Ephesians 5
1 Maram aduna nakhoyna achaanba machaashinggumna Eeshorgi matou loubashing oibiyu;
2 Aduga Christana nakhoybu nungshibiraduna, Eeshorgi maphamda nakhoygi damak ebungngo mashaamakpu manam nungshiba oinaba katnaba pot amasung erapot oinaa pibikhibagumna; nakhoynasu nungshibada chatlu.
3 Touegumsung nakhoygi narakta, ashengbashinggi matik chaabagumna, marumbi thamba amasung shengdaba pumnamakki nattraga karambagi maming phaaoba pan-ganu;
4 Aduga amotpa machet amasung apangba waangaang nattraga phagi jugai, pumnamak asi matik chaade, adubu madugi mahutta thaagatpa tousanu.
5 Maramdi asi nakhoyna lepna khang-e, haaybadi, marumbi thamba mi, nattraga shengdaba mi, nattraga laai murti latpa oiraba karamba mi kanaa amatagisu Christagi amasung Eeshorgi leibaakta phangpham elei leite.
6 Mi kanaa amatana nakhoybu karisu nattaba waana minamdasanu; maramdi masigi maramna haayba endabagi machaashinggi mathakta Eeshorgi ashaaoba laak-e.
7 Maram aduna nakhoyna makhoyga sharuk phangminnabashing oiganu;
8 Maramdi mamaangeida nakhoydi amaamba oirammi, adubu houjikti Eeshorda mangaan oiri;
9 Eeshorbu pelhanba karino munna khanduna, mangaangi machaashinggumna chatlu;
10 Maramdi mangaan adugi maheidi aphaba, dharma chenba amasung achumba pumnamakta lei;
11 Aduga amaambagi mahei yaandaba thabak aduga mapaang oiminnaganu, adubu madugi mahutta maraal phonghallu;
12 Maramdi maldioina lonna touriba thabak adu haaydokpa phaaoba ekaaibani. 13 Adubu phonghalliba pumnamak adu mangaanna phongdok-hanbani, maramdi phongdokhalliba thabak khuding mangaanni.
14 Maram adugi damak haay, tumliba nang, yahouro, amasung ashibaa shinggi maraktagi hinggatlo, aduga Christana nathakta nganbigani.
15 Maram aduna nakhoyna shingdabagum oidaduna, ashingbagum oiduna, karamna chatpa chekshinna yeng-u;
16 Achaaba matam leijahou, maramdi matam phatte.
17 Maram asina nakhoyna apangba oiganu, adubu Eeshorgi ningba karino khangu.
18 Amasung yu ngaaoganu; maduda waathok laanthok lei; adubu thawaayna thallu.
19 Amaga-amaga dharma esheina, thaagatpa esheina, amasung thawaaygi oiba esheina ngang shak-u, aduga Eeshorda nakhoy thawaay yaaona shak-u;
20 Maram pumnamakkidamak eikhoygi ebungngo Jesus Christagi mingda epa Eeshorgi maphamda matam leiba khibikta thaagatlu;
21 Christabu kibana nakhoy nashen amanaa amagi makha ponnou.
Christian emung manunggi mipal
22 Nupisa, Eeshorgi makha ponbagumna, nakhoy nakhoymakki napuroybagi makha pollu.
23 Maramdi Christanasu, ebungngo mashaana hakchaanggi kanbiba mapu, shinglupki makok oibibagumna, mapuroibana nupigi makok oibani.
24 Touegumsung shinglupna Christagi makha ponbagumna, nupishingnasu adugumduna maram pumnamakta makhoygi mapuroibashinggi makha ponsanu.
25 Mapuroibasa, Christanasu shingluppu nungshibiduna, ebungngo mashaabu madugidamak pibikhibagumna nakhoygi nupishingbu nungshiyu;
26 Madudi, shingluppu chusinba, kusinba, asinachingba karisu leitana adubu shengna amasung amakpa yaaodana,
27 Lunakena Ebungngona mashaamakta katchaana-naba eeshingna luthokpagi mapaanna waaheina shengdoktuna, Ebungngona shingluppu shenghannanabani.
28 Adugumduna mapuroibashingnasu makhoygi mashaamakkumna makhoymakki nupishingbu nungshigadabani. Mahaakmakki nupibu nungshiba mina mahaak mashaabu nungshibani;
29 Maramdi mi kanaa amatana mahaakmakki mashaabu tukachaba leite, adubu mabudum yoktuna ngak senjei; Christanasu shingluppu adugumna toubi;
30 Maramdi eikhoy ebungngogi hakchaanggi kaayatni.
31 Maram asina mina mapaa mamaa thaadoktuna maagi nupida napsin-gadabani; amasung makhoy ani aduna hakchaang amata oigadabani.
32 Athuppa waa asi arubani, adubu eina Christagi amasung shinglupki marida ngaanglibani.
33 Adum oinamakpu nakhoynasu mi khudingna mashaamakkumna mahaakmakki nupibu asumna nungshisanu; aduga nupina mahaakki mapuroibabu ekaai-khumnasanu.