Jeremiah 40
Jeremiahna Gedaliahga leiba
1 Loinagi makok oiriba Nebuzaradanna Jerusalem amadi Judahda leiriba mishingduga loynanaa Jeremiahbu thouri thaaduna Babylongi Ramah taanna loi oinaa puduna chatpadagi thaadokpa matamda Eeshorna Jeremiahda waa haayraklammi.
2 Loinagi makoktuna Jeremiahda haayrammi, "nahaakki Eeshorduna maphamsigi mathakta shaap toukhi.
3 Eeshorna pumnamaksi thok-hanbiribani. Ebungngo mahaakna taakpikhiba gumna pumnamaksi oihanbire. Nakhoyna Eeshorgi maphamda paap touduna mahaakna haayba yaathangshingdu taakhide. Maramsina thokliba thoudokshingsi nakhoygi nathakta tararibani.
4 Yeng-u, ngasi kouba nongsida nahaakki nakhutta pulliba yothlingdu thaadokpirage. Karigumba eigaa loynanaa Babylonda laakninglabadi laakpa yaai. Eina nahaakkidamak phajanaa toubigani. Karigumba nahaakna Babylonda eigaa loynanaa laakningdrabasu laakkanu. Adubu yeng-u. Leibaaksida naning tammu, nahaakna chatningba maphamda chatpa yaai.
5 Karigumba nahaak maphamsida leige haayrabadi Babylongi ningthouda Judahgi saaharsigi leibaak ngaakpa oinaa khankhiba Saphan-gi machaanupa Ahikamna pokpaa Gedaliahgi manaakta chatlu. Mahaakka loynanaa miyaam marakta leiyu. Natragasu nahaakna paamba maphamda chatlu." asumna loinagi makoktuna maangonda chinjaak amadi khudon pot khara pirammi. Aduga mahaakpu thaadokpirammi.
6 Matangduda Jeremiahna Ahikamgi machaanupa Gedaliahga loynanaa Mizpahda leirammi. Mahaakna leibaaktuda leihouba mishinga loynanaa leiminnakhi.
Judahgi ningthou Gedaliah
( 2 Ning 25:22-22)
7 Atoppa maphamda leiba mishinggi laanmi kaangbugi luchingba oiribashingna Babylongi ningthou Ahikamgi machaanupa Gedaliahbu leibaak ngaakpa oinaa khanduna leibaaktuda leihouba laairaba Babylonda pukhidaba nupaa nupishing amadi angashing mahaakki makhutta shinnare haayba taarabada,
8 Makhoyna Mizpahda leiriba Gedaliahgi manaak taanna chatlammi. Makhoydudi: Nethaniahgi machaanupa Ismael, Kareahgi machaanupa Johanan, Tanhumethgi machaanupa Seraiah, Netophahgi shaageigi Ephaigi machaanupashing, Maacahgi machaanupa Jezaniahga loynanaa makhoygi mishingni.
9 Saphan-gi machaanupa Ahikamna pokpaa Gedaliahna waashakladuna makhoyda haayrammi, "Chaldeanshinggi makhaada leibasi thoina kiruganu." leibaaksida leidana Babylongi ningthougi makha pollu. Adu oirabadi nakhoy thoidokpa ashoy angaam leiroi.
10 Eigidamakti eikhoygi ethakta waayenba laakkadaba Chaldeanshingdu thengnaba oinaa Mizpahda leige. Nakhoyna tougadaba haaybabu thaknanaba yu, kalen thaada chaananaba mahei marong, aduga thaonachingba maraang kaina chaphuda haaptuna thammu. Nakhoyna hannadagi leirakliba saaharshingduda adum leiyu. " Matou asigumna Moabki lamda Jewish, Ammonni amadi Edom aduga atei atoppa lamda leiriba Jewishshingduna Babylongi ningthouna Judahgi manungda eremkhak amaa khakpiduna Saphan-gi machaanupa Ahikamna pokpaa Gedaliahbu makhoygi mathakta leibaak ngaakpa oinaa khanbire taabada,
12 Jewishshingduna makhoyna leiruriba lamshingdu thaadoktuna Judahgi Mizpahda leiriba Gidaliahgi manaakta hallaaklammi. Makhoyna yu, amadi kalen thaada chaananaba mahei marong yaamna khomjillammi.
Gedaliahbu haatpa
(2 Ning 25:25-26)
13 Matamduda Kareahgi machaanupa Johanan amadi atei lamda leiba laanmishinggi makok oiribashingduna tinnaraga Gedaliahgi manaakta Mizpahda laaklammi.
14 Makhoyna Gedaliahda haayrammi, "Ammon-nishinggi ningthou Baalisna nahaakki nathawaay lounanaba Nethaniahgi machaanupa Ismaelbu thaakhre haaybasi nahaak tarabra?" adubu Ahikamgi machaanupa Gedaliahna makhoyna haaybadu thajaramde.
15 Kareahgi machaanupa Johananna Mizpahda laaklaga Gedaliahda tuminna waa haayrammi, "nanaibu thabiyu. Nethaniahgi machaanupa Ismaelbu haatnaba thouraang toujage. kanaa amaa phaaoba haayriba waaphamsi khanghanba yaade. Nahaakki naShaaigonda changjariba Jewishshingsi choijaainakhinaba karigidamak mahaakna nahaakki nathawaay louhangadage? adu oirabadi Judahgi eremkhakni haayna leplibasi maangloidra?
16 Ahikamgi machaanupa Gedaliahna Kareahgi machaanupa Johananda haayrammi, "nahaakna maasi touba yaade. Maramdi nahaakna Ismaelgi matangda haayriba waasi achumba natte."