Romans 1

Romanshingda Paulna eba laairik

Khurumjaba

1 Jesus Christagi manaai, paakhon-chatpa oinaa kouraba, Eeshorgi aphaba waapaaogi damak khaaidoklaba Paulna.

2 Aphaba waapaao asidi ebungngo mahaakki machaanupagi maramda ashengba shaastrada ebungngo mahaakki waa taakthokpa shinggi mapaanna mamaangeida pigani haayna waaleppa aduni;

3 Machaanupa adudi hakchaanggi marida Davidki dhaaraada pokle;

4 Ashengbagi thawaay adugi marida ebungngodi shibadagi hinggatpagi mapaanna paanggalga loynanaa Eeshorgi machaanupani haayba phongdokle; madu eikhoygi ebungngo Jesus Christani; 

5 Ebungngo adugi mapaanna eikhoyna ebungngogi minggi damak jaat pumnamakki marakta thaajabagi haayba ennanaba thoujaal phangjare amasung paakhon-chatpagi pham phangjare,

6 Amasung makhoy adugi marakta Jesus Christagi oinaba kouraba nakhoysuni. 

7 Romeda leiba Eeshorgi nungshiba, ashengbashing oinaba kouraba mi pumnamakta: eikhoygi epa Eeshor amasung ebungngo Jesus Christadagi thoujaal amasung engthaba nakhoyda leibisanu.

Paulna Rome youningba

8 Ahaanbada, taaibang-paal apumbada nakhoygi thaajabagi maramda ngangnare, haayduna nakhoy pumnamakki maramda Jesus Christagi mapaanna eina eigi Eeshorbu thaagatchei.

9 Maramdi matam leiba khibikta eigi haayja haayjabada nakhoygi maramda etat-tattana eina ningshingjei haayba ebungngo mahaakki machaanupagi aphaba waapaaoda ethawaay yaaonaeina thougan toujariba ebungngo Eeshorna eigi saakhini; 

10 Eeshorgi ningbibana eina thabak pangba oirabadi, karigumba pambeina tungda karigumba matamda nakhoyda laakchanaba eina nijari.

11 Maramdi nakhoybu chethannabagi damak thawaaygi oiba karigumba khudon nakhoyda eina pinanaba nakhoybu yaamna ujaningi;

12 Amasung madu asini, eikhoy amaga-amagagi thaajabana, nakhoygisu eigisu nakhoygi narakta eigaa nakhoygabu enshinbinanabani. 

13 Aduga, echin-enaaosha, eina Jaatshing atei ateigi marakta mahei phangbagumna, nakhoygi naraktasu phangnanaba, eina nakhoyda, laakchanaba toyna ningjare, aduga houjik pbaoba eibu palhalle haayba nakhoyna khangdaba ei pamyaade.

14 Greekshingdasu jaat ateishingdasu, ashingbashingdasu apangbashingdasu, eidi laman tonbani.

15 Matou asumna eina ngamjaba makheidi Romeda leiba nakhoydasu aphaba waapaao adu shaandoknaba eigi thouraangni.

Aphaba waapaaogi mawong matou

16 Maramdi eina aphaba waapaaogi maramda ekaaiba leijade; maramdi madu thaajaba mi khudingna araan khubam phangnaba Eeshorgi paanggalni; Ahaanbada Jewishdani aduga Greektasuni.

17 Maramdi maduda thaajabagi damak thaajabagi mapaanna Eeshordagi dharma chenba phongdokpani; ekhiba asigumbani, touegumsung dharma chenba mina thaajabadagi hinganni.

Aatoppa Jaatshinggi phattaba

18 Maramdi makhoygi dharmachendabana achumbabu thingba mishing adugi Eeshor ningdaba amasung dharmachendaba pumnamakki mathakta Eeshorgi ashaaoba swargadagi phongdok-e.

19 Maasi Eeshorgi maram khangba ngamba adu makhoygi nungda phongdokpibagi maramnani, maramdi Eeshorna madu makhoyda phongdokpire.

20 Maramdi taaibang-paal shemngeidagi ebungngo mahaakki ubaa ngamdaba, haaybadi, ebungngo mahaakki loyba naaidaba paanggal amasung Eeshor oiba adu, shemkhraba potki mapaanna waakhal tana tasheng tashengna uribani; aduna makhoybu kaibipham leite.

21 Maramdi makhoyna Eeshorbu khanglabasu ebungngo mahaakpu Eeshorni haayduna thaagatte, aduga ebungngo mahaakki toubimansu khangde, adubu makhoygi waakhal khanba adu aremba oirakle, aduga makhoygi apangba pukning mamkhre.

22 Makhoy mashaana ashingbani haaydokchaaduna, apangba oirakle,

23 Aduda mangba leitba Eeshorgi matik mangaanbu mangba yaaba migi, uchekshinggi, makhong mari paanba shaashinggi amasung mapukna shittuna chatpashinggi mawong maanna olhalle.

24 Adugi maramna makhoy masen-gi marakta makhoygi hakchaang adu ekaai-khumnaba leitanaba, Eeshorna makhoybu makhoygi pukninggi apaamba aduda shengdaba oinaba thaadokpire;

25 Maramdi makhoyna Eeshorgi achumba adu minambada olhanduna, shembiba mapugi mahutta aremba pot adubu ningsu ningle, thougansu toure; shembiba Eeshorbudi loyba naaidana thaagatkadabani. Amen. 

26 Maram asigidamak Eeshorna makhoybu achoppa apaambada thaadokpire; maramdi makhoygi nupishingnasu mahousagi thoudou adu mahousagi oidaba thoudouda olhalle;

27 Aduga, matou adugumna nupaashingnasu nupiga mahousa mari leinaba thaadoktuna, makhoygi apaibana amanaa atei amada meigum chaktuna, nipaga nipaga achoppa thabak touminnare, amasung makhoygi araanbagi phanggadaba mahei adu makhoy masha mashaada phangbani.

28 Amasung makhoyna makhoygi khangbada Eeshorbu mapham piba yaadaba adugumna, natei chadaba thabak adu tounanaba Eeshorna makhoybu yaadaba pukningda thaadokpire.

29 Dharma chendaba, phattaba, karamba, kallakpa, pumnamakna thalladuna; khambanbana, mihatpana, yeinasunabana, minambana, nungnangbana thanbashing; chibon chibon ngaangba,

30 Chirol touba, Eeshorgi maangda tukkachaba, ekaaiba khangdaba, chaaothokpa, napal touba, phattaba thabak puthokpa, mapaa mamaagi haayba endaba,

31 Waakhal leitba, waalepnaba kaiba, mahousagi nungshiba leitba, chanbiheitaba,

32 Mishing asina, asigumba thabak mahousana toubashingna shiba matik chaay haayba Eeshorgi waayel adu khaangduna, madumak toubata nattana madu mahousana toubashinggasu yaaminnei.