John 8
Nipa lannabada phabi nupi
8 Touigumsung Jesusdi Jeitungi chingda lengkhre. 2 Amasung ayuk nganna Ibungona amuk Ishor ningnashangda lengsillakle, aduga mi pumnamakna Ibungogi maphamda laklammi, maduda Ibungona phamthaduna, makhoibu tambirak-i.
3 Amasung sastragi ojhasingga pharisisinggana nipa lannabada pharabi nupi amabu puraktuna, mayaida lephallaga, 4 Makhoina Ibungoda hai, Guru, nupi asibu nipa lannaringeimaktada pharaklabani. 5 Wayel yathangdadi Mosesna asigumbasibu nungdumna thaduna hatnaba eikhoida yathang pire, Ibungonadi magi maramda kari haibibage?
6 Makhoina Ibungoda theijinpham phangnanaba, Ibungobu chang yengduna, wa asi makhoina hairammi, Touigumsung Jesusna nonthaduna, khudonbina leipakta iba houre.
7 Adubu makhoina Ibungoda hangla hangladuna leibada, Ibungona hangattuna, makhoida hai, nakhoigi narakta pap chendaba mahak aduna mangonda hanna nungdum thasanu. 8 Aduga Ibungona amuk nonthaduna, leipakta khudonbina irammi. 9 Maduda makhoina masi tarabada, ahandagihouna amamam chatthokkhre, amasung Jesus mathantaga mayaida leiribi nupi adugata leihoure.
10 Aduga Jesusna hangattuna mangonda hai, he nupi, makhoi kadaida chatkhre? Nangbu mi kana amatana lalhandrabra?
11 Aduga mahakna hai, kananasu lalhandre, Prabhu, maduda Jesusna hai, einasu nangbu lalhande, chatlo, houjiktagi houna amuk pap touganu.
Taibangpan-gi mangal
12 Maram aduna Jesusna amuk makhoida wa hairak-i, eidi taibangpanbagi mangalni, eigi itung illiba mahak aduna amambada chatlaroi, Touigumsung hingbagi mangal adu phangjagani.
13 Maram aduna pharisingna Ibungoda hai, nahak nathantagi maramda sakhi pijei, nahakki sakhi adu chumde.
14 Jesusna makhoida khumlak-i,
eina ithantagi maramda sakhi pijarabasu, eigi sakhi adu achumbani, maramdi eina kadaidagi lakpa aduga kadaida chatliba eina khanjei, adubu eina kadaidagi lakpa nattraga kadaida chatliba nakhoidi khangde. 15 Nakhoidi hakchanggi matung inna wayeli, eidi kanabasu wayelde. 16 Hoi, aduga eina wayellabadi, eigi wayelba adu achumbani, maramdi eidi ithanta natte, Touigumsung eiga eibu tharaklaba Ipagani. 17 Hoi, aduga mi anigi sakhi achumbani haina nakhoigi wayel yathang aduda ikhrabani. 18 Ithantagi maramda sakhi pijaba adu eimakni, aduga eibu tharaklaba Ipana eigi maramda sakhi pibi.
19 Maram aduna makhoina Ibungoda hairak-i, nahakki napa kadaida leibage?, Jesusna khumle, nakhoina eibusu Ipabusu khangde, nakhoina eibu khanglabadi, eigi Ipabusu nakhoina khanglamgadabani.
20 Ibungona Ishor ningnashangda tambiringeida, wasing asi lan-geida ngangbani, kana amatana mahakpu pharamde, maramdi Ibungogi pungpham houjik laklamdri.
Lakkadaba wayelgi marida mitna singhanbiba
21 Maram aduna Ibungona amukka makhoida hai, eina chatthokkadouri, nakhoina eibu thigani, aduga nakhoina nakhoigi papta sijagani, eina chatpa mapham aduda nakhoina lakpa ngamde.
22 Maram aduna Jewssingna hairak-i, eina chatpa mapham aduda nakhoina lakpa ngamde haiba asinadi, mahak mathanta sijagadra? 23 Maduda Ibungona makhoida hairak-i, nakhoidi makhadagini, eidi mathaktagini, nakhoidi taibangpanba asidagini, eidi taibangpanba asidagi natte. 24 Maram aduna nakhoina nakhoigi papta sijagani haina eina nakhoida haire, maramdi eini haiba nakhoina thajadrabadi, nakhoi nakhoigi papta sijagani.
25 Maram aduna makhoina Ibungoda hairak-i, nahak kanano?, Jesusna makhoida hai, eina ahanbada nakhoida haiba adumakni. 26 Nakhoigi maramda eina nganggadaba amasung wayelgadaba yamna lei, Touigumsung eibu tharaklaba mahak adu achumbani, aduga eina mangondagi tarak tarakpa adu eina taibangpanda ngangthokpani.
27 Ibungona mapa adugi maramda makhoida haibani haiba makhoina khangde.
28 Maram aduna Jesusna hai, migi macha nipa adubu nakhoina thanggatlaba matam aduda, eina aduga ei ithanta kari amata toude, Touigumsung Ipa aduna eingonda tambikhiba adugumna eina wa asi ngangthok-i haiba nakhoina khanggani. 29 Amasung eibu tharaklaba mahakna eibu loinabiri, Ipa aduna ei ithantabu thadokpide, maramdi eina matam pumnamakta mahakpu penhenba thabak toui.
