew 23
Jesusna shaastragi ojaashinggi amasung pharisi-shinggi phattaba puthokpa
( Mark 12.38-40; Luke 11.37-52; 20.45-47 )
1 Matam aduda Jesusna miyaam-shing amasung mahaakki sebokshingda haayrak-e,
2 Shaastragi ojaashing amasung pharisi shingna Mosesgi phamphamda phammi;
3 Maram aduna makhoyna karigumba haayba pumnamak adu nakhoyna tou amasung ngaak-u, touegumsung makhoygi thabakki mattung ennaa touganu, maramdi makhoyna haay, aduga toude.
4 Hoy, makhoyna arumba potlum pullaga, mishinggi marengbaanda haapi, adubu makhoy mashaanadi khudonbinasu lenghanningde.
5 Touegumsung makhoyna makhoygi thabak pumnamak mishingna unanaba touwi; maramdi makhoygi jantra adu paakhalli aduga phina cholhalli;
6 Aduga makhoyna chaakkhaangbada amasung loysang loysangda makok phamba,
7 Miyaam tinnabada mishinggi khurumba, amasung mishingna Rabbi kouba paammi.
8 Touegumsung nakhoybudi Rabbi kouhan-ganu; maramdi nakhoygi ojaadi amatani, aduga nakhoy pumnamak nachin nanaaoni.
9 Amasung prithibi asida kanaadasu epa haayba mingthol asi piduna kouganu; maramdi nakhoygi napaadi swargada leiba ebungngo mahaak mathantani.
10 Nakhoybudi mapu kouhan-ganu, maramdi nakhoygi mapudi Christa mathantani.
11 Touegumsung nakhoygi narakta Khwaaidagi chaaoba mahaak aduna nakhoygi nanaai oigani. 12 Aduga mashaabu chaaohanjaba kanaagumba adubu nolhan-gani, amasung mashaana nollukchaba kanaagumba adubu chaaohanbigani.
13 Touegumsung, Apha shaajaningba shaastragi oja amasung phaarisisa, nakhoyda awaabanida! maramdi nakhoyna swarga leibaak adu mishinggi mamaangda thingjilli; maramdi nakhoy nashaanasu changde, aduga changjage hotnariba makhoy adubusu changhande.
14 (Apha shaajaningba shaastragi oja amasung phaarisisa, nakhoyda awaabanida! maramdi nakhoyna toushinnanaba-gidamak kuina Eeshorda haayja-ringei phaaobadasu lukhraabishinggi yum kei munthok-e. Maram aduna nakhoyna henna chaaoba naraal phanggani.)
15 Apha shaajaningba shaastragi oja amasung phaarisisa, nakhoyda awaabanida! maramdi nakhoyna samudra amasung kangphaanda koychat chattuna kanaagumba amabu machat olhalli, aduga mahaakna ollaklabada nakhoyna mahaakpu nakhoy nashaadagi sharuk ani henna norokki machaa oihalli.
16 Mittaangba lamjingbasa, nakhoyda awaabanida! nakhoyna haay, kanaagumbana Ningnashang panduna waashakpa adudi karisu natte, adubu kanaagumbana Ningnashanggi sanaa adu panduna shakpa adudi mahaak laman tonbani.
17 Apangba amasung mittaangbasa! maramdi sanaaga nattraga sanaabu shengdokliba Ningnashang aduga karambana henna chaaobage?
18 Amasung kanaagumbana laatnapung panduna waashakpa adudi karisu natte; adubu kanaagumbana madugi mathakta katliba pot adu panduna shakpa adudi mahaak laman tonbani. 19 Mittaangbasa! maramdi katliba pot aduga katliba pot shengdokliba laatnapungga karambana henna chaaobage?
20 Maram aduna laatnapung panduna waashakpa mahaak aduna madubu amasung madugi mathakta leiba pot pumnamak adubu panduna waashaklabani.
21 Aduga Ningnashang panduna waashakpa mahaak aduna madubu amasung madugi manungda leiba ebungngo mahaakpu panduna waashaklabani.
