Daniel 4
Nebuchadnezzargi anisuba mang
4 Ningthou Nebuchadnezzargi maphamdagi mishing jatsing, malemsida leiriba tongan tonganba lon lollibasinggi matamda eina mara tana nungngaina pananaba bor piribasini. 2 Khwaidagi wangchaoba sengthoiraba Mapu Ibungona eigi ikada toukhiba angakpa amadi achouba khudamsingsi utpaduna eigi nungngaiba oijare.
3 Ibungo mahakna utpikhiba khudamsingdu kayada chaokhrabano, Ibungo mahakna toubiba angakpasingdu kayada mapanggal leikhrabano. Ibungo mahakki leibaktu aroiba leitraba leibakni, miron miron khudingda Ibungo mahakki leibaktu sandokpirakli.
4 Nebuchadnezzar koba eisi iyumda sana konungda ningaidana leirammi. 5 Eihak yamna kiraba mang ama mangkhi. Eigi puknungda changlakpa wakhan amadi ithinduna eibu tapthahallamde. 6 Maramsina Babylonda leiriba marousing leiba mi khudingmak eigi imangda karaknaba yathang ama pirammi. Makhoina mangsigi wa machangdu taknanaba koukhatlammi. 7 Matamduda jadu heiba mishing, laipubasing, Chaldeansing, amadi panjisingnachingba loina kara klammi. Eina makhoida mangdu hairammi adubu makhoina mangdugi wa machangdu haiba ngamlamde. 8 Mameithangda Daniel haibadi eigi lai amagi maming louduna Belteshazzar haina thonkhiba adu laklammi. Mahakki mathakta asengba Mapu Ibungogi thawai changlammi. Eina mangonda mangdu liraduna hairammi, 9 "Jadu heibasinggi makok oiriba hey Belteshazzar, sengthoiraba Mapu Ibungogi thawaiduna nahakka loinana leibiba maramna aruba haibasi nahakki naphamda thoina leiroi haiba eina khangi. Eina mangkhiba mangdu asini. Masigi wa machangdu eingonda hairo tarasi. 10 Eina yahipatuna leiringei matamda toukhiba khudamdu asini: yengu, eina malemsigi mayaida upan ama houba urammi. Hairiba usi yamna wanglammi. 11 Masigi manasingdu yengbada yamna phajarammi. Masigi mauda palliba uheisingdu mapan nairamde. Maramsina mi pumnamakki chaba konanaba leirammi. Lamlakta leiba shasingna magi makhada yarekharammi. Nongmadonda pairiba cheklasingna masigi masasingda tongjarammi. Taibang chinjak charibasingdu masigi maheidu charaga hinglammi. 11 Hairiba upansi yamna chaoraktuna masa marengna nongmadon khetlammi. Malemsigi aroiba maphamda leppa matamda masibu irai laina uba ngamlammi.
13 Eina phamungda hiptuna leiringei matamda uriba khudamsigi manungda yengu, sengthoiraba thongngakpa amakhak koirouthaktagi kumthara klammi. 14 Mahakna khonjel wangna asumna laora klammi. "Upansi yantholo. Masida palliba masa marengsingdu thangna yanthatlo. Masigi manasingdu khiktoklo aduga masida palliba maheisingdusu chaikhairo. Masigi makhada leiriba shasingdu lamdam tamna chelhankhro. Masigi masada tongliba cheklasingdu paihankhro, 15 Adubu masigi maugi marudu malemda adum tahallu. Loubukta houriba nouraba napigi marakta masibu yot amadi pithraigi yotlina punduna thammu. Masi nongmadondagi tarakpa likla mariktuna chothallu. Shasingna napi chaduna hingbagumba mahaksu napi charasanu. 16 Mahak taibang migi pukningdu leitrasanu. shagi wakhan changhallu. Matou asigumna mahak thak taret oirasanu. 17 Hairibasi thongakpadugi yathangni. Dandisi sengthoiraba Ibungoduna tabikhibani. Masina taklibadi araobada taibangsida leiriba mishingna khwaidagi wangchaoraba Ibungoduna taibanggi mathakta ningthou oibiri hairisini. Ibungo mahakna apamba amadi khoidaba yengduna masibu sinnabigani. Aduga masigi manungda khwaidagi nollukpa midubu masigi Mapu oihanbigani. 18 Ningthou oiriba Nebuchadnezzar eina mangkhiba mangdu asini. Aduga hey Belteshazzar, nahakna madigi wa machangdu hairo. Eigi leibaksida leiriba asingba mi pumnamakna hairiba mangsigi wa machangdu haiba ngamdre. Adubu sengthoiraba Mapu Ibungogi thawaiduna nahakka loinana leibiba maramna nahakti pumnamaksi haiba ngamgani.
