1 Peter 4
Pap thadokpa
4 Maram aduna Christana hakchangda awa khangbikhibanina nakhoi nasensu puk ning aduga mannana lan phijetkum setlu; Maramdi hakchangda awa khangkhraba mi aduna paptagi thadokpa phangle; 2 Aduna nakhoina nakhoigi leihouriba punsi adu miobagi apaiba matung inna houjik amuk hingdaduna, Ishorgi ningba matung inna hingnanabani. 3 Maramdi apaiba, hakchanggi apamba, yungaoba, lamchat haptaba, yuchoiba, amasung tukkachaba lai latpa pumnamak asida nakhoina chatlamduna, atoppa jatsinggi apamba adu tounabagi damak houkhraba matam aduna okle. 4 Thabak asi makheida nakhoina makhoiga loinana choithokna panbagi adugumba hakmanba aduda chatminnadaba asi angakpani haina makhoiga ningduna thina ngangnei. 5 Makhoi asina hinglibasingbusu sikhibasingbusu wayelnanaba thourang langlaba Ibungoda maram pigadabani. 6 Maramdi asigi damak sikhibasingbu miobagi matung inna hakchangda wayelnanaba, adubu Ishorgi matung inna thawaida hingnanaba, makhoidasu aphaba wapao sandokpikhi.
7 Touigumsung pumnamakki aromba nakle; maram, aduna nakhoi pukning achumba oiyu, aduga haijanabagidamak pukning laksillu.
8 Hiram pumnamaktagi athoibadi nakhoi nasen-gi marakta nungsinabada pukning changu; maramdi nungsibana pap ayamba kuppi.
9 Murum murum sondaduna amaga amaga pija pithak phanou.
10 Mi amamamna khudon phangbagi matung inna, nakhoi nasen-gi marakta Ishorgi makhal makha ayamba thoujalgi aphaba dewansinggumna madu thougan tounou: 11 Kanagumba mina nganglabadi, Ishorgi paotak oibagumna ngangsanu; kanagumba mina thougan tourabadi, iswama pinabiba panggaldagi thougan tousanu; aduna maram pumnamakta Ishorbu Jesus Christagi mapanna thagat nanabani. Ibungoda lomba naidaba matik mangal amasung panggal lei. Amen.
Christagi damak awa khangba
12 Achanbasa, nakhoibu chang yengnanaba nakhoigi nathakta lakliba meichak aduda, karigumba angakpa thabak nakhoida thokpani haiduna ngakkanu. 13 Touigumsung Christagi matik mangal phongdokpa matamda nakhoina thoidok hendokna nungaina haraonanaba, Christagi awa anang khangbagi saruk phangminnaba nakhoi adupki matik haraojou. 14 Nakhoibu Christagi minggi damak cheirabadi, yaiphabani; maramdi matik mangalgi thawaina amasung Ishorgi thawaina nakhoigi nathakta leibani. 15 Maramdi nakhoi kana amatana mihatpa mi, huranba mi, phattaba touba mi, nattraga mi ateigi wada yaoganba mi oina awa khangdasanu; 16 Adubu Christian oina awa khanglabadi, mahakna ikai daduna ming asida Ishorbu thagat sanu. 17 Maramdi Ishorgi yumda wayelba adu houba matam lakle, aduga madu eikhoidagi hanna hourabadi, Ishorgi aphaba wapao indabasinggi aromba adu kari oigadage?
18 Amasung dharmachenbabu wana kanbirabadi, Ishor ningdaba amasung papchenba midi kadaida leigadage?
19 Aduna Ishorgi ningba matung inna awa khangbasingnasu thajaba yaba sembi ba mapugi maphamda aphaba thabak touduna makhoigi thawai sinnajasanu.