Luke 20

Jesusgi matikki maramda waahang

( Matthew 21.23-27; Mark 11.27-33 )

1 Nongma numit amada asum thoklare, Ebungngona Ningnashangda mishingbu tambiduna aphaba waapaao shaandoklingeida, athoiba purohit shing amasung shaastragi ojaashing ahallaman shingga loynanaa ebungngogi manaakta khanghoudana laaktuna,

2 Ebungngoda haayrei, eikhoyda haayyu, nangna natik kari leiduna hiram shing asi touribano? Amasung matik asi nangonda pibiba kanaano? 

3 Aduda Ebungngona makhoyda khumlak-e, 

"eisu nakhoyda waahang amaa hangge; aduga madu eingonda haayyu,

4 Johnna buptized touramba adu swargadagira, nattraga mishingdagira? "

5 Amasung makhoy masen khannarammi, eikhoyna swargadagini haayragadi manaa haaygani, adu oirabadi nakhoyna maabu karigi thaajadabage?

6 Touegumsung eikhoyna mishingdagini haayragadi, mi pumnamakna eikhoybu nungna thaagani; maramdi makhoyna Johnbu Eeshorgi waa taakthokpa amani haayna thaajei. 

7 Aduna makhoyna, kadaaydagino khangde, haayna khumle. 

8 Amasung Jesusna makhoyda haay, 

"kari etik leiduna eina hiram shing asi toubage haayba adu einasu nakhoyda haayroi."

Angur engkhon-gi paandam

( Matthew 21.33-46; Mark 12.1-12 )

9 Amasung Ebungngona mishingda paandam asi haayba houre: nipa amanaa angur engkhon amaa koiraga, akoyba mishingda madu shaandoklamduna, atoppa leibaak amada matam kuina chatkhre.

10 Amasung matam oirabada, akoyba mishingna angur engkhon-gi maheidagi maangonda pinanaba mahaakna minaai amaa makhoyda thaakhi; touegumsung akoyba mishingna maabu yeiraga khut haangna thaadokkhre.

11 Aduga mahaakna atoppa minaai amaa amuk thaakhi; madubu makhoyna yeiraga, laakchana touduna khut haangna thaadokkhre.

12 Amasung mahaakna ahumshuba amuk thaakhi; maasibusu makhoyna ehang naihang sahanduna langthokkhre. 

13 Maduda angur engkhon-gi mapu aduna haay, eina kari tougadage? Eina eigi echaa-nupaa nungshiraba adubu thage; makhoyna maabu ekaai-khumnaba yaai. 

14 Touegumsung akoyba mishing aduna mahaakpu ubada, makhoy amaga-amaga khannaduna haay, maasi yumlep-chaaraani; maagi phangpham thokpa adu eikhoygi oinanaba, eikhoyna maabu hatsi.

15 Maduda makhoyna mahaakpu angur engkhondagi langthoktuna haatle. Maram aduna angur engkhon-gi mapuna makhoyda kari tougadage?

16 Mahaakna laaktuna akoybashing asibu maanghallaga, angur engkhon adu atoppashingda pibigani. madu taabada makhoyna haay, adugum khak oidasanu. 

17 Touegumsung Ebungngona makhoyda yengladuna haay, adu oirabadi, yum shaabashingna channadaba nung adu, madumak chithekki mapi oihallammi, haayna ekhiba asi karino?

18 Nung adugi mathakta tuba khuding adu machet machet kaaygani, touegumsung masina mathakta taaba kanaagumba adu uphungumna toigani.

Loipot haabagi amasung atei ateigi marida waahang

( Matthew 22.15-22; Mark 12.13-17 )

19 Maduda shaastragi, ojaashing amasung athoiba purohit shingna pungja adumaktada ebungngobu khut-phang-nana phaage haayna thire, aduga makhoyna mishingbu kire; maramdi Ebungngona makhoygi mathakta paandam asi ngaangbani haayba makhoyna khangle.

20 Amasung makhoyna ebungngobu lumduna ebungngogi waangaangda phaaduna , leibaak ngaakpa mapugi laakpagi paanggal amasung waayel thouda ngamba aduda ebungngobu pithoknanaba, mashaana dharma chenba saashinnaba mikup nahum yengbashingbu thaare.