30 Ibungona wasing asi haibada, mi ayambana Ibungoda thajare.
Jewssingga yetnaba
31 Maram aduna Ibungoda thajaraba Jewssing aduda Jesusna hai, nakhoina eigi wa aduda itattatana leirabadi, nakhoi chumna eigi sebokni, 32 Aduga nakhoina achumba adu khanggani, amasung achumba aduna nakhoibu naning tamhangani.
33 Makhoina Ibungoda khumle,
eikhoidi Abrahamgi dharani, aduga mi kananasu minai khak oikhidri, aduga nakhoi naning tamgani haina nahakna karamna hairibano? 34 Jesusna makhoida khumle, tasengnamak eina nakhoida hairibani, pap touba mi khudingmak papki minaini. 35 Amasung minaidi yumda matam pumnamakki oina leite, adubu macha nipadi lomba naidana lei. 36 Maram aduna macha nipa aduna nakhoibu naning tamhallabadi, tasengnamak nakhoina naning tambani. 37 Nakhoidi Abrahamgi dharani haiba eina khangi, adubu eigi wasing asi nakhoida leitaba maramna nakhoina eibu hatnaba hotnari. 38 Eina Ipaga loinana ukhraba adugi maramda ngangi, adubu nakhoina nakhoigi napagi loinana ukhriba adu toui.
39 Makhoina Ibungoda khumlak-i, eikhoigi Ipadi Abrahamni, Jesusna makhoida hai, nakhoina Abrahamgi machasing oirabadi, nakhoina Abrahamgi thabak touramgani. 40 Adubu Ishordagi taraba achumba adu nakhoida takpiriba mi eibu nakhoina houjik hatke thi, asi Abraham nadi masi toukhide. 41 Nakhoina nakhoigi napagi thabak toui, maram aduna makhoina Ibungoda hai, eikhoidi nupi nupi lannaduna macha natte, eikhoigi Ipa ama lei, madudi Ishorni.
42 Jesusna makhoida hai,
Ishorna nakhoigi napa oiramlabadi, nakhoina eibu nungsiramgadabani, maramdi eina Ishordagi thoklaktuna laklabani, ei isa ithantadagi lakpa natte, Touigumsung mahakna eibu tharakle. 43 Eina ngangba adu nakhoina karigi khangdabage? maramdi nakhoina eigi wa taba ngamdre. 44 Nakhoidi nakhoigi napa diyaboldagini, aduga nakhoigi napa adugi apam apamba thabak adu touba nakhoigi ningbani, madi ahoubadagi mihatpa oirammi, aduga achumbada lepte, maramdi mangonda achumba ilei leite, mana chinthiba ngangba matamda mahak mathantadagi ngangi, maramdi madi chinthibani amasung madugi mapani.
45 Touigumsung einadi achumba haiba maramna, nakhoina eibu thajade. 46 Nakhoigi narakta kanana eibu pap chenbada tahanbage? eina achumba hairabadi, nakhoina eibu thajadriba karigino? 47 Ishordagi oiba mi aduna Ishorgi haidokpa wa tai, maram asina nakhoinadi tade, maramdi nakhoi Ishordagi natte.
48 Jewssigna Ibungoda khumlak-i, nangdi Samariagi machani, amasung bhut pubani haiduna eikhoina ningthina haidabra?
49 Jesusna khumle, eidi bhut puba natte, Touigumsung eina Ipabu ikai khumnei, aduga nakhoina eibu ikai khumnade. 50 Adubu eina ithantabu thagatchaba thide, thiba amasung wayel touba ama lei. 51 Eina nakhoida thanggeisengnamak hairibani, kanagumba mina eigi wa ngaklabadi, mahakna siba keidoungeidasu uroi.
52 Jewssingna Ibungoda hai, houjik eikhoina khangle, nangdi bhut pubani, Abrahamsu sikhre amasung Ishorgi wa takthokpasingsu sikhre, adumakpu nangna hairi, kanagumba mina eigi wa ngaklabadi, sibagi mahao mahakna lomba naidana suptang tangloi. 53 Eikhoigi ipudhou Abrahamdagi henna nangna chaobra? Mahaksu sikhre, Ishorgi wa takthokpasingsu sikhre, nang nathantabu kanaga mananhallibage?
54 Jesusna khumle, eina ithantabu thagatcharagadi, eigi thagatpa karisu natte, adubu thagatpiba adu eigi Ipani, mahak asi eikhoigi Ishorni haina mahakki maramda nakhoina hai. 55 Adumakpu nakhoina mahakpu khangde, adubu einadi mahakpu khangi, aduga eina Ibungo mahakpu khangde hairamlabadi, eina nakhoigumna chinthiba oiramgani, Touigumsung eina mahakpu khangi, aduga mahakki wa ngaki. 56 Nakhoigi napa Abrahamna eigi numit ujagani haiduna haraorammi, amasung mahakna madu ujaraduna haraore.
57 Maram aduna Jewssingna Ibungoda hai, nangdi chahi yangkheimaksu sudri, aduga nangna Abrahambu ukhrabra?
58 Jesusna makhoida hai, tasengnamak eina nakhoida hairi, Abraham poktringeida, Ei Lei. 59 Maram aduna makhoina Ibungoda thananaba nungdum paikhatle, adubu Jesusdi lottuna Ishor ningnashangdagi thoklaklaga makhoigi marakta phaoduna chatkhre.