John 11
Lazarusbu sibadagi hinggatpiba
11 Amahiksung Mary amasung magi mache Marthagi khul Bethanydagi, Lazarus kouba kanagumba mi ama narammi. 2 Naribasi, Jesusbu manam nungsiba thou teithokpikhiba amasung mahakki makhong masamna teithokpikhiba Marygi mapuwa, Lazarusni. 3 Maram aduna machesingna Ibungogi maphamda pao thaduna haire, Prabhu, yengbiyu, Ibungona nungsiba mahak adu nari.
4 Touigumsung Jesusna madu tarabada hai, anaba asi sige haiba naba natte, adubu masigi mapanna Ishorgi machanipa adubu thagatnanaba, Ishorgi matik mangalgi damakni.
5 Jesusna Martha, magi manao amasung Lazarus adubu nungsirammi. 6 Maram aduna Ibungona mahak nare haiba tabada matam aduda leiramba mapham aduda Ibungona numit nini phare. 7 Adudagi asigi matungda Ibungona seboksingda hai, eikhoina Judeada amuk chatsi.
8 Seboksingna Ibungoda hai, Rabbi, houjikmak Jewssingna nahakpu nungdumna thananaba thiri, aduga nahakna aduda amuk hanna chatkadouribra?
9 Jesusna khumle, nungthingi pung taranithoi leiba nattra? kanagumba mi amana nungthinda chatlabadi, mahakna taibangpan asigi mangal adu uba maramna khudi thide. 10 Touigumsung kanagumba mina ahingda chatlabadi mahakna khudi thi, maramdi mangal adu mangonda leite. 11 Ibungona asising haire, aduga asigi matungda Ibungona makhoida hai, eikhoigi marup Lazaras tumkhre, adubu eina mahakpu houdoknanaba chatke.
12 Maram aduna seboksingna Ibungoda hai, Prabhu, mahakna tumlabadi, naba pharagani, 13 Jesusnadi mahakki sibagi maramda haiba oire, adubu tumbana potthabani haiba asigi maramda Ibungona haibani haiduna, makhoina ninglammi.
14 Maram aduna Jesusna matam aduda makhoida sengna hai, Lazaras sire, 15 Amasung nakhoina thajananaba eina maduda leiramde haiduna nakhoigi damak eina harawi, adum oinamakpu eikhoina mangonda chatsi.
16 Maram aduna Didymuss kouba Thomassnana mahakki marup seboksingda haikhi, Ibungoga loinana siminnanaba eikhoisu chatsi.
17 Asum touna Jesusna lenglaklabada, mahakpu mongphamda phumkhiba houjik numit marini sure haiba khangle. 18 Bethani asi Jerusalemdagi kilometre ahumlomta thapna leirammi, 19 Aduga Jewssing ayambana Marthaga Marygagi maphamda makhoigi mapuwagi maramda themjinbinanaba laklammi.
20 Maram aduna Marthana Jesus lenglak-i haiba tarabada, Ibungo oknarure, adubu Marydi yumda phamhoui. 21 Maram aduna Marthana Jesusda hai, Prabhu, Ibungona asida leibiramlabadi, eigi Ipuwa siramloidabani. 22 Aduga houjiksu eina khangjei, Ibungona Ishorgi maphamda nijaba khibik Ishorna Ibungoda pibigani.
23 Jesusna mangonda hai, nanggi napuwa hinggatkani.
24 Marthana Ibungoda hai, akonba numitta hinggatpa aduda mahakna hinggatkani haiba eina khangjei.
25 Jesusna mangonda hai, hinggatpa adu amasung hingba adu eimakni, eibu thajaba mi aduna hinggani, 26 Aduga hingduna eibu thajaba mi khudingna kadoungeidasu siroi, nangna masi thajabra?
27 Mahakna Ibungoda hai, hoi, Prabhu, Ibungodi Ishorgi macha nipa Christa, taibangpanda lengbirakliba aduni haiba eina thajare.
28 Mahakna wasing asi hairaba matungda chatkhre, aduga mahakki manao Marybu lonna kouduna hai, Rabbi lakle, aduga nahakpu kouri. 29 Mahakna madu tarabada, thuna hougattuna Ibungogi maphamda chatlammi. 30 (Jesusdi khunda lengsillaktri, adubu Marthana Ibungobu oknaba mapham aduda leirammi.) 31 Maryga loinana imungda leiminnaduna, mahakpu themjinbiriba Jewssingna mahakna thuna hougattuna chenthokkhiba ubada, mahakna kaplunanaba mongpham tanna chellibani haina ningduna, matung innare.
