Job 28
Loushingbu thaagatpa
1 Silver sungnanaba khani kayaamarum lei, sanaa sungnanaba mapham kayaa amasu lei,
2 Mishingna silver leinungda talli, nungdagi kori sungdok-e.
3 shukla mamlaba maphamdu mina younnaba hotnei, maalemsigi marudusu makhoyna thidoknaba laaknei, amaambada mina nungdum phukpa ngammi.
4 Taaibangsigi mina youdriba mapham phaaobada, nattraga mioiban amukta khongdarudriba maphamdu phaaobada, mishingna khanigi potshing tannei. Maphamduda matomta oirabasu thabak shubaa karigumbada shurungda changba matamda thouri pullaga changba phaaobada ngammi.
5 Malemsida phou cheng amadi chaanaba thokhalli, adubu maalemsigi makhaada akoyba maphamna thalli.
6 Malemsida leiriba nungshingduda sangbanaba mamal yaamlaba nung yaaowi, aduga maalemsigi uphun phaaobada sanaagi marik yaaowi.
7 Khunukhrangna khanigi laambeldu ubaa ngamde, langjaa phaaobana maphamduda pairuba leite.
8 nongsha nattraga atei shaashingna phaaoba adugumba achikpa maphamshingduda koirude.
9 Mina akanba nung touthokpa ngammi, chingjaaob phaaoba khottuktuna louthokkhiba ngammi.
10 Makhoyna nungdum phuktokpa matamda, mamal yaamlaba nunga phanglak-e.
11 Makhoyna turelgi maruda touduna lonna leiriba potshingdu khangba ngammi.
12 Loushing haaybadu kadaayda phangbage? Mapham keida eikhoyna maasibu tamba yabage?
13 Mioibada loushing thirabasu phangde, kanaanasu masigi maheidu khangde.
14 Ipak eyaaida phangde loushingdu thiba.
15 Sana amadi silver piduna maasibu leiba ngamde,
16 Ashengba sanaa amadi leitengna masigi maheiduga mannaba ngamde.
17 Masi sanaadagi henna mamal yaammi, sanaana shaaba glas nattraga Khwaaidagi henna phajaba patrana masidagi hende.
18 Masi muktana kari tougani loushinggi mamaldi hiradagisu helli.
19 Mamal yaamlaba nungga masiga chaangdamnaba yaade, phudonglaba sanaaga masiga praman touba yaade.
20 Loushinggi hourakphamdu kadaaydano? Mapham keida tampham leibage?
21 Taaibangsigi jibaashingna maasibu ubaa ngamde, nongmadonda paairiba cheklaashingnasu maasibu khangba ngamde.
22 Amaangbana thallaba maphamshing amadi ashiban haayri: mina masigi maramda haaynabadu eikhoyna takhre.
23 Eeshorna masigi laambeldu khangbi, ebungngotana ubi masigi hourakpham kadaaydano haaybadu.
24 Ebungngona maalemsigi aroibadu khangbiba maramna, nongmadonsigi makhaada leiriba pumnamak Ebungngona khangbi.
25 Eeshorna nungshitpu mapaanggal happiba matamda, epaakki achouba leppiba matamda,
26 Nong kadaayda taagani leppiba matamda, nongkhaak nonglaao touriba nong mapeina changpham leppa matamda,
27 Ebungngona loushingdu karino khangbi aduga masigi maheidu Ebungngona leppikhi. Ebungngona maasibu khan-gatpikhrabani.
28 Eeshorna maramsina mioibada haayri, "loushing shingge haayrabadi Eeshorbu khurumjou. Khangge haayrabadi phattabadudagi leithouk-u."