22 Aduga swarga panduna waashakpa mahaak aduna Eeshorgi phambaalbu amasung madugi mathakta phamliba ebungngo mahaakpu panduna waashaklabani.
23 Apha shaajaningba shaastragi oja amasung phaarisisa, nakhoyda awaabanida! maramdi nungshihidaak, hop amasung jiraagi sharuk taraagi amaa katlaga, waayel yaathang adugi henna luba hiram shing, achumba, nungshibiba amasung thaajaba asi thaadoki; touigumbasun pumnamak asi nakhoyna touba taay, aduga ateishing adu thaadoktaba taay,
24 Yuraalbu phijumda chumthoklaga, utpu yotpa mittaangba lamjingbasa!
25 Apha shaajaningba shaastragi oja amasung phaarisisa, nakhoyda awaabanida! maramdi nakhoyna pukham tenggotki mapaanthangba sharuk adu shengdok-e, adubu manungdadi namja namtheknaba amasung masha laakpa ngamdabana pikthalli.
26 Mittaangba pharisi! pukham tenggotki mapaanthangba sharuk adusu shenglaknaba, ahaanbada manung adu shengdok-u.
27 Apha shaajaningba shaastragi oja amasung phaarisisa, nakhoyda awaabanida! maramdi nakhoy mapaanthongda phajanaa uba, touegumsung manungdadi ashibashinggi saruna amasung shengdaba pumnamakna thallaba angouba teiba mongphamgumbani.
28 Adugumduna nakhoysu mapaandadi mishingda dharma chenba oinaa uhalli, touegumsung manungdadi Apha shaajaningba amasung waayel chattabana pikthalli.
29 Apha shaajaningba shaastragi oja amasung phaarisisa, nakhoyda awaabanida! maramdi nakhoyna Eeshorgi waa taakthokpa shinggi mongphamsu shai, dharma chenbashinggi mongphamgi phurasu leitengi, aduga haay,
30 Eikhoyna epa epushinggi matam aduda leiramlabadi, Eeshorgi waa taakthokpa shinggi ee aduda makhoyga loynanaa sharuk yaaramloidabani.
31 Maram aduna nakhoyna Eeshorgi waa taakthokpa shingbu haatpa makhoy adugi machaani haayba nakhoy nashaana saakhi pijei.
32 Adu oirabadi, napaa napushinggi chaang adu nakhoy thalhallu!
33 Lilsa, lindugi chaagoksa, norokki waayel touba adu nakhoyna karamna naanthokkadage?
34 Maram aduna yeng-u, eina nakhoyda Eeshorgi waa taakthokpa shing, ashingba mishing, amasung shaastragi ojaashingbu thaay; makhoy kharabu nakhoyna haatkani amasung crossta sihan-gani; aduga makhoy kharabuna nakhoygi loysang loysangda thina phugani, amasung saahar saaharda haatke haayna taannagani;
35 Maasi nakhoyna Ningnashanggi ashengba mapham amasung laatnapunggi marakta haatkhiba dharma chenba Abelgi eedagi Barachiahgi machaanupa Zachariahgi ee phaaoba prithibida takhiba dharma chenbagi ee pumnamak nakhoygi nathakta taananabani.
36 Eina nakhoyda thaangei shengna haayribani, hiram pumnamak asi miron asigi mathakta taagani.
Jerusalemgi damak Jesusna tengthaabiba
( Luke 13.34-35 )
37 Eeshorgi waa taakthokpa shingbu haatpa amasung maangonda thaakhibashingbu nungna thaba, he Jerusalem, Jerusalem! yenbina maagi mathaada machaashingbu konshinbagumna, eina nanggi nachaashingbu kayaa toyna konshinningkhiba, adubu nakhoyna yaaningkhide.
38 Yeng-u, nakhoygi yum haangna nakhoyda thambirabani.
39 Maramdi eina nakhoyda haayri, Eeshorgi mingda laakpa ebungngo mahaak yaaiphabani,
haaibasi nakhoyna haaydriba phaaoba matam asidagi houna nakhoyna eibu shuk-u ukhrararoi.