2 Chronicles 33
Judahgi ningthou Manasseh
(2 Ning 21.1–9)
1 Manassehna ningthou oiba matamda chahi taraanithoi shurammi. Mahaak Jerusalemda chahi yaangkhei mangaa paallammi.
2 Eeshorna Israelgi mishinggi maangda tukkachanaba thabak touwi haayduna taanthokkhiba Jaatshingdugumna phattaba thabak kayaa Eeshorgi mityengda mahaakna toukhi.
3 Mahaakki mapaa Hezekiahna thugaaykhiba ashengba maphamshing amadi ukhongshing mahaakna amuk shaagatpa houkhi. Mahaakna Baal khurumnaba phaankhong saakhi aduga Asherah koubi laidugi murtinachingba shaarammi. Mahaakki matamda thawaan-michakshingsu khurumlammi.
4 Eeshorbu matam leibada khurumgadoubani taakpikhiba maphamduda mahaakna laimanggi phaankhong shaaduna thamkhi.
5 Ningnashanggi mangol aniduda thawaan-michak khurumnaba phaankhongshing shaarammi.
6 Mahaakna pokchaba machaa phaaoba Hinnomgi tampaakta mei thaaduna thou oinaa katkhi. Mahaakna maaiba maibishingda thaajarammi. Mahaakna Eeshorgi mityengda mapaan naaidana araanba thabak touba maramna Ebungngona mahaakpu yaamna shaaorammi.
7 Mahaakna shaaba laaigi murtishingdu Eeshorgi ningnashangda tham-lammi. Ningnashangsigi matangda Eeshorna Solomon amadi Davidta asumna taakpikhi: Israelgi Jaatshinggi maraktagi eina ningnashang oinaa Jerusalembu khan-khrabani. Maphamsida eigi minglen lengdana leigani. 8 Nakhoygi napaa napushingda eina pinabigani haayna waashakkhraba leibaaksidagi Israelgi khongpham lenghalloi. Masimak oinanaba Eina Mosesda pikhiba puya, lichat lonchatshingdu amatta kaipharoi."
9 Manassehna Judah amadi Israelbu phattaba lambida chingbikhi. Eeshorna Israelgi maangda tumna manghankhiba Jaatshinggumna phattaba thabak toukhi.
Manasseh pukning hongba
10 Eeshorna Manasseh amadi mahaakka loynariba mishingduda laaibao thaarammi. Adubu makhoyna laaibaodu taramde.
11 Maramsina Eeshorna Assyriagi ningthougi makhutta taahankhi. shennacheribna Manassehbu khoina lengduna purammi. Mahaakpu puba matamda pithraaina shemba yotlou kotlouna punduna Babylon taanna pukhi.
12 Awaaba taaraba matamsida mahaakna mapuroi Eeshorda punemjakhi amasung Ebungngona mahaakpu nungshibinaba khurumjakhi.
13 Ebungngona mahaakna haayjabadu tabiba maramna Jerusalemda amuk hallakkhi. Masigi matungda Manassehna Eeshorbu mapudumakni haaybasi khangkhi.
14 Mameithangda mahaakna Gihongi nongchup thangba maaykeida leiriba Davidki saaharduda mapaan-gi oiba chekpan amaa khagatkhi. madudagi tampaaklomda asum laaktuna ngaagi thonggal haayna khangnaba maphamduda youraga khapel phaaoduna khoisinkhi. Judahda leiriba laanbanshingda laanmi matik chaana thamkhi.
15 Eeshorgi ningnashangdagi lamlaanba laaishingdu louthokkhi. Jerusalemda leiriba Eeshorgi ningnashang leiriba chingda leiriba phaankhongshingdu phuktektuna saahargi chidaida hundokkhi.
16 Eeshorgi phaankhongdu amuk haanna shengdokkhi. Lamdaai shumdaaigi oinaa thounachingba paangthokkhi. Judahda leiriba mishingda Israelgi Eeshortabu ningjanaba yaathang toukhi.
17 Adubu mishingna ashengba maphamni haayna lounaduna leiriba maphamshingduda thounachingba toubadi lepkhide. Maphamdusu Mapuroi Eeshorda thounachingba katlammi.
Manassehna paanba loiba
(2 Ning 21.17–18)
18 Manassehna touramba thabakshing, mahaakna Eeshorgi maphamda haayjakhiba, maaichoushingna maangonda haaykhiba waashing, Israelgi ningthouron laairikta eduna leiri.
19 Mahaakna haayjaba matamda Eeshorna karamna loukhatpikhiba, mahaakna araanba toukhiba, mahaakna thaajadaba lamchat chatkhiba, ashengba maphamshing shaakhiba, Asherah amadi atei laai murtinachingba shaakhiba pumnamak maaichoushingna eba laairikta leiri. Maasi pumnamaksi mahaakna pukning hongdringeida toukhibashingni
20 Manassehna nonggaraba matamda mapaa mapu-shinggi mongphamda mahaakpu phumbikhi. Mahaakki mahutta machaanupa Amonna ningthou oikhi.
Judahgi ningthou Amon
(2 Ning 21.19–26)
21 Amonna ningthou oinaa paanba matamda chahi kunnithoi shurammi. Mahaakna Jerusalemda chahi ani paankhi.
22 Mapaa Manassehna toukhibagumna mahaaksu Eeshorgi mityengda aphaba thabakshing tourammi. Manassehna latlamba amadi ninglamba laai murtishingdu Amonna latlammi.
23 Mapaa Manassehna konna mapukning hongkhibadugumna hongkhide. Mahaakna mapaadagisu henna araanba kayaa tourammi.
24 Manaaishingna sarou shinduna mahaakpu konungda haatkhi.
25 Judahda leiriba mishingduna mahaakpu hat-khiba mishingdubu haatkhi aduga mahaakki machaanupa Josiahbu ningthou oihankhi.