Luke 10
Sebok humphutarabu thaba amasung makhoi hallakpa
10 Asigi matungda prabhuna atei humphutarabu pham happiduna, Ibungo masamakna chatkadaba sahar khudingda amasung mapham khudingda makhoibu ani ani oina Ibungogi mangda thare.
2 Amasung Ibungona makhoida hai,
lou lokkadaba yammi, adubu lokpinaba midi yamde; maram aduna Ibungo mahakki lokkadaba louda thabak suba mi thabiraknaba lougi mapuda nonjou. 3 Chatlu; yengu, keisalgi marakta yao machagum eina nakhoibu tharibani. 4 Senggao, paitukhao amasung khugrang kari amata puganu, aduga kanabusu lambida khurumganu. 5 Amasung nakhoina karigumba yumda changbada, hanna haiyu, yum asida tapthaba oisanu, 6 Aduga mapuda tapthabagi macha nipa leirabadi, nakhoigi tapthaba adu mahakkimathakta leigani, adubu leitrabadi, madu nakhoida amuk hallakkani. 7 Amasung makhoina piba piba adu cha thaktuna yum adumaktada nakhoina leiyu, maramdi thabak suba mi aduna magi asuman phangba matik chai. Yum amadagi yum amada hongganu.
8 Amasung nakhoina karigumba saharda changbada, makhoina nakhoibu lousinbirabadi, makhoina nakhoigi namangda khinbi khinbiba adu chao, 9 Aduda leiba anabasingbu phahallu; amasung makhoida haiyu, Ishorgi leibak nakhoida naksillkale.
10 Adubu nakhoina karigumba saharda changbada, makhoina nakhoibu lousinbidrabadi, madugi lambi lambida chatthoktuna haiyu, 11 Nakhoigi sahardagi eikhoigi khongda pakpa uphul adumak nakhoigi nathakta sakhi oina eikhoina teithok-i; adum oinamakpu nakhoina asi khangu, Ishorgi leibak naksillikle. 12 Eina nakhoida hairibani, numit aduda sahar adudagi Sodomna henna saphagani.
13 He Chorazin, nangonda awabanida! He Bethsaida, nangonda awabanida! Maramdi nakhoida toukhiba toungamdaba thabaksing adu Tyre amasung Sidonda touramlabadi, makhoina adungeida thouri phi settuna amasung utta phamduna mapukning honglamgadabani. 14 Touigumsung wayel toubada nakhoidagidi Tyre amasung Sidonna henna saphagani. 15 Amasung he Capernaum, nangdi sarga phaoba wangkhatkadra? Nangdi khamnung leibak phaoba kumthagani.
16 Nakhoigi wa taba aduna eigi wa tabani, aduga nakhoibu yadaba aduna eibu yadabani, amasung eibu yadaba aduna eibu tharakpa Ibungo mahakpu yadabani.
17 Amahiksung humphutara aduna haraona hallaktuna hai, Prabhu, Ibungogi mingda bhutsingmaknasu eikhoigi ikha polli.
18 Maduda Ibungona makhoida hai,
sargadagi nongthang kuppagumna seitanna taba eina urammi. 19 Yengu, nakhoina lil amasung brischikki mathakta netnanaba amsasung yeknaba adugi panggal pumnamakki mathakta eina nakhoida matik pibire; amasung nakhoibu kari amatana khak sokloi. 20 Adum oinamakpu thawaisingna nakhoigi nakha polli haiba asida haraoganu; adubu nakhoigi naming sargada ikhrabani haiduna haraojaro.
Jesusna thagatpa
( Matthew 11.25-27; 13.16,17 )
21 Pung adumaktada Ibungona thawai asengbagi mapanna haraojaraduna hai,
he Ipa, sarga amasung prithibigi prabhu, eina nahakpu thagatchari, maramdi nahakna hiramsing asibu asingbasing amasung akhangbasingdagi thuptuna thamlaga angang machasingda phongdokpire; hoi, Ipa, maramdi masina nahakki mityengda apenbani.
