Exodus 15
Mosesgi ishei
15 Matamduda Moses amadi Isreelgi mishingna Eshorbu thagatpa oina makhagi isheisi sakkhi:
"Eshorgi gundu sakchagani, maramdi Ibungona maipakle. Sagol amadi Sagol lanmishingdu Ibungona samudrada luphanbikhre.
2 Oibiri ipanggal amadi eigi ishei Lainingthouna, Oibire Lainingthouna eigi aran khubhamgi urong, Masini eina ningjariba Mapu Ibungodu. Maramsina eigi Ibungogi gundu thagatchagani. Eigi ipana ningjaramba Mapu Ibungodu mahaktani maramsina Ibungogi matik sonjagani.
3 Eshordi landa thouba Ibungoni, Eshor haina chinggoinaribani taibangna.
4 Pharaohgi minai amadi dolaisingdu samudrada tahanbikhi,
Angangba samudrada mahakki khangatlaba lanmishingdu tahanbikhi.
5 Ithatna makhoibu kupsinkhi, nunggi matougumna makhoi samudra eironnungda lupkhi,
6 Hey Eshor, Ibungogi yet thangba pambomdu matik leida,
he Lainingthou yet thangba napambomtana yeknabasingbu loisinbikhi.
7 Ibungo nahakki chaoraba natik nayaidutana yeknabasingbu maithihankhi.
Ibungogi asaobadu meirigum thok-hanbiduna charukhokki matougumna makhoibu chakthekkhi.
8 Ibungona sor hondokpirakpatada thokkhi ichao, chaoraba ichaoduna mapei ama oina leikhi. Samudragi aruba iren phaoba lengkhide.
9 Yeknabasingna haikhi, "eina makhoibu tan-gani, Eina makhoibu laksingani, Eina makhoidagi phanglakpa lansingdu yenthokkani,
masina eigi apambadu thungani, ikhutsina thang satoktuna makhoibu manghan-gani."
10 Ibungona nungsit lakhanbiduna makhoibu lamkhangda luphanbikhi, achouba ishing ichenda makhoi misigumna lupkhi.
11 Laisinggi marakta nahakkumba kana leibage hey Eshor?
Sengthoibada amadi matik mayai leibada Ibungoga changdamnagadaba kana leibage?
12 Ibungona pambomta tingthokpiba matamda,
malem leironnungda changkhi makhoi loinamak.
13 Ibungona kanbikhiba mishingdu thambire chetna channa nungsibadugi manungda, Ibungogi asengba leipham oiriba maphamsida napanggaltana makhoibu chingbikhi.
14 Atoppa jatsingna masi tabada thak thak niknakhi,
Philistida leiriba mishingduna hairiba waphamsi tabada awaba saklon leitengkhi.
15 Houjikti Edomgi phamnaibasingdu toupham khangdre,
Moabki luchingbasingdu thak thak niktuna khangle,
Canaanda leiriba mishingdu mathum marang houre.
16 Akiba amadi angakpana makhoibu thumhatle, Ibungona toubikhiba thabaksingdu angakpagi masak oiba maramna makhoi nunggumna leire.He Eshor, Ibungogi mi oiribasingna lanthokpa loidriba phaoba, Ibungona mamal piduna leikhraba mishingna thungdriba phaoba ngakpiyu.
17 Ibungona makhoibu chingbiduna Ibungogi chingduda makhoibu semgatpiyu.
He Eshor, Ibungogini haina tamkhraba maphamduda,
he Eshor, Ibungogi nakhutmakna semkhraba, ningnashangduda leihanbiyu.
18 Eshorna matam leiba khibikta mai pakkani."
19 Pharaohgi sagolna chingliba dolaising, amadi sagol Lanmishingna samudrada kumthaba matamda Eshorna makhoigi mathakta ishing thumhanbikhi. Adubu Israelgi mishingdi samudrada kangphan-gi matougumna chatkhi. 20 Aaron-gi machannupi maichou Miriamna kholok ama pairaba mahakki matung illibi nupisingduna Jagoi saraduna chatkhi. 21 Miriamna makhoigi makok chingladuna ishei sakchakhi: "Eshorgi gundu sakchagani maramdi Ibungona mai pakle, sagol amadi sagol lanmidu Ibungona samudrada luphanbikhi."
Ayakpa ishing
22 Angangba samudradagi Mosesna Israelgi mishingbu chingduna Shur kouba lamduda leiba lamhangduda lakkhi. Makhoina numit humni lamhangda chatlaba matungda ishing marik ama phaoba phangkhide. 23 Makhoina Marah youba matamda maphamduda phangkhiba ishingdu thakpa yakhide. Maramdi Marahda phangba ishingdu thoidokna thumhi oirammi. Maramsina makhoina maphamdubu Marah haibadi ayakpa haina thonkhi. 24 Mishingna Mosesgi mayokta murum murum sonba hourammi. Makhoina hairammi, "eikhoina kari thakkadouribano?" 25 Mosesna Eshorgi khuyakhada kapladuna haijaba matamda Eshorna mangonda u pambi ama utpikhi. Mahakna upambidu ishingda thadaba matamda ishingdu thakpa yakhi.
Maphamduda Eshorna yathang ama pinabirammi. Maphamduda Ibungona makhoibu chang toubirammi. 26 Ibungona makhoida hairammi, "nakhoina pukchel sengna nakhoigi Mapu Ibungo oiriba Eina haiba yathangsi tarabadi, Eigi mityengda masina chummi haibadu tourabadi, nabungo oiriba eina piba yathangsing amadi eina semkhiba yathangsingdu kaidana inba ngamlabadi, Egyptta leiriba mishinggi mathakta tahankhiba lainasingdu nakhoigi nathakta tahalloi. Maramdi Eshor oiriba Eisi nakhoigi Maibani.
27 Masigi matungda Israel machasingdu Elim kouba mapahmduda laklammi. Hairiba maphamsida ngamnamak eiphut taranithoi leirammi. Maphamsida kona pambi humphutara amasu hourammi. ishing phangba maphamduda makhoina shang saduna leirammi.