2 Samuel 6
Jerusalemdagi ebungngo-gi phambaal purakpa
(1 miron13:1-14:15:25-6,43)
6 Davidna Israelgi manungdagi akhannaraba mi 30,000 khan-gatlammi. 2 Nongthak nongkha anigi Mapu karubimda ngaanthoiriba ebungngo-gi minglen louduna thonkhraba ebungngo-gi phambaaldu puraknabagidamak David amadi mahaakka loynariba misingduna Baalah-Judahda chatlammi.3 makhoyna phambaaldu chingda yum saaduna leiriba Abinadabki mayumdagi anouba gari amada haplaga purakkhi. anouba garidu Abinadabki machaa-nupaa Uzzah amadi Ahiona thouraduna phambaaldu pura klammi, 4 Ahiona phambaaldugi maangda chatlammi. 5 Eesor-bu ekaai-khumnaba utpa oinaa David amadi Israelgi misingna makhoygi leijabi thaaduna jaagoi saraduna esei sakkhi. pena, saaranggi, pung amadi jhal paayduna nungaaiba phongdokkhi.
6 makhoyna naakongi lou yeiphamdu yourakpa matamda sanlaba anidu tuge tourammi amasung Uzzahna makhut tingthoktuna phambaaldubu konkhatkhi. 7 Khudaktumaktada Eesor-na Uzzahna ekaai-khumnaba uttaba thabak toubaduda saaoraduna haatkhi. Phambaaldugi nakmaktada Uzzah nonggaakhi. 8 Matamdudagi houraduna ngasi phaaoba haayriba maphamsibu Perez Uzzah kounakhi. Eesor-na Uzzahbu tamthina cheirak pikhiba asida David thoidokna saaorammi.
9 Matousi ubada Davidna mapukningda akibaa pokladuna ebungngo-gi maphamda haayjarammi, "matou karamna ebungngo-gi phambaalsi nanaaina puduna thougan toujagadouribano?" 10 maramsina Davidna phambaaldu Jerusalem taanna puraroi haayna mapukningda chap yungna leplammi. maramsina Davidna Gittigi Obed-Edomgi mayumda thamkhi. 11 Eesor-gi phambaaldu Gittigi Obed-Edomgi mayumda thaa ahum thamkhi. Eesor-na Obed-Edom amadi mahaakki emung manung pumnamakpu kubikhi.
12 miyaamna Davidta tamlammi, "Eesor-gi phambaaldu thamjaduna seba toujaba maramna Obed-Edom amadi mahaakki saagei-naatei pumnamak ebungngona nungaaihanbire." paaosi taabada Davidna Obed-Edomgi mayumdagi Eesor-gi phambaaldu purakkhi. 13 Eesor-gi phambaal puriba misingduna khongkap tarukkhaktang hek thangba matamda Davidna san amaaga yaao masa noiba amaaga katlammi. 14 Davidna mapaanggal amadi thouna phudoktuna ebungngo-gi mamaangda jaagoi saakhi. Haayriba numitsida Davidna memanaba phi amaa setlammi. 15 asumna David amadi Israelgi mi khudingmakna Eesor-gi phambaaldu haraaona perenachingba khongduna purakkhi.
16 Davidki saharduda Eesor-gi phambaaldu purakpa matamda Saulgi machaanupi Michalna thongnaaodagi yengthorakpa matamda ningthou Davidna Eesor-gi maangda chongduna jaagoi sabadu urammi amasung mahaakki pukningda matoudu tukkachana khankhi. 17 makhoyna Eesor-gi phambaaldu puraklaga Davidna saakhiba khaangpoktuda thamlammi, Davidna meida thaaduna touba puja amadi lamdaai sumdaaigi pujanachingba kayaamarum phangthoktuna Eesor-gi maphamda katchakhi. 18 Davidna meida thaaba amadi lamdaai sumdaaigi thou paangthokpa loirabada nongthak nongkha anigi mapu, Eesor-gi mingda miyaamda bor pibikhi. 19 Israelda leiriba nupaa nupi amaa phaaoba chitthadana tal machet amam-mam adugaa saa saruk amam-mam thungkhi. Kismistagi semba tal mapak amam-mamsu yenkhi. Thoudoksi loiraba matungda miyaamdu mayum mayumda hankhi.
20 Davidna mahaakki emungda leiriba misingdudasu bor pirunaba haayduna hankhi. Saulgi machaanupi Michalna Davidpu okchanaba thoklammi, mahaakna haayrak-e, "Israelgi ningthouna ngasi ekaaiba khangdaba kanaagumba mina tougadouba maongda phiron ningthina settaduna yaamna lemjaba maongni khanduna ekaainingai oiba maongda jaagoi saakhi." 21 maasi taabada Michalda Davidna haayrammi, "eina ngasi sariba jagoidu Eesor-gi misinggi amadi nahaakki napaa ebungngo adugi mathakta ningthou oinaba eibu khandokpikhiba Eesor-gi maangda saakhibani. maramsina eina Eesor-gi maangda nungaairibani. 22 Ngasi toukhibadu khajiktani. masidagisu henna tukkachaningai oiba thabak kayaa eina tougani. Nahaakki mityengdadi eisi leikha taaba amaa oinaa ugani adubu nahaakna houjik paalliba enaai nupi-singdugi maphamdadi eisi thoidokna ekaai-khumnaribani." Saulgi machaanupi Michal siba phaaoba machaa pokkhide.