Matthew 25

Luhongba yaaobi leishaabi taraagi paandam

1 Matam aduda swarga leibaak adu makhoy makhoygi thaaoumei paayduna bor oknaba chatthoklakpi leishaabi taraagum oigani.

2 Aduga makhoy mangaadi apang-bi oirammi, amasung mangaadi ashingbi oirammi.

3 Maramdi apang-bishing adudi makhoygi thaaoumei paaybada, makhoyga loynanaa thaaodi puramde;

4 Touegumsung ashingbishing adudi makhoygi thaaoumeiga loynanaa haapnaba potta thaao purammi.

5 Aduga bor aduna thillaklingeida, makhoy pumnamak uirammi amasung tumthakhirammi.

6 Touegumsung ahing nongyaaida laaorak-e, yeng-u, borsi! nakhoy oknaba thokrakro.

7 Matam aduda leishaabishing aduna hougattuna makhoygi thaaoumei shemle.

8 Amasung apang-bishing aduna ashingbishing aduda haay, nakhoygi thaao adudagi eikhoyda khara pinabiyu, maramdi eikhoygi thaaoumei muttharakle.

9 Touegumsung ashingbishingna khumlak-e, eikhoygidamaksu nakhoygi damaksu oknadaba yaai; nakhoyna ayonbashingda chattuna, nakhoy nashen-gi damak leibiruro.

10 Amasung makhoyna leigadabagi chatkhringeida bor adu laakle, aduga thouraang loirambishing aduna mahaakka loynanaa luhongbagi chaakkhaangbada changkhre; amasung thong thingkhre.

11 Matung aduda atei leishaabishing adusu laaktuna haayrak-e, Eeshor, Eeshor, eikhoyda thong haangdokpiyu.

12 Touegumsung Ebungngona khumlak-e, eina nakhoyda thaanggei shengna haayribani, eina nakhoybu khangde.

13 Maram aduna mitsheng khaang-u, maramdi nakhoyna numit adusu pungja adusu khangde.

Talentgi paandam

( Luke 19.11-27 )

14 Maramdi maasidi mi amanaa atoppa leibaak amada chatlamdaaida, mahaak makki minaaishingbu kouduna mahaakki laal makhei makhoyda shinnaramba mi amagumbani;

15 Aduga mahaakna amada talent manga, atei amada ani amasung atei amada amaa, maagi maagi ngamjabagi matung ennaa makhoy khudingmakta pibiramlaga, mahaak langphei chatkhre.

16 Khudak adumaktada talent mangaa phangba aduna chatkhiduna maduna lalonnarubada, atoppa talent mangaa tongjare.

17 Matou adugumna talent ani phangba mi aduna talent ani tongjare

18 Touegumsung talent amaa phangba aduna chatkhiduna leibaakta touraga, maagi mabungngogi shel adu lotle.

19 Amasung matam kuiraklabada minaaishing adugi mabungngona laaktuna makhoyga loynanaa chaagaa-chaading paanarare.

20 Aduga talent mangaa phangba aduna changsillaaktuna, atoppa talent mangaa puraktuna haayrei, Ebungngona eingonda talent mangaa pibirammi; yengbiyu, eina atoppa talent mangaa tongjare.

21 Maagi mabungngona minaaiduda khumkhi, yaamna phaare, aphaba amasung thaajaba yaaba minaai, nangdi pot khajiktagi mathakta thaajaba yabana eina nangbu pot ayaambagi mathakta pannahan-gani; nabungngogi haraaobada changjaro.

22 Talent ani phangba adunasu changsillaaktuna haayrak-e, Ebungngona eingonda talent ani pibirammi, yengbiyu, eina atoppa talent ani tongjare.

23 Maagi mabungngona maangonda haayrak-e, yaamna phaare, aphaba amasung thaajaba yaaba minaai, nangdi pot khajiktagi mathakta thaajaba yabana, eina nangbu pot ayaambagi mathakta pannahan-gani; nabungngogi haraaobada changjaro.

24 Amasung talent amaa phangba adunasu changsillaaktuna haayrei, Ebungngona hunkhidaba aduda khaaoba, aduga chaaithokkhidaba aduda khomjinba, nunganba mini haayna eina khang-jarammi;

25 Aduna eina kijaduna chatthokcharaklaga, ebungngogi talent adu leibaak manungda lotchei; yengbiyu, ebungngogi oibadu asini.

