Acts 23
23 Adudagi Paulna ahallupta shangtrikna yengduna hai, ichin inaosa, eina numit asi phaoba Ishorgi mangda pukchel phajana panjarakli.
2 Maduda purohitlen Ananiasna manakta leplibasing aduda mahakki machinda phujillu haiduna yathang pire. 3 Matam aduda Paulna mangonda hai, he angouba teiba phaklang, nangbu Ishorna phugani! Nahakti wayel yathang adugi matung inna eibu wayel tounaba phamlaga wayel yathang adugi onna teinana eibu phu haiduna yathang piribra? 4 Aduga manakta leplibasingna hai, Ishorgi purohitlenbu nangna cheiribra?
5 Maduda Paulna hai, ichin inaosa, mahak purohitlenni haiba eina khangjade; maramdi asi iduna lei, nangna nanggi mishinggi mapubu phattaba ngangpharoi.
6 Touigumsung nakpak amana saduki amasung nakpak amana pharisi oirammi haiba Paulna Khanglabada, ahallupta lorak-i, ichin inaosa, eidi pharisi, pharisisinggi macha nipani; asibasingna hinggatli haibe khourangna ningbagi marida eibu wayel toubani.
7 Aduga mahakna asumna hairabada, pharisising amasung sadukisinggi marakta ningai tounarakle; amasung miyam adu nakpak tanare. 8 Maramdi hinggatpasu, sargadut amasung thawaisu leite haiduna sadukisingnadi hai; adubu pharisisingnadi animak asi lei haina yai 9 Maduda yamna lao khongnaba thokle; aduga pharisisinggi nakpak oiba sastragi ojasing kharana hougattuna waga waga soknarak-i, eikhoina mi asida phattaba karisu phangde. Kanana khanggani, mangonda thawai amana nattraga sargadut amana ngangnaramba yai.
10 Aduga ningai karma tounaraklabada, makhoina Paul bu machet machet segaiba yai haina athoiba luchingbana kiraduna, lanmishing kumthaduna mahakpu makhoigi maraktagi mullaga, pallikorda pusillu haiduna yathang pire.
11 Amasung matunggi ahing aduda prabhuna manakta leptuna mangonda hai, thouna phou, maramdi nahakna Jerusalemda eigi maramda sakhi pibagumna, Romedasu nahakna adugumna sakhi piba tare.
Jewssingna Paulgi mathakta sarou sinba: Paul bu Caesareada thaba
12 Amahiksung nongngallakpada, Jewssingna sarou sinnaraduna, inakhoina Paul bu hattriba phaoba chasu charoi, thaksu thakloi haiduna, makhoi masen sari sonnare. 13 Aduga wasak asi tounaba makhoi mi niphu hellammi. 14 Makhoina athoiba purohitsing amasung ahallamansingda laktuna hai, eikhoina Paul bu hattriba phaoba karisu tangloi haiduna eikhoi isen kanna sari sonnare. 15 Maram aduna houjik nakhoina mahakki wathok adu henna cheksinna wayelgadaba matagum nakhoida mahakpu puthabiraknaba ahallupka loinana athoiba luchingbagi maphamda hanggatipyu; aduga mahakna nakna youraktringedia, eikhoina mahakpu hatnanaba thourang toure.
16 Touigumsung Paulgi mamakna makhoigi lumliba adu tarabada, mahakna laktuna pallikor manungda changlaga Paulda tamle: 17 Maduda Paulna lanmi chamagi mapu ama kouduna hai, nipa macha asibu athoiba luchingbagi maphamda pubikho; mahakna mangonda karigumba wa tamjagadaba lei.
18 Asum touna mahakna mabu paiduna, athoiba luchingbagi maphamda puraklaga hai, keisumshangda thamliba eibu kouduna, nipa macha asina nahakki maphamda karigumba wa khara haijagadaba lei, mabu pubikho haina eingonda haijare.
19 Maduda athoiba luchingba aduna mabu khutsamduna, amaromda pukhraga, mangonda lonna hangle, nangna eingonda tamgadaba kari leibage?
20 Aduga mahakna hai, nahakna mahakki maramda henna cheksinna karigumba hanggadouba matagum Paul bu hayeng ahallupta putharaknaba Jewssingna nahakki naphamda haijagadabagi yanakhre. 21 Maram aduna nahakna makhoigi wa inbiganu; maramdi makhoigi maraktagi nipa niphudagi henba kangbu amana mahakpu hattriba phaoba chasu charoi, thaksu thakloi haina makhoi masen sari sonnaraga mahakpu lumduna lei; aduga houjikti makhoina langba loire; nangondagi yabiba ngaibata mangaire.
22 Adudagi athoiba luchingba aduna nipa macha adubu, nangna wasing asi eingonda khanghankhre haiduna mi kana amadasu tamganu haina yathang piduna chathankhre.
23 Aduga mahakna lanmi chamagi mapusingdagi anibu kouduna hai, ahinggi ahumsuba pungda Caesarea phaoba chatnaba lanmi chani, sagol tongba mi humphutara, aduga ta paiba mi chani thourang tou. 24 Amasung Paul bu sagol tonghanduna leibak ngakpa Philikski mapham tanna asoi angam leitana thunghannanaba, shadongsing adu langu.
25 Amasung mahakna maong asigi mattung inna lairik ama ire:
26 Claudius LUzziah, matik chaoraba leibak ngakpa Philikski maphamda eina khurumjari.
27 Nipa asibu Jewssingna phaduna, hatkadouba matamda eina mahak Romegi mini haiba khangladuna, lanmishingga loinana makhoigida matam chana cheksinduna, mahakpu kanbire.
28 Aduga makhoina mahakpu karigi theijilliba maram adu khangningduna, eina mahakpu makhoigi ahallup tanna puthare. 29 Makhoigi wayel yathang adugi wathoknaba marida mangonda theijille, adubu hatpa nattrage punbagi matik chaba theijinba wa karisu leite haina eina phangle.
30 Amasung nipa asigi mathakta sarou sinnaba leigani haina eingonda utlabada, eina mahakki theijinbasingdasu nahakki namangda mahakki mathakta wa ngangjaru haina yathang piduna, mahakpu nahakki naphamda thindana thakhibani.
31 Adudagi lanmishingna yathang matung inna Paul bu louthoktuna ahingda Antipatrida purakle. 32 Touigumsung hayenggumba aduda makhoina sagol tongba mishingbu mahakka loinana chatnanaba thanamlage, pallikorda hallakle. 33 Makhoi asina Caesareada thunglabada, lairik adu leibak ngakpa aduda katsillaga, Paul busu mamangda pusille.
34 Amasung mahakna lairik adu paraga, mahak kari lamgi wino hangle; aduga mahak Ciliciadagini haiba khanglabada, 35 Nahakki theijinbasingnasu laklaga, eina nahakki wa munna tagani haina mahakna hai. Aduga mahakpu Herodki konungda ngaktuna thamnaba yathang pire.