22 Hiram pumnamak eigi Ipana eingonda sinnabire, amasung mapa adu nattana macha nipa adu kanano haiba kana amatana khangde; aduga macha nipa adu amasung macha nipana mangonda phongdokningba kanagumba adu nattana mapa kanano haiba kana amatana khangde.
23 Amasung seboksingda ollaktuna Ibungona lonna hai, nakhoina uri uriba adubu uba mitsing adu yaiphabani. 24 Maramdi eina nakhoida hairibani, Ishorgi wa takthokpa amasung ningthou ayambana nakhoina uba adu uninglammi, adubu ukhide; aduga nakhoina taba adu taninglammi, adubu takhide.
Lomba naidaba hingba karam touna phangjagadaba amasung aphaba Samariagi mi amagi pandam
25 Amahiksung yengu, kanagumba wayel heiba amana hougattuna, Ibungobu chang yengduna hai, Guru, eina kari touraga lomba naidaba hingba phangadage?
26 Maduda Ibungona mangonda hai, wayel yathang aduda kari iduna leibage? Karamna pabage?
27 Aduga mahakna khumlak-i,
nangna Prabhu nanggi Ishorbu nanggi thammoi apumba, thawai apumba, panggal pumnamak amasung pukning apumba yaona nungsingadabani; aduga nangna nanggi keiroileikaibu nasamakkumna nungsigadabani.
28 Amasung Ibungona mangonda hai, nahakna chumna khumle; asi tou, aduga nahakna hinggani.
29 Touigumsung mahakna masa achumba sajaningduna Jesusda hai, phei, eigi keiroileikai adu kanano?
30 Jesusna khumlak-i,
kanagumba mi amana Jerusalemdagi Jericho tanna kumlaklingeida, dakusinggi makhutta tare. Makhoina mahakki maphi marol munbire, amasung mahakpu yeiduna asibagum thanamduna chatthokkhre. 31 Aduga thoklaba amadagi, kanagumba purohit amana lambi aduda kumtharakpada mahakpu uraduna, lambigi nakal amaromda theidoktuna chatkhi.
32 Amasung matou adugumna Levigi amanasu mapham aduda laklaga mabu uduna lambigi nakal amaromda theidoktuna chatkhi. 33 Touigumsung kanagumba Samariagi mi amana asum langphei chatlakpada mahakna leiba mapham aduda laklaga, mahakpu ubada nungsiba pokle, 34 Amasung mangonda laktuna mahakki sokphamsing aduda thao amasung drakha mahi heijinbiduna punsinbire; aduga mahakpu mahakmakki shadonggi mathakta tonghanduna mithungshang amada puraklaga, mahakpu seba toubire. 35 Amasung hayenggumbada mahakna dinar ani puthoktuna mithungshang pannaba mi aduda piraga hai, mahakpu chetna channa toubiyu; aduga nahakna chading touba ahenba makhei adu eina amuk hallakpada nangonda singlagani.
36 Ahum asigi marakta kanana dakusinggi makhutta taba mi asigi keiroileikai oiraba, nahakna kari ningbano?
37 Aduga mahakna hai, mahakpu chanbiba mahak aduni. Maduda Jesusna mangonda hai, chatlu, nahaksu adugumna tou.
Martha amasung Mary
38 Makhoina chatpada Ibungona, karigumba khul amada lengsille; aduga Martha koubi kanagumbi nupi amana Ibungobu mayumda lousinjare. 39 Amasung Mary koubi mahakki manao ama leirammi, mahaknasu prabhugi khuyada phamjaduna Ibungogi wa tarammi. 40 Touigumsung Marthana thougan touba yambagi maramna waichille. Aduna mahakna Ibungogi nakta laktuna hai, Prabhu, ei ithanta thougan tounaba inaona eibu thanamba asi Ibungona thousabidra? Maram aduna eibu mahakna pangbinanaba yathang pibiyu.
41 Touigumsung prabhuna mangonda khumlak-i, Martha, Martha, nahakna thabak yambagi maramda langtaknaduna ware; 42 Adubu thabak amatangdi tangaiphadrabani. Maramdi Marydi mangondagi louthoklaroidaba aphaba saruk adu khandokle.