Luke 1

Lukena lengba aphaba wapao

Wahoudok

1 Ahoubadagi mamitmakna ubasing amasung wa adugi thougan tourambasing, makhoi aduna eikhoida pithoklamba adugi matung inna, 2 Eikhoigi irakta ithung thungkhraba thabak adugi marida ayambana wari lengbada khut thingjinnabagi maramna, 3 He matik chaoraba Theophilus, nahakna tamkhraba wagi aoiba adu khaugba yananaba, 4 Eisu ahanbadagi hiram pumnamak khonggul liraga changkhonna mathangsitna nangonda ijaba phagani haina ningle.

Baptist toubiba John pokkani haina mangjounana haidokpa

5 Judeagi ningthou Herodki haktakta Abijahgi kanglupki leng oiba, maming Zachariah kouba kanagumba purohit ama leirammi, aduga mahakki nupidi Aaron-gi sageidagini, amasung mahakki maming Elizabeth kowi. 6 Amasung makhoi anina Prabhugi yathang amasung wayel punamakta ayol aral leitana chattuna, Ishorgi mangda dharmachenba oirammi. 7 Aduga makhoigi macha leiramde, maramdi Elizabeth chaboktabini, amasung makhoi ani adu chahi yamna lirammi.

8 Asum thoklare, mahakna mahakki kanglupki leng matung inna Ishorgi mangda purohitki thabak adu touringeida, 9 Purohitki phamgi hounabi matung inna prabhugi asengba maphamgi manungda changduna dhup thaba mahakki laibakta tare. 10 Amasung dhup thabagi pung aduda mishing adugi miyam pumnamakna mapanda haijaduna leirammi. 11 Maduda Prabhugi dut amana dhup thanapung adugi yetta leptuna mahakpu uhanbire. 12 Aduga Zachariahna urabada langtaknare, amasung mangonda akiba thokle. 13 Maduda dut aduna mangonda hairak-i, kiganu, Zachariah, maramdi nahakki nijaba adu tabire, aduga nahakki nupi Elizabethna nacha nipa ama pokkani, amasung nahakna magi maming John thon-gani. 14 Aduga nungngaiba amasung yamna haraoba nahakki oigani, amasung mahak pokpada ayambana haraogani; 15 Maramdi mahakti Prabhugi mityengda chaogani, drakha mahisu yusu thakloi, amasung mamagi puknungdagi houna thawai asengbana than-gani. 16 Aduga Israelgi machasing ayambabu mahakna prabhu makhoigi Ishorda halhan-gani. 17 Aduga mapasinggi thammoibu machasingda, amasung haiba indabasingbu achumbasinggi lousingda halhannanaba, Prabhugi damak semsaraba mishingbu thourang langhananaba, mahak masana Ibungogi mangda Elijahgi thawai amasung panggalna chatkani. 18 Maduda Zachariahna dut aduda hairak-i, asi eina karamna khanggadage? Maramdi ei hanure, amasung eigi nupisu chahi lire. 19 Amasung dut aduna mangonda khumlak-i, Ishorgi mangda leppa Gabriel eini; aduga nangga ngangnanaba amasung aphaba pao asi nangonda puraknanaba eibu tharakpani. 20 Amasung yengu, hiramsing asi thoktriba numit phaoba nangdi tuminna leigani amasung wa ngangthokpa ngamloi, maramdi makhoigi matamda thunggadaba eigi wasing adu nangna thajaramde. 21 Asum touringei asida mishingna Zachariahbu ngairammi, amasung mahakna asengba maphamda kuithakhibaduda makhoina ngaktuna leirammi. 22 Amasung mahakna thoklakpada makhoida ngangba ngamdre, aduga mahakna asengba maphamda karigumba ama urak-i haina makhoina khangle; amasung mahakna makhoida inggit tourammi amasung lol thoklamde. 23 Asum thoklare, mahakna thougan touba numit adu sukhrabada, mahak mayumda hankhre.

24 Numitsing asigi matungda mahakki nupi Elizabeth mirolle, 25 Amasung asi haiduna mahak masana tha manga lotchare, madudi, mishinggi marakta eigi ikaiba koknanaba ithakta prabhuna yengbiba numit aduda eingonda asi thok-hanbire.

Jesus pokkdabagi wa mangjounana haidokpa

26 Amahiksung tha taruk subada Nazareth kouba Galileegi sahar tanna Ishordagi Gabriel dut adubu tharakle; 27 Davidki imungdagi Joseph kouba nipa amada wa loinakhrabi leisabi asengbi aduda mahak lakle, amasung leisabi adugi mamingdi Maryni. 28 Aduga mahakna mangonda naksillaktuna hairak-i, Yaiphou, thoujal phangbi ibemma, prabhuna nangbu loinabi. 29 Touigumsung hairiba asida mahakna yamna langtaknaraduna, khurumba asi karamba makhurumno haina mapukningda khallak-i. 30 Maduda dut aduna mangonda hai, kiganu, Mary, maramdi nahakti Ishorgi maphamdagi thoujal phangjare. 31 Amasung yengu, nahak mironduna nacha nipa ama pokkani, aduga Ibungo adugi maming Jesus thon-gani. 32 Ibungo asi matik chaogani, amasung ihen henba adugi macha nipa kougani; amasung Prabhu Ishorna Ibungo aduda mapa Davidki phambal pibigani, 33 Aduga Ibungona Jacobki imunggi mathakta lomba naidana pan-gani; amasung Ibungogi leibak adu lomba nairoi. 34 Maduda Maryna dut aduda hai, eidi nipaga khangnadabi oibanina, asi karamna oigadage? 35 Aduga dut aduna mangonda khumlak-i, thawai asengbana nangonda kumtharakkani, amasung ihen henba adugi matikna nangonda lumsinbiragani; maram adunasu pokkadaba asengba adu Ishorgi macha nipa kougani. 36 Amasung yengu, nahakki sagei Elizabethnasu hanuthangda macha nipa ama mirolle; aduga chaboktabi hairamba mahakna mironba houjik tha taruk sure. 37 Maramdi Ishordagi thokpa wahei khuding matik leitaba oiroi. 38 Maduda Maryna hairak-i, yengbiyu, Prabhugi manai nupibu, nahakki yathang matung inna eingonda thokpa oisanu. Adudagi dut aduna mangondagi chatthokkhre.

39 Amahiksung Maryna numitsing asigi manungda hougattuna, chinggi lamdam, Judahgi sahar amada thuna chatkhre, 40 Aduga mahakna Zachariahgi yumda changduna Elizabethpu khurumjare. 41 Asum thoklare, Elizabethna Marygi khurumjaba adu tabada, mahakki puknungda angang aduna chongkhatle; amasung Elizabethna thawai asengbana thalladuna, 42 Khonjel wangna laokhatlak-i, nupisinggi marakta nangdi yaiphabini, amasung nanggi puknunggi mahei adu yaiphabani. 43 Eigi Prabhugi mamana eingonda lakpida, eingonda yaiphaba asi kadaidagino? 44 Maramdi yengu, nanggi khurumjaba khonjel adu eigi nakongna tarabada, ipuknungda angang asi yamna haraona chongkhatle. 45 Aduga thajarabi nupi adu yaiphabini; maramdi prabhudagi mangonda haikhraba adu thunggadabani. 46 Maduda Mary hairak-i:

      Eigi pukningna Prabhubu thagatchei,

47 Amasung eigi thawaina eigi kanbiba mapu Ishorgi maphamda haraojare.

48 Maramdi Ibungo mahakna manai nupigi tollaba phibamda yengthabi. Maramdi yengu, houjiktagi houna miron punmamakna eibu yaiphabi kougani.

49 Maramdi panggalba aduna eingonda achouba thabak toubire; amasung Ibungo mahakki ming asengbani.

50 Amasung Ibungo mahakpu kibasingda miron mironda Ibungo mahakki nungsibiba lei.

51 Ibungo mahakki pambomna panggal utpire; Ibungo mahakna makhoi makhoigi pukninggi khangjaba aduda chaothokpasingbu ichai chaikhaibire.

52 Ibungo mahakna phambaldagi angambasingbu inthabire, aduga tonthabasingbu chaokhathanbire;

53 Ibungo mahakna arambasingbu aphaba potna thalhanbire, aduga inakkhunbasingbu hangna thadokpire.

54 Ibungo mahakna Abraham amasung mahakki dharada lomba naidana nungsibiba ningsingnanaba,

55 Eikhoigi ipa ipusingda haikhibagumna, Ibungogi manai Israelbu pangbire.

56 Amasung Maryna tha ahumlom mahakka leire hairaga, mayumda hankhre.

Baptist toubiba John pokpa

57 Amahiksung Elizabethki angang unagadaba matam surabada, mahakna macha nipa ama pokle. 58 Aduga Prabhuna thoidokna Ibungo mahakki nungsibiba mangonda utpire haiba mahakki keiroi leikai amasung sagei nateina tabada, mahakka loinana haraomignarammi. 59 Asum thoklare, numit nipalni subada angang adubu un kaknanaba makhoina lakle; amasung makhoina mapagi maming matung inna mabu Zachariah thon-gadourammi. 60 Maduda magi mamana khumlak-i, natte; Touigumsung mabu John thon-gadabani. 61 Amasung makhoina mangonda hairak-i, nahakki sageinateigi marakta maming asi kouba kana amata leite. 62 Aduga mabu maming kari thonningbage haiduna makhoina magi mapada inggit toure. 63 Maduda mahakna inanaba korabak ama nijaduna,magi maming John kowi, haiduna ire. Aduga makhoi pumnamak ngakle. 64 Khudak adumaktada mahakki machin hangdokpire, marei thadokpire amasung mahakna Ishorbu thagatchaduna wa ngangi, 65 Amasung makhoigi akoibada leiriba pumnamakta akiba pokle. Aduga hairiba pumnamak asina Judeagi ching lamdam pumnamakta inin ninnare; 66 Amasung angang asi kari oiragaba haiduna, ataba pumnamakna makhoigi thammoida thamlammi. Maramdi Prabhugi khut maga loinarammi. 67 Amahiksung mapa Zachariahna thawai asengbana thalladuna Ishorgi wa takthoklak-i,

68 Israelgi Ishor Prabhubu thagatchaba oisanu,maramdi Ibungo mahakki mishingda mityeng tabiduna handokpiba thabak toubire;

69 Amasung Ibungo mahakki manai Davidki imungda eikhoigidamak aran khubamgi machi ama phaohanbire

70 (Thainadagi Ishorgi, wa takthokpa asengbasing adugi machinna Ibungo mahakna haihanbagumna);

71 Eikhoigi yeknabasing amasung eikhoibu tukkachaba pumnamakki khuttagi eikhoibu kanbiba;

72 Eikhoigi ipa ipusingda nungsibiba utnanaba, Ibungo mahakki asengba lepnakhiba wa ningsingnanaba,

73 Amasung eikhoigi ipudhou Abrahamda wasaknakhiba matung inna,

74 Eikhoibu eikhoigi yeknabasinggi khuttagi kanbiraga, Ibungo mahakki mangda akiba leitana,

75 Pukning asengbadasu dharamachenbadsu ekhoigi punsi chuppa Ibungo mahakpu thougan toujaba yabinanaba toubire.

76 Amasung, angang nangbudi, ihen henbagi wa takthokpa kougani; Maramdi Ibungogi lambi thourang langbinanaba Prabhugi mangda nangna chatkani;

77 Ibungogi mishingda makhoigi pap kokpiba aran khubamgi mahei pibinabani;

78 Masi eikhoigi Ishorgi nungsibiba pukchen-gi maramnani; asigi mapanna amambada amasung asibagi mamida phamlibasingda nganbinanaba,

79 Aduga ingthabagi lambida eikhoigi khong chingbinanaba, mathaktagi chingkhei hunba aduga eikhoibu mityeng tabigani.

80 Amahiksung angang, adu hakchangdasu thawaidasu chaosu chaorak-i, kansu kallak-i, amasung Israelsingda mahakpu utpa numit phaoba lamjaoda leirammi.