Mark 5
Sengdaba thawaay changba Gerasenesgi mi amabu phahan-biba
( Matthew 8.28-34; Luke 8.26-39 )
5 Amasung makhoyna Gerasenesgi lam samudra waangmada laakle. 2 adugaa ebungngona hidagi lengthoklakpada sengdaba thawaay changba mi amanaa mang maraktagi thoklaktuna ebungngo-ga hek oknare. 3 maagi leiphamdi mang marakta leirammi; adugaa houjikti kana amatana maabu yothing phalangsu punba ngamkhidre; 4 maramdi maabu haanna hanna hang challaga amasung yot-hing-phalaangna pullaga, manaa yot-hing phalaang adu thadatli, adugaa hang adu matek matek thudek-e, amasung kanaanasu maabu tehanba ngamde. 5 Matam leiba khibikta ahing nungthil manaa mang marakta amasung chingnungda koirao laaoduna, masa mathantabu nungna sudat-charammi. 6 Amasung manaa Jesus-bu athaap-padagi ujabada chel-laaktuna ebungngobu khurumjare. 7 adugaa awaangba khonjenna laaothoktuna haayjei, he ehen henba Eesor-gi machaa nupaa Jesus, nangga eigaa kari thoknaba leibage? Eesor sonduna eina ebungngobu haayjei, eibu waahanbiganu. 8 maramdi ebungngona maangonda haayrammi, sengdaba thawaay nang, mi adudagi thokkhro. 9 adugaa ebungngona maabu hangle, naming karino? maaduda manaa ebungngo-da haay, emingdi mayaam kou-e; maramdi eikhoy yaammi. 10 Amasung makhoybu lam adudagi thaadok-pidananaba manaa ebungngo-da yaamna nonjei. 11 adugaa mapham aduda chingyada ok sanggu achouba amaa chaaduna leirammi. 12 Amasung, eikhoyna oksing aduda changnanaba eikhoybu thabiyu, haayduna makhoyna ebungngo-da nonjarak-e. 13 adugaa ebungngona makhoybu yaabire, Amasung sengdaba thawaay sing aduna thoklaktuna oksing aduda changlaga, ok 200 romgi sanggu aduna, angamba adudagi samudrada hot-thaaduna, samudrada lakhatkhre. 14 Amasung makhoybu sellambasing aduna, chenkhiduna sahar aduda amasung khun khunda tamlure, adugaa kari thok-khibano makhoyna yengnanaba laakle. 15 Amasung makhoyna Jesus-da laaklaga, bhutna puba, haaybadi bhut mayaamna changlamba mahaak aduna phisu settuna pukningsu achumba oiduna phamlamba adu ubada kire. 16 adugaa bhutna puramba mahaak aduda asi karamna thok-khiba amasung ok adugi maramda ukhibasingna makhoyda libire. 17 maaduda makhoygi lam adudagi lengthok-khinanaba makhoyna ebungngo-da haayjaba houre. 18 Amasung ebungngona hida lengsil-lakpada, bhutna puramba mahaak aduna ebungngo-ga loinajage haayduna ebungngo-da nonjarammi. 19 adugaa mahaakpu ebungngona yabide, touegumsung maangonda haay, nayumda chat-tuna Eesor-na nanggidamak kayaa chaaoba thabak toubikhiba amasung nathakta kayaa nungsibiba adu nanggi misingda tamlu. 20 Amasung mahaakna chatkhiduna, Jesus-na mahaak-kidamak kayaa chaaoba thabak toubikhiba adu Decapolisda saandokpa houre; adugaa mi pumnamakna engak ngaklammi.
Jairusgi machaanupibu hinggatpiba amasung ee tabi nupi amabu phahan-biba
( Matthew 9.18-26; Luke 8.40-56 )
21 Amasung Jesus-na hida amuk waangma laanthok-khibada, miyaam yaamna ebungngo-gi maphamda tille; amasung ebungngona samudra mapaanda leirammi. 22 Amasung loisanggi waayel thoudaaba mapusinggi Jairus kouba mi amaa lak-e, adugaa ebungngobu ubada, ebungngo-gi khuyaada tuthajare, 23 Amasung mahaakna yaamna nonjana haayjei, eigi echaa nupi apisaak sigadoure; mahaak phaaduna hingnanaba ebungngona lengbiraktuna mahaakki mathakta ebungngo-gi khut thambiyu. 24 adugaa ebungngona mahaakka loynanaa lengkhre; amasung miyaam yaamna ebungngo-gi tung enkhiduna ebungngobu omsillammi.
25 Amasung chahi taraanithoi ee taaduna naarabi nupi amaa leirammi; 26 manaa ayaamba maaibasingdagi awaaba yaamna khaangduna, maagi leijabamakhei tinglabasu karisu kaannaba phangdana, henjin henjinna narammi; nupi asina Jesus-gi maram tajaraduna, 27 miyaamgi marakta ebungngo-gi tunglomda laaklaga ebungngo-gi phi sokle. 28 maramdi, eina ebungngo-gi ennaphi aduta sokchaarabadi, ei pumpha phagani haayna mahaakna haayrak-e. 29 Amasung khudak adumaktada mahaakki eegi eephut adu kangkhre; adugaa mahaakna mahaakki phattaba laayna adudagi phaare haayba masaada khangjare. 30 adugaa khudak adumaktada Jesus-na masaadagi matik thokkhre haayba ebungngo mathantamakna sengna khngjaraduna, miyaamda onthoklaktuna haayrak-e, kanaana eigi ennaphi sokkhibage? 31 maaduda sebok-singna ebungngo-da haayrak-e, miyaamna ebungngobu omsillaba ebungngona uduna, eibu kanaana sokkhibage haaybiribra? 32 Amasung ebungngona asi toukhibi adubu unanaba koyyeng yenglammi 33 touegumsung nupi aduna masaada thok-khiba adu khanglabada, kibana tanik tanikna laakladuna, ebungngo-gi maangda tuthajare, amasung achumba pumnamak ebungngo-da tamjare. 34 adugaa ebungngona maangonda haay, echaa nupi, nanggi thaajabana nangbu phahanbire; engthana chatchakhro, amasung nanggi phattaba laayna adudagi pumpha phaaba oijaro.
35 ebungngona ngaanglingei maktada loisanggi waayel thoudaaba mapu adugi yumdagi makhoyna laaktuna haayrei, nahaakki nachaa nupi sire, Nangna ojaabu karigi amuk waahallibano? 36 touegumsung ngaangliba waa adu taasannadana Jesus-na loisanggi waayel thoudaaba mapu aduda haay, kiganu, thaada thaajou. 37 Amasung Peter, James amasung Jameski manaao John nattana ebungngona kana amatabu ebungngo-ga loynanaa tung ennaba yabidre. 38 adugaa makhoyna loisanggi waayel thoudaaba mapugi yumda thunglabada, ebungngona enin ninba, adugaa kapliba amasung yaamna tengthaariba-singbu yeng-e. 39 Amasung ebungngona lengsil-lakpada makhoyda haay, nakhoyna karigi enin nillibage amasung kaplibage? angaangdi side tumlibani. 40 Amasung makhoyna ebungngobu usittana noknei, adubu ebungngona makhoy pumnamakpu taanthoklaga, angaanggi mapaa mamaa amasung ebungngo-ga loynaba singbu puduna, angaang adu leiba maphamda lengsil-le. 41 adugaa ebungngona angaang adugi makhut paaykhattuna maangonda haay, Talitha kumi; waa asi handokpada asini, ebemma, eina nangonda haayri, hougat-lu. 42 Amasung khudak adumaktada nupi machaa aduna hougattuna koychat chatle; maramdi mahaak chahi taraanithoi surabini, Amasung khudak aduda makhoyna yaamna engak ngakle. 43 adugaa kana amatanasu asi khangdananaba ebungngona makhoyda yaamna kanna sinnare, Amasung maangonda chaanaba piyu haayduna ebungngona yaathang pire.