32 Maram aduna Maryna Jesus leiba mapham aduda laktuna, Ibungobu urabada, Ibungogi khuyada tuthajaduna haijei, Prabhu, Ibungona asida leibiramlabadi, ipuwa siramloidabani.
33 Maram aduna Jesusna mahakna kappa amasung mahakka loinaba Jewssingna kappa urabada, Ibungogi thawai sokle, 34 Amasung Ibungona langtaknaraduna hai, nakhoina mahakpu kadaida thambano?, Makhoina Ibungoda hai, Prabhu, lengbiraktuna yengbiyu. 35 Jesus kaple. 36 Maram aduna Jewssingna hai, yengu, mahakna Lazarasbu kayamuk nungsiba!
37 Touigumsung makhoi kharana hai, mamit tanglamba adugi mit phahanbikhiba mi asina mi asisu sidananaba touba ngamloidra?
38 Maram aduna Jesusna amuk thawai sokladuna mongpham tanna lenglak-i, aduga mongpham adu chingnunghut oirammi, amasung madugi mamaida nung ama thamlammi. 39 Jesusna hai, nung adu louthokkho, asiba adugi machem Martha aduna Ibungoda hai, Prabhu, matam asida hakchang adu namthiragani, maramdi mahak marini sukhre.
40 Jesusna mangonda hai, nangna thajarabadi, Ishorgi matik mangal ujagani haina eina nangonda haidra?
41 Maduda makhoina nung adu louthokle, aduga Jesusna mit yengkhattuna haijei, Ipa, nahakna eigi haijaba tabire haiduna eina nahakpu thagatchei. 42 Amasung nahakna matam leiba khibikta eigi haijaba tabi haiba eina khangjare, Touigumsung nahakna eibu thabire haiba koina lepliba miyam mina thajananaba, eina makhoigi damak haibani.
43 Amasung Ibungona wa asi hairaga, khonjel laona hairak-i, Lazaras, thoklak-u. 44 Asiba aduna makhong makhut phina punduna thoklakle, aduga mahakki mamai khudeina pullammi, Jesusna makhoida hai, yetsillaba adu louthoku aduga mahakpu chathallu.
45 Marygi manakta lakhiba Jewssing mayamna Jesusna toukhiba adu ukhri, aduga mahakpu thajakhi, 46 Touigumsung makhoigi maraktagi kharanadi Pharisising tanna chatkhiduna Jesusna toukhiba adu tamlure.
Athoiba purohitsingna Jesusbu hatnabagi khujin thourang
( Matthew 26.1-5; Mark 14.1,2; Luke 22.1,2 )
47 Maram aduna athoiba purohitsingna amasung pharisisingna ahallup khomduna hai, eikhoina kari touribano? maramdi mi asina ayamba khudam toui. 48 Eikhoina mahakpu mathanta asumna thadoklabadi, mi pumnamakna mangonda thajagani, aduga Romegi mishingna laktuna, eikhoigi lam amasung eikhoigi jati asi loukhragani.
49 Touigumsung makhoigi maraktagi kanagumba ama, chahi adugi purohitlen oiriba Caiaphasna makhoida hai, nakhoina karisu khangde, 50 Leibak amagi jati pumnamak mangdanaba mi amana jati pumnamakidamak sibiba asi eikhoidamak henna phai haiba nakhoina khangde. 51 Adubu wa asi mahakna mathantadagi haiba natte, adubu mahakna chahi adugi purohitlen oiba maramna Jesusna jati adugidamak sibigani haina mahakna wa takthokpa mi amagumna haikhi, 52 Aduga jat adugi damakta nattana, ichai chaithokkhiba Ishorgi machasingbu Ibungona ama oina khomsu khomjinbinanaba mahakna sibigani. 53 Maram aduna numit adudagi houna makhoina Ibungobu hatnanaba wa tannare.
54 Maram aduna Jesusna Jewssinggi marakta phongna amuk koiramde, Touigumsung Ibungona lamjao manakta leiba Ephraim kouba sahar amada chatlaga, aduda mahakki seboksingga leiminarami.
55 Amahiksung Jewssinggi aran-chakkhangba naksillammi, lepthompibagi aran-chakkhangbagimamangda, khundagi mi kayana Jerusalemda makhoi masamak senghanaba chatlammi. 56 Maram aduna makhoina Jesusbu thirammi, aduga makhoina Ishor ningnashangda asum laktuna amaga amaga ngangnarak-i, nakhoina kari khanbano? mahakna chakkhangbada lakloidrane?
57 Adubu athoiba purohitsing amasung pharisisingna asumna yathang pikhre, kanagumbana Jesus kadaida lei haiba khanglabadi, makhoina mahakpu phanaba mahakna pao pigadabani.