Matthew 3
Baptist toubiba John amasung mahakki pao
( Mark 1.1-8; Luke 3.1-18; John.1.19-28 )
3 Matam aduda baptist toubiba Johnna phaoraktuna, Judeagi lamjaoda pao sandoktuna hairak-i, 2 Nakhoi pukning honglo, maramdi sarga leibak adu naksillakle. maramdi, 3 Lamjaoda laoriba amagi khonjeldi,
nakhoina Prabugi lambel thourang tou, Ibungogi lambi chumhallu, haiduna Ishorgi wa takthokpa Isaiahna hairamba mi adu mahak asimakni.
4 John Masamak ut madugi phijet setlammi, amasung makhwangda saun-gi khwangjet amana laklammi. aduga mahakki achapotti koujeng amasung lamkhoihi oirammi. 5 Matam aduda Jerusalem Judea pumnamak amasung Jardangi akoibada leiba mipumnamak thoklaktuna mangonda chatlammi; 6 Amasung makhoigi pap haidokchaduna Jardan turelda makhoina mangondagi baptist lourammi. 7 Touigumsung ayamba Pharisi amasung Saddukisingna baptistgidamak lakpa uraduna mahakna makhoida hairak-i, he lin-gi dharasa, lakkadouriba asaoba adudagi chellu haina kanana nakhoida takpibage? 8 Adunadi nakhoina napukning hongbagi matik chaba mahei yalhallu. 9 Amasung eikhoigi Ipudhou Abraham lei haige haina napukningda khan-ganu; maramdi eina nakhoida hairi, Ishorna nung mayam asidagi Abrahamda machasing thok-hanba ngammi 10 Houjikmaksu upambisinggi maruda singjang thaduna lei; maram asina aphaba mahei pandaba upambi khudingmakpu yanthektuna meinungda langsilli. 11 Pukning hongbagi maramna ishingda eina nakhoibu baptist toubi; adubu eigi itungda lenglakliba Ibungosidi eingondagi matik helli; eidi Ibungogi khugrang puba youna matik chade; Ibungonadi nakhoibu thawai asengbada amasung meida baptist toubigani. 12 Ibungogi humai makhutta lei amasung Ibungona mahakki lou yeipham changkhonna sengdoklaga mahakki gehu adu keida peisin-gani, Touigumsung maham adu mutpa naidraba meida thajin-gani.
Jesusbu baptist touba amasung diyabolna themba
( Mark 1.9-13; Luke 3.21,22; Luke 4.1-13 )
13 Matam aduda Jesusna Galileegi Jordanda baptist louge haiduna Jordan tanna lenglakle. 14 Touigumsung Johnna Ibungobu khamladuna hairak-i, Ibungona eibudum baptist toibigadabani, aduga Ibungona eingonda lengbirak-ibra? 15 Amasung Jesusna khumlak-i, houjikti yaro; maramdi matou asumna eikhoina dharmachenba thabak pumnamak pangthokpada matik chai, maduda mahakna yajare. 16 Amahiksung Jesusna baptist louraduna ishingdagi hek karakle; amasung yengu, sarga hangdokle, amasung Ishorgi thawaina khunugumna kumtharaktuna Ibungogi mathakta lak-iba adu ujare, 17 Amasung yengu, sargadagi khonjel amana hairak-i, Masi eigi nungsiraba icha nipani, mangonda eina yamna pelle.