Danielna piba manggi wahanthok
19 Matamduda Belteshazzar haina mingthollaba Daniel matam khara changaknaduna leirammi. Mahak wakhan khan-pham thoklamde. Ningthouna hairammi, " Belteshazzar, mamg amadi masigi wa machang ningaiba leitana haiyu." Belteshazzarna hairak-i, "iningthou Ibungo, masi Ibungobu tukkachabasingdugi mathakta tahanbiba oisanu. Masigi wa machangdu nahakki yeknabasinggi mathakta taba oisanu. 20 Ibungona ubikhiba upan mathen pharaktuna yamna kankhiba matonna nongmadon youkhiba, malemsigi aroiba maphamda leppa matamda uba phangkhiba, 21 Manadu yengbada phajaba aduga mahei mapan naidana pankhiba, taibang pumnamakki chinjak masina pikhiba, loubukta leiriba shasingna masigi makhada leipham phangjakhiba aduga masigi masada nongmadonda leriba cheklasingna yarekchakhiba, 22 Adugumba upaldu iningthou Ibungoni. Hey ningthou, Ibungo houjikti thoina chaoba amadi panggalaba ningthou oiribani. Iningthougi natik nayaidu nongmadon youre. Ibungogi leipasi malemsigi aroiba maphamdu phaoba sandokli. 23 Iningthouna ukhiba thonggakpa asengba magunna leitengba aduga upandu kakthatlu, tumna manghallu, maudungi marudu malemnungda thambiyu, loubukta houriba anouba napisinggi marakta yot amadi pithraina semba yotlingna phaduna thammu. Nongmadondagi tarakpa liklana masibu chothallu, loubukta leiba shasingna napi chaduna hingbagum mahaksu napi chaduna hingsanu aduga asigumna thak taret henna khangsanu haikhibadugi matangda thoidokpa wa machangdu asini: 24 Hey ningthou, iningthougi pukningda khwaidagi wangchaoraba Mapu Ibungoduna changbire. Maramsina Ibungoduna yathangsi asumna pirakli. 25 Taibang migi maraktagi nahakpu tanthokkani. Ibungona leigadaba maphamdu lamlakta leiba shasinggumna lamlakta oigani. shana sajik chabagumna nahak sajik chagani nahakki nathakta nongmadondagi tarakpa likla marikna chothalgani. Matou asigumna thak taretlak iningthouna awaba khanggani. Masi iningthouna khwaidagi wangchaoba Mapu Ibungoduna taibangpansi wayelbiri haibasi khangdriba phaoba thokkani. Aduga masi Ibungo mahakna khoidaba kanada mapu oinaba pithokkani haibasi khangdriba phaoba oihangadouribani. 26 Upandugi mauga loinana marudu malemnungda thambinaba haikhibaduna takpadi koirou nongmadonsina wangi haibadu nahakna khanglakpa matamda nahakki leibaksi amuk chaokhatpa hourakkani 27 Hey ningthou maramsina nanaina haijariba wa machangsingsi loubiyu. Aranba thadoktuna achumbadu toubiyu. Ot-neibiraba mishinggi mathakta thoujan utpiduna Ibungona toukhiba papsingdu koknaba toubiyu. Adu oirabadi iningthou nungngaibagi namkhei leiroi.
28 Pumnamksi ningthou Nebuchadnezzargi mathakta thokkhi 29 Tha taranithoi loirakpa matam aduwaida Babylon-gi sana sanggaigi mathakta handok hanjin chattuna leirammi. 30 Naingthouna hairak-i, "matik mayai leiraba Babylon, eigi ipanggal amadi itik iyai yengduna eina asi youna sakhraba nattra?" 31 Hairiba wasingsi ninghouna hairingei matamda nongmadondagi khonjel ama tarammi. "hey Ningthou, Nebuchadnezzar, masi nahakki naphamda hairibani: Leibaksi nahakki nakhutta leiraroi. 32 Nahakpu taibang migi maraktagi thapna tanthoklagani. Nahakna leigadaba maphamdu lamlakta leiriba shasinggumgani. shalgimatougumna nahak napi chaduna khanggani. Khwaidagi wangchaoba Ibungoduna taibangsi wayelbiribani haibasi yadriba phaoba aduga Ibungo mahakna piningba khoidabadugi makhutta masi pithokpi haibasi khangdriba phaoba thak taretlak wangna nahak awaba khanggani. 33 Khanghoudana hairibasi Nebuchadnezzargi maraibakta takhi. Mahakpu mishinggi maraktagi tanthokpiduna shalgimatougumna napi chaduna leikhi makokta houriba samduna achouba uchekki masagumna sangdriba phaoba mahak likla marakta leikhi. Mahakki makhujindu yengbada uchekki khongga mannarammi.
Nebuchadnezzarna mapubu thagatpa
34 Akaknakhiba matamdu loiraklabada Nebuchadnezzar eina koirouthakta irai haigattuna yengjaruba matamda phaokhi achumba wakhandu pukningsida. Eina khwaidagi wangchaoraba Mapu Ibungo, ahouba aroiba leitraba Ibungodubu panjaraduna thagatcharammi.
Ibungo mahakki leibaksi aroiba leite, miron miron khudingda Ibungo mahakki leibaktu lei,
35 malemsida leiriba jiba pumnamak karisu natte, koirouthakta leiriba jibasinggi marakta Ibungo mahakna touningbata toubi. Toubiri mahakna apamba malemsida leiriba jibasinggi maraktasu, Ibungo mahakki mathakta kanana khut thaba ngambage? nahak kanano haiba kanana haiba ngambage?
36 Matamsimaktada eihak wakhal ichel chumlaklammi. Maramsina eigi itik iyai amadi konunggi yaipha nungngaibadu eingonda hanjinbikhi. Eigi phamnaibasing amadi angambasingna eibu thijarammi. Eigi leibaksida eihakpu mara tana palhanbikhi. Aduga yaiphabada yaiphabadu eigi oikhi. 37 Maramsina houjikti Nebuchadnezzar eina koirouthakta nganthoibiriba Ibungo ningthoudubu wangna thagatchari. Maramdi Ibungo mahakna touba thabak amadi Ibungo mahakki lambeldu achumba ngaktani. Napanga loinana chatlibasingdu nahakna kemduna manghanbi.