21 Amasung makhoyna ebungngoda hanglak-e, oja, ebungngo nahaakna chumna tambi, taakpi, mishak mimaay yengde, touegumsung Eeshorgi lambi chumna taakpi haayba eikhoyna khang-e. 22 Caesarda loipot thiba waayel kaaybra kaidabra? 

23 Touegumsung Ebungngona makhoygi marei mara adu khangladuna makhoyda haayrak-e,

24 Eingonda denari amaa utlu. Kanaagi makok amasung maming leibage? makhoyna haay, Caesargi. 

25 Maduda Ebungngona makhoyda haayrak-e, adu oirabadi, Caesargi oiba adu Caesarda, aduga Eeshorgi oiba adu Eeshorda katlu.

26 Amasung makhoyna mishinggi mamaangda ebungngogi waahei aduda phaaba ngamdre; aduga makhoyna ebungngogi paaoukhum aduda engak ngakladuna tuminna leire.

27 Amasung hinggatpa haayba asi leite haayriba shaadukishing kharana laaktuna ebungngoda hanglammi,

28 oja, Mosesna eikhoygidamak ebirammi, kanaagumbagi machin mango amanaa nupi louraga, machaa leitana mahaak shirabadi,mahaakki machin manaaona maagi nupi adubu louduna, machin manaao adugi damak dhaara thaamlamgadabani. 

29 phaare, machin manaao taret leirammi; aduga ahal aduna nupi louraga, machaa leitana shire: 30 Anishubanasu ahumshubanasu nupi adubu loure;

31 Adugumduna taretmak machaa thaamlam-dana sikhre.

32 Akonbada nupi adusu shire.

33 Maram aduna hinggatlakpa aduda nupi adu makhoygi marakta kanaagi nupi oigadage? maramdi taret aduna mahaakpu lourammi. 

34 Maduda Jesusna makhoyda haay, 

taaibang paanba asigi machaashingna luhongi amasung makhoybu luhongduna pi;

35 Touegumsung taaibang paanba adu amasung ashibadagi hinggatpa adubu phangnanaba matik chaana shingthaanakhraba makhoyna luhongde amasung makhoybu luhongduna pide.

36 Maramdi makhoy amuk shiba ngamde, maramdi makhoydi swargadut shingga mannei; amasung hinggatlakpa adugi machaashing oibanina, makhoy Eeshorgi machaashing oire. 

37 Touegumsung Mosesnasu Eeshorbu Abraham Eeshor, Isaac Eeshor amasung Jameski Eeshor kouba matamda, ashibashing hinggatlaakpani haayna manaa pungba mongsonggi waarida mahaakmakna phongdokkhre.

38 Aduna ebungngo mahaakti ashibashinggi Eeshor natte, touegumsung ahingbashinggini; maramdi ebungngo mahaakki mityengda pumnamak hingi. 

39 Maduda shaastragi oja kharana khumlak-e, oja, Ebungngona phajanaa haayre.

40 Maramdi makhoyna amuk haanna ebungngoda echang thouna waahang karisu hangkhidre.

41 Amasung Ebungngona makhoyda haay, Christa adu Davidki machaanupani haayba makhoyna karamna haaybano?

42 Maramdi David mashaamakna esheigi laairikta haay, Eeshorna eigi Eeshorda haay,

43 Eina nanggi yeknabashingbu nakhonggi khongnet oihandriba phaaoba eigi yetta phammu'.

44 Maram aduna Davidna mahaakpu Eeshor kouwi, aduga mahaakna mahaakki machaanupa

karamna oiribano?

45 Adugi matungda mi pumnamakna taaringeida, Ebungngona sebokshingda haay, 

46 Achonba phi settuna koiningba, aduga miyaam tinnabada khurumhanbasu, loysang loysangda amasung chaakkhaangbada makok phambasu paamba,

47 Lukhraabi-shinggi yum-kei munthokpa, aduga toushinnaduna kuina haayjaba shaastragi ojaashinggi maramda saajel tou. Makhoy asina henna chaaoba maraal phanggani.