Judges 11

1 Gileadta leiba Jephthah kouba nupaadu mathouna leiba laanmi amