Jude

Judena eba laairik

1 Jesus Christagi minaai amasung Jameski machin manaao oiba Judena, koubikhraba nakhoyda, haaybadi, epa Eesor-gi maphamda challaba amasung Jesus Christagi damak ngaklabasingda; 

2 Chanbiba, engthaba amasung nungsiba yaamkhatsanu.

Tambisinnaba mising amasung phattaba Lamchatki maramda mitna singhanba

3 achaanbasa, eina nakhoyda eikhoy mayaamgi oiba aran khubaamgi maramda thuna enanaba hotnaringeida, asengba-singda amuktada pithokkhraba thaajaba adugi damak thawaay yaaona angam tannanaba nakhoybu ensinduna ebana, eigi tangaiphadaba oikhi. 4 maramdi kana kanaagumba mising lonna litsinkhre; waayel asigidamak makhoygi maramda mamaangeida haanna ekhrabani. Makhoydi Eesor ningdaba, eikhoygi Eesor-gi thoujanbu apaaybada olhanba, eikhoygi amata ngaayba mapu amasung Eesor, Jesus Christa-bu yaadaba mini.

5 Amasung nakhoyna waaram pumnamak amuktada khanglabasu, eina nakhoybu ningsinghanjaningi, haaybadi, Eesor-na Eqypt leibaaktagi mising adubu kanbire haayraga, matungda thaajadabasingbu maanghalle. 6 adugaa makhoy-makki khudum chanba adu ngaktaduna makhoy-makki panpham thaadokpa swarga-dut singbu ebungngo mahaakna achouba numitki waayelgi damak amaambada lomba naaidaba punduna thamle. 7 Adugumduna Sodom amasung Gomorrah adugaa makhoygi akoybada leiba sahar adu asisingga machat manaana marumbigi thabak touraba, amasung tongaanba hakchaanggi matung ennaa chatlaba aduna lomba naaidaba meigi waakong khaangduna, paandam oinaa utlibani. 

8 Adum oinamakpu machat adugaa maannana asisingnasu makhoygi mang mangbasing asina hakchaangbu mothalli, mapu oibasingbu thousade, amasung matik mangaan leibasinggi mathakta thina ngaang-e. 9 touegumsung athoiba swarga-dut Mikhayelna diyaabolga ningai tounaduna Mosesgi hakchaanggi maramda yetnabada, mahaakki mathakta thina ngaangnaba thouna pharamde, adubu mahaakna haaykhi, ebungngona nahaakpu waaraksanu. 

10 adubu mising asinadi, makhoy khangdaba hiram sing maramda phattana ngaang-e, waakhal khanba ngamdaba saasinggumna makhoygi pukningna khngba hiram sing asina makhoy masaabu maanghalli. 11 makhoyda awaabanida, maramdi makhoyna Caingi lambida chatkhre, makhoyna sen paambagi maramna Balaamgi araanba aduda thuna chensinkhre, adugaa Korahgi waakhetpada makhoybu manghankhi. 

12 Asisingdi nakhoygi nungsi chaak chanabada phaaoba khudongthiningai oiba nunsinggumbani, nakhoyna makhoyga chaminaba matamda akibaa leitaana makhoy masa mathantabu seba toujei, makhoydi nungsitna humba eesing yaaodaba leichinni; mahei yaandaba ningthamthagi upaambi-singgni, mara yaaonaphuktoklaba anirak sirabi upaambini; 13 Makhoy masaagi ekaaibabu, konggongumna souhanba samudragi sathiba ethakni; koipai paayba thawaan-michaksingni, makhoy asigi damak amaambagi amuba adu lomba naaidana khaktuna thamle. 

14 Amasung asisingdasu Adamdagi miron taretsuba Hanokna Eesor-gi waa takthoktuna haay, yeng-u, Eesor-na ebungngo-gi asengba-sing lising lisingga loynanaa lenglakle, 15 pumnamakki mathakta waayelnana ba, amasung Eesor ningdaba pumnamakpu makhoygi Eesor ningdana toukhiba Eesor ningdabi thabak pumnamakki maramda, adugaa Eesor ningdaba paapchenba-singna ebungngo-gi mathakta ngangkhiba ayakpa waa pumnamakki maramda lalhannanaba, ebungngona  lenglakle. 16 Asisingdi murum murum sonbasingni, apenba leittabasingni. makhoyna makhoygi apaiba matung ennaa chatli, makhoygi machinna pongna waa ngaang-e, adugaa tongjanabagi maramda misak mimaay yengduna misingbu thaagatngei,

17 touegumsung, achaanbasa, eikhoygi ebungngo Jesus Christagi paakhon-chatpasingna mamaangeida haaykhi haaykhiba waa adu nakhoyna ningsingbiyu; 18 haaybadi, akonba matamda makhoy masaagi Eesor ningdaba apaiba matung ennaa chatpa noknaganbasing leigani haayna makhoyna nakhoyda haayrammi. 19 Makhoy asi tokhaai tokhaai tanhanba, hakchaanggi oiba lichat chatpa, thawaay adu leitbasingni. 

20 touegumsung, achaanbasa, nakhoyna nakhoygi thoidok hendokna senglaba thaajaba mathakta nakhoygi nasa semgatchaaduna, thawaay asengbagi mapaanna haayjaduna, 21 lomba naaidana hingnaba eikhoygi ebungngo Jesus Christagi nungsibiba ngaijaringeida, Eesor-gi nungsibada nakhoy nasaabu ngakchou. 22 Amasung chingnaba touriba mi kharagi mathakta nungsibiba utlu; 23 Makhoybu meidagi pak chingthokpiduna kanbiyu; adugaa hakchaangna makhanba phiron phaaoba tukkachaaduna, mi kharagi mathakta akibaga loynanaa nungsibiba utlu. 

24 houjikti, khudi thidanaba nakhoybu ngaakpiba amasung thoidokna haraaobada amakpa leitaana ebungngo mahaakki matik mangaangi maangda nakhoybu lephanba ngamba, 25 eikhoygi kanbiba mapu amata ngaayba ahingba Eesor-da, matik mangaan, chinglemba, pangal amasung matik houjiktagi lomba naaidaba matam phaaoba leisanu, Amen.