Matthew 15
Chatnarakliba hounabi kaibagi Jesusna khumba
( Mark 7.1-13 )
15 Matam aduda Jerusalemdagi Pharisising amasung sastragi ojhasingna Jesusda laktuna hairei, 2 Nahakki seboksingna ahal laman-gi chatnarakliba karigi thugaibage? Maramdi makhoina chaba matamda makhut hamde. 3 Aduda Ibungona makhoida khumlak-i, nakhoisu nakhoigi chatnarakliba adugi damakta Ishorgi yathang thugaiba karigino? 4 Maramdi Ishorna hairammi, nama napabu ikai khumnou, amasung mama mapabu thina ngangba mahak adu sisanu. 5 Touigumsung nakhoina hai, kanagumbana mama nattraga mapada, eingondagi nakhoina kannaba phangba yaba adu Ishorda katthokkhre, hairagadi, Mahak aduna mapabu khak ikaikhumnaroi. 6 Amasung nakhoigi chatnarakliba adugidamak nakhoina Ishorgi yathangbu karisu oihande. 7 Aphasajaningbasa, Isaiahna nakhoigi maramda ningthina takthoklammi,
8 Mishing asina eibu chinbanthongna ikaikhumnei, Touigumsung makhoigi pukningdi eingondagi thapna lei;
9 Amasung makhoina mishinggi chatnaba yathang adubu dharmagi paotakkumna tambiduna eibu arembada khurumjei.
10 Matung aduda Ibungona miyam adu nakta kousillaga makhoida takpirak-i, khangnanaba tao, 11 Chinda changkhiba aduna mibu manghande, Touigumsung chindagi thoklakliba aduna mibu manghalli. 12 Matam aduda seboksingna laktuna Ibungoda hairei, wa adu tabada Pharisisingna khudi thire haiba Ibungo khangbibra? 13 Touigumsung Ibungona khumlak-i, eigi sargagi Ipana thadaba pambi khudingmakpu phuktokkani. 14 Makhoi leijasanu; makhoi mitangba lamjingbani. Amasung mittangbana mittangbabu chinglabadi, animak komda tagani. 15 Aduda Peterna Ibungoda khumlak-i, pandam adu phongdokna takpiyu. 16 Amasung Ibungona hairak-i, nakhoisu houjik phaoba khangdribra? 17 Chinda changkhiba makhei adu pukta taduna manung changbada chatkhi haiba nakhoi khangdabara ? 18 Touigumsung chindagi thoklakpa potsing adu puknungdagi lakpani, amasung makhoi aduna mibu manghalli. 19 Maramdi phattaba wakhal, mi hatpa, mitu miwa lannaba, marumbi thamba, huranba, aranba sakhi piba, thina ngangba, asi pukningdagi thoklak-i. 20 Mibu manghanbadi pumnamak asinani, Touigumsung hamdaba khutna chabadi mibu manghande.
Atoppa jatki leisabi amabu phahanbiba
( Mark 7.24-30 )
21 Matung aduda Jesusna mapham adudagi lengthoklaktuna, Tyre amasung Sidon-gi lamda theidokkhre. 22 Amasung yengu, lamdam adudagi Cannan nupi ama laktuna laojarak-i, Davidki macha nipa, he Prabhu, eibu nungsibiyu; eigi icha nupibu bhut amana yamna wana otpire. 23 Touigumsung Ibungona mangonda wa amata khumlamde. Amasung Ibungogi seboksingna laktuna, mabu thadokpikhro, maramdi mahakna eikhoigi tungda laoi, haina Ibungoda haijaduna leirammi. 24 Ibungona khumlak-i, Israelgi imunggi mangkhraba yaosingda thaba nattana eibu tharakte. 25 Touigumsung mana laktuna Ibungobu khurumjaduna haijarak-i, Prabhu, eigi iteng pangbiyu. 26 Aduda Ibungona khumlak-i, angangsing adugi tal louduna huisingda hunjinba chumde. 27 Touigumsung mana haijarak-i, chummi, Prabhu, maramdi huising adunasu makhoigi mapusinggi mejdagi tarakpa makup makai chai. 28 Matam aduda Jesusna mangonda khumlak-i, he nupi, nang yamna thajare; nangna ningjaba adu nangonda oirasanu. amasung magi macha nupi adu pungja adudagi phahanbire.
Mi ayambabu anaba phahanbiba
29 Amahiksung Jesusna mapham adudagi sandokkhiduna, Galilee samudragi manakta lenglak-i, amasung chingda lengkhattuna mapham aduda phamle. 30 Amasung miyam yamna Ibungoda laktuna, makhoiga loinana khong tekpa, khut soiba, mittangba, lol thoktaba amasung atei yamna puraktuna Ibungogi khuyada hek thamjarare, amasung Ibungona makhoibu phahanbire. 31 Maduna lol thoktabasingna ngangjaba, khong tekpasingna chatchaba, mittangbasingna ujaba asi ubada miyam duna ngakladuna Israelgi Ishorgi matik magun thagatle.
Mi lishing maribu pijaba
( Mark 8.1-10 )
32 Matam aduda Jesusna mahakki seboksingbu kousinduna hairak-i, eina miyam asida nungsiba pokle, maramdi makhoina eiga loinana numit humni leiminnaraduna makhoigi chanaba leitre; amasung makhoi lambenda wanthagadra haiduna eina makhoibu chara helhanduna thadokningde. 33 Seboksingna Ibungoda haijarak-i, miyam asup yambagi oknaba talbu lamhang asida eikhoinakadaidagi phanggadage? 34 Aduda Ibungona makhoida hai, nakhoigi tandum kaya yaoribage? amasung makhoina haijei, tandum taretka nga macha kharaga yaojari. 35 Aduga Ibungona miyam adubu leipakta phamthananaba yathang piraga, 36 Tandum taret amasung ngasing adu louduna thagatchare hairaga, thugaiduna seboksingda pibire, aduga seboksingna miyamda pire. 37 Amasung makhoi pumnamak chaduna thalle; aduga lemhouba machet makai adu khun-gatpada thumuk taret thalli. 38 Nupi angang thadana chakhiba makhoi adu nipa lishing marini. 39 Adudagi Ibungona miyam adubu thadokkhraga, hida lengsinduna Magadangi lamdamda lenglakle.