26 Touegumsung maagi mabungngona khumduna maangonda haayrak-e, phattaba amasung atanba minaai, eina hunkhidaba aduda eina khaaoi, amasung eina chaaithokkhidaba aduda khomjilli haayba nangdi khanglamlaboire!

27 Adu oiramlabadi, nangna eigi shel adu shel onbashingda piramgadabani, aduga eina laakpada eigi oiba adu sendoiga loynanaa eina amuk phanglamgadabani.

28 Maram aduna maangondagi talent adu louthoktuna talent taraa leiba mahaak aduda piyu.

29 Maramdi areiba mi khudingda pigani, aduga maagi ayaamba oigani; touegumsung leitba mahaak adudagi maagi leijariba adu phaaoba louthokkani.

30 Aduga kannadaba minaai adu mapaan-gi amaambada langthok-u; mapham aduda kappa amasung maya kraakkraak chikpa oigani.

Waayen-gi numit

31 Touegumsung migi machaanupa aduna matik mangaanga amasung swarga dut pumnamakka loynanaa laakpa matam aduda, ebungngogi matik mangaan-gi phambaal thakta Ebungngona phamlagani.

32 Aduga jaat pumnamakpu ebungngogi maangda khomjin-gani; yaaoshenbana haamengdagi yaao khaaidokpagum, Ebungngona makhoy amadagi amabu khaaydokkani;

33 Amasung Ebungngona yaaoshingbu ebungngogi yetta, touegumsung haamengshingbu oyda thamgani.

34 Matam aduda ningthou aduna ebungngogi yet-thangbada leibashingda haaygani, laak-u, eigi epaagi bor phangjabasa, taaibang-paal houngeidagi nakhoygi damak thouraang toubiramlaba ningthou leibaak adu phangjaro.

35 Maramdi eina laamlabada nakhoyna chaanaba pibi, eina khouraanglabada eibu pithakpi, eina lamlaanba oirambada nakhoyna eibu loushinbi;

36 Phi leitrabada eingonda phi pibi, eina narabada leikannabi, eina keishumshangda leirabada nakhoyna eingonda laakpi.

37 Matam aduda dharma chenbashing aduna ebungngoda khumlakkani, Eeshor, Ebungngona lamba eikhoyna urabada keidoungei ebungngobu pijakhibage, nattraga khouraanglabada pithakkhibage?

38 Amasung ebungngobu lamlaanba oinaa eikhoyna urabada keidoungei ebungngobu loushinbikhibage, nattraga phi leitrabada phi pikhibage?

39 Aduga Ebungngona naraba nattraga keishumshangda leiraba, eikhoyna urabada keidoungei ebungngoda laakkhibage?

40 Amasung ningthou aduna makhoyda khumlakkani, eina nakhoyda thaanggei shengna haayribani, eigi echin-enaao Khwaaidagi henna pikpa amaa phaaobada nakhoyna asup toubikhibana, nakhoyna madu eingonda toubikhibani.

41 Matung aduda Ebungngona oi-thangbada leibashingdasu haaygani, he siraap phangbasa, eingondagi chatthoktuna diyaabol amasung maagi dutshinggi damak thouraang toukhraba loyba naaidraba meida chatlu;

42 Maramdi eina laamlabada nakhoyna chaanaba pibide, amasung eina khouraanglabada nakhoyna eibu pithakpide,

43 Eina lamlaanba oirambada nakhoyna eibu loushinbide, phi leitrabada eingonda phi pibide, naaba amasung keishumshangda leibada nakhoyna leikannabiramde.

44 Matam aduda makhoynasu khumlakkani, Eeshor, Ebungngona lamba, khouraangba, lamlaanba oiba, phi leitraba, naba, nattraga keishumshangda leiba eikhoyna urabada, keidoungei ebungngobu thougan toujadabage?

45 Matam aduda Ebungngona makhoyda khumlakkani, eina nakhoyda thaanggei shengna haayribani, Khwaaidagi henna pikpashing asigi amada nakhoyna asup toubikhidabana, nakhoyna madu eingonda toubikhidabani

46 Amasung pumnamak asina loyba naaidaba dandida, touegumsung dharma chenbashingna shinaaidaba punshida chatkani.