Matthew 10
Sebok taraanithoi amasung makhoybu thaaba
( Mark 3.13-19; Luke 6.12-16; Mark 6.7-13; Luke 9.1-6 )
1 Amasung Ebungngona , mahaakki sebok taraanithoi adubu kouraduna, shengdaba thawaay shingbu taanthoknaba, aduga laaina pumnamakpu amasung ashol-ana pumnamakpu phahannaba matik Ebungngona makhoyda pibirammi.
2 Paakhon-chatpa taraanithoi adugi mamingdi asini: ahaanbada Peter kouba Simon, amasung mahaakki manaao Andrew; Zebedeegi machaanupa James, amasung mahaakki manaao John;
3 Philip amasung Bartholomew; Thomas amasung khaajana louba Matthew; Alphaeusgi machaanupa James, amasung Thaddaeus;
4 Cannan-gi Simon, amasung yeknabagi makhutta ebungngobu pithokpa Judas Iscariot,
5 Taraanithoi asibu Jesusna yaathang piduna shinnaraga thaakhre, madudi, atoppa Jaatshinggi lambida chatluganu, amasung, Samariashinggi karigumba saaharda changannu,
6 Touegumsung Israelgi emunggi maangkhraba yaaoshingda chatlu,
7 Amasung nakhoyna chatpada, swargagi Leibaak adu naksillakle haayduna shaandok-u.
8 Anaabashingbu phahallu, ashibashingbu hinggathallu, kusthi thungbashingbu shenghallu, bhut shingbu taanthoku. Nakhoyna lemna phangjare, lemna pinou.
9 Nakhoygi sen-gaaoda sanaa oirabusu, silver oirabasu, senkhaay oirabasu puganu;
10 Amasung lambigi damak paaitukhao, phurit ani khugraang natraga cheishu laangganu; maramdi thabak shubaa mina maagi chinjaak phangba matik chaay.
11 Amasung karigumba saaharda oirabasu, khunda oirabasu, nakhoyna changlaga maduda kanaa matik chaabage munna thiyu, amasung nakhoyna chatthoktriba phaaoba aduda leiyu.
12 Amasung nahoina yum aduda changbada madubu khurummu.
13 Amasung yum aduna matik chaarabadi, nakhoygi tapthaba adu yum adugi mathakta laaksanu; touegumsung yum aduna matik chaadrabadi, nakhoygi tapthaba adu nakhoyda hallaksanu.
14 Amasung kanaagumbana nakhoybu loushinbidrabadi nattraga nakhoygi waa adu taabidrabadi, yum adudagi nattraga saahar adudagi chatthokpada, nakhoygi khuyaagi uphun kanthok-lammu.
15 Eina nakhoyda thaanggei shengna hayribani, waayen-gi numitta saahar adudagi Sodom amasung Gomora leibaakna henna shaaphagani.
16 Yeng-u, keisaalgi marakta eina yaaogumna nakhoybu thaaribani; maram aduna nakhoyna lin-gumna shing-u, amasung lamkhunugumna pukchel ting-u,
17 Touegumsung mishinggi damak saajel tou; maramdi makhoyna nakhoybu ahallupshingda pithokkani, amasung makhoygi loysang loysangda nakhoybu thina phugani;
18 Aduga makhoyda amasung atoppa Jaatshingda saakhi pinanaba leibaak ngaakpashing amasung ningthoushing phaaoba eigidamak nakhoybu pukatkani.
19 Touegumsung makhoyna nakhoybu pithoklaba matamda karamna natraga kari haaygani haayna laangtak-naganu; maramdi kari ngaanggadage haayba adu pung aduda nakhoyda pibigani;
20 Maramdi ngaangliba adu nakhoyna natte, touegumsung nakhoygi napuknungda napaagi thawaayna ngaanglibani.
21 Amasung machin manaaona machin manaaobu amasung mapaana machaabu shinanaba pithokkani; amasung machaashingna mamaa-mapaagi mathakta houraktuna makhoybu haathan-gani.
22 Aduga eigi eminggi damak mi pumnamakna nakhoybu tukkachagani; touegumsung aroiba phaaoba khaangba mahaak adubu kanbigani.
23 Touegumsung makhoyna nakhoybu saahar asida ot-neirabada, atoppa amada chellu; maramdi eina nakhoyda thaanggei shengna haayribani, migi machaanupa aduna laaktriba phaaoba nakhoyna Israelgi saahar pumnamak thunglamloi.
24 Sebokna maagi ojaagi mathak natte, aduga minaaina mapugi mathak natte,
25 Sebokna maagi ojaagumlaga aduga minaaina mapugumlaga oirakle. Makhoyna yumgi mapubu Beelzebul kourabadi, maagi yum aduda leiribashingbu kayaamuk henna thina kougaba! 26 Maram aduna makhoybu kiganu; maramdi phongdok-loidaba kupshinba karisu leite, aduga khangloidaba arotpa karisu leite.
27 Eina nakhoyda amaambada haayba adu nakhoyna angaanbada ngaang-u, aduga nakhoyna nanaakongda taaba adu yumthak kaaduna laaothok-u.
28 Amasung hakchaangbu haatlaga thawaaybu haatpa ngamdaba makhoybu kiganu; touegumsung thawaay hakchaang animakpu norokta maanghanba ngamba ebungngo mahaakpu thoina kiyu.
29 Sendaang anida peisa ama-gidamak yondra? amasung makhoygi maraktagi amatasu nakhoygi napaa nattanadi leibaakta taaroi.
30 Amasung nakokki sham pumnamak adu phaaoba mashing thirabani.
31 Maram aduna kiganu; nakhoydi sendaang mayaamdagi mamal helli.
32 Maram aduna mishinggi mamaangda eibu yaaba mi khudingmakpu einasu swargada leiba eigi epaagi mamaangda mahaakpu yabigani.
33 Touegumsung mishinggi mamaangda eibu yaadaba kanaagumba adubu einasu swargada leiba eigi epaagi mamaangda yaabiroi.
34 Eina prithibida engthaba piba laakpani haayna khan-ganu; ei engthaba piba laakpa natte, touegumsung thaangshaang piba laakpani.
35 Maramdi mi amaaga mapaaga, machaanupiga mamaaga, amasung mamouga manembokka yaanahandanaba ei laakpani;
36 Amasung migi yeknabadi mahaakki manunggi mishingni.
37 Mapaa nattraga mamaabu eingondagi henna nungshiba mahaak adu eigini haayba matik chaade; aduga machaanupa natraga nupibu eingondagi henna nungshiba mahaak adu eigini haayba matik chaade.
38 Amasung maagi cross puduna eigi etung eellaktaba mahaak adu eigini haayba matik chaade.
39 Mathawaay kanjaraba mahaak aduna madu maanghan-gani; aduga eigi maramgidamak mathawaay maanghallaba mahaak aduna madu kanjagani.
40 Nakhoybu loushinba mahaak aduna eibu loushinbani, aduga eibu loushinba mahaak aduna eibu thaarakpa ebungngo mahaakpu loushinbani.
41 Eeshorgi waa taakthokpa amabu Eeshorgi waa taakthokpani haayna loushinba mahaak aduna Eeshorgi waa taakthokpa amagi manaa phangjagani; aduga dharma chenba amabu dharma chenbani haayna loushinba mahaak aduna dharma chenba amagi manaa phangjagani.
42 Amasung apikpashing asigi maraktagi amada sebokni haayna kanaagumbana eeshing aingba tenggot amatang thaaknaba pibirabadi, eina nakhoyda thaanggei shengna haayribani, mahaakki manaa adu khak maangloi.