Matthew 6
Lonna Dan touba (nungshiba)
1 Mishinggi mamaangda makhoyna unanaba nakhoygi dharma chenba thabak toudanaba pukning chang-u; adu nattrabadi swargada leiba nakhoygi napaagi maphamda nakhoygi manaa leite.
2 Maram aduna mishinggi thaagatpa phangnanaba Apha shaajaningbashingna loysangda amasung lambida toubagumna, nangna Dan touba matamda namaangda pungjao thin-ganu. Eina nakhoyda thaanggei shengna haayribani, makhoyna makhoygi manaa loina phangkhre.
3 Touegumsung nanggi Dan adu aronba oinanaba, nangna Dan touba matamda nanggi yet-thangba nakhutna touba adu nanggi oi-thangba nakhutna khangdasanu;
4 Amasung lonna uriba nanggi napaana nangonda hanbirakkani.
Lonna haayjaba
( Luke 11.2-4 )
5 Amasung nakhoyna haayjaba matamda Apha shaajaningbashingum oiganu; maramdi makhoybu mishingna unanaba, loysangda amasung lamjaaogi chithekta leptuna haayjaba paammi. Eina nakhoyda thaanggei shengna haayribani, makhoyna makhoygi manaa loina phangkhre.
6 Touegumsung nangdi haayjaba matamda nanggi achikpa kaada changjaduna, nanggi thong thingjillaga, lonna leiba nanggi napaada haayjou; amasung lonna uriba nanggi napaana nangonda hanbirakkani.
7 Amasung haayjaba matamda atoppa Jaatshinggumna arembada hanjin hanjinna haayjaganu; maramdi makhoygi yaamna ngaangba aduda makhoybu taabigani haayna makhoyna ning-e.
8 Maram aduna makhoygum oiganu, maramdi nakhoyna nijadringeida nakhoygi awaatpa leiba adu napaana khangbi.
Eeshorgi haayjaba
9 Maram aduna matou asumna haayjou: Swargada leiba eikhoygi epa, ebungngo nahaakki ming, ashengba oisanu.
10 Nahaakki leibaak laaksanu, swargada nahaakna ningba toubagumna taaibang-paanda oisanu.
11 Eikhoigi nongmagi oknaba chinjaak ngasi pibiyu.
12 Aduga eikhoynasu eikhoygi laman tonbashingbu kokpirabagumna eikhoygi laman kokpiyyu.
13 Amasung eikhoybu athembada chingsinbiganu, touegumsung phattaba adudagi eikhoybu kanbiyu. Maramdi ningthou leibaak, paanggal amasung matik mangaan loyba naaidana nahaakkini. Amen.
14 Maramdi nakhoyna mishinggi ayol-araan kokpirabadi nakhoygi swargagi napaana nakhoybusu kokpigani.
15 Touegumsung nakhoyna mishinggi ayol-araan kokpidrabadi, nakhoygi napaanasu nakhoygi ayol-araan kokpiroi.
Chara henba
16 Aduga nakhoyna chara henba matamda apha-saajaningba-shinggumna awaa-maaithong utkanu, maramdi makhoyna chara helli haayba mishingna unanaba makhoyna maaythong maksilhalli. Eina nakhoyda thaanggei shengna haayribani, makhoyna makhoygi manaa loina phangkhre.
17 Touegumsung nangdi chara henba matamda nakhoyna chara helli haayba mishingda uhandana, lonna leiriba nanggi napaana unanaba, nakokta thaao teisellu, namai tathoku;
18 Amasung lonna uriba nanggi napaana nangonda hanbirakkani.
Achumba lal; angaanba amasung amaamba
( Luke 12.33,34; Luke 11.34-36; Luke 16.13 )
19 Tin-kaang amasung kolhingna maanghanba aduga huraanbashingna sagul touduna huba prithibi asida nakhoygi damak lan peisin-ganu;
20 Touegumsung tin-kaang amasung kolhingna manghandraba aduga huraanbashingna sagul touduna hurandraba swargada nakhoygi damak lan peisinjou.
21 Maramdi nanggi lan leiba mapham aduda nanggi pukningsu leigani.
22 Hakchaanggi thaaoumeidi mitni. Maram aduna nanggi mitpham chumlabadi, nanggi hakchaang apumbaa yaamna ngaangani;
23 Touegumsung nanggi mitpham chumdrabadi, nanggi hakchaang apumbaa yaamna mamgani. Maram aduna nangonda leiba mangaan aduna mamlabadi, amaamba adu kayaada mamkhrabano?
24 Kanaanasu mapu anigi minaai oiba ngamde; maramdi amabu tukkacharaga amabu nungshigani, nattraga amagidamak leplaga amabu thouoiroi. Nakhoyna Eeshor amasung langi minaai oiba ngamde.
Laangtaknaba amasung Eeshorda thaajaba
( Luke 12.22-31 )
25 Maram asina eina nakhoyda haayribani, nakhoyna hingnabagi damak kari chaagani, kari thakkani aduga nakhoygi hakchaanggidamak kari setkadage haayna laangtak-naganu. Thawaayna chinjaaktagi amasung hakchaangna phijettagi hendra?
26 Atiyagi uchekshingbu yeng-u; makhoyna hunsu hunde, khaaosu khaode, aduga kottasu peisinde; amasung nakhoygi swargagi napaana makhoybu pijabi. Nakhoydi makhoydagi thoidok hendokpa nattra?
27 Aduga nakhoy kanaana laangtaknaduna maagi punsi aduda mikup amaa hen-gathanba ngambra?
28 Aduga phijetkidamak karigi laangtaknabano? Loubukki tharoshingna karamna houbage munna waakhal tou; makhoyna nomsu nomde, langsu naaide;
29 Adubu eina nakhoyda haayribani, Solomonmaknasu maagi matik mangaan pumnamakta makhoy asigi maraktagi amagumna phijet leitengkhide.
30 Touegumsung ngasi leiriba hayengdi leirangda thajingadaba loubukki naapi adubu Eeshorna asup ningthijana thonbirabadi, he thaajaphaattabasa, Ebungngona nakhoybu thoidok hendokna phi tholloidra?
31 Maram aduna eikhoyna kari chaagani, kari thakkani, nattraga, kari set-eengani haayduna nakhoyna laangtak-naganu.
32 Maramdi atoppa Jaatshingna pot pumnamak asi thi. Maramdi nakhoygi swargagi napaana pot pumnamak asi nakhoyda kaannei haayba khangbi.
33 Touegumsung nakhoyna ahaanbada ebungngo mahaakki leibaak amasung ebungngo mahaakki achumba adubu thiyu, aduga pot pumnamak asi nakhoyda haapchinbigani.
34 Maram asina Hayenggidamak laangtak-naganu, maramdi hayenggidi hayeng mashaana adummak laangtaknajagani. Nongmagi waaruba aduna nongma adugi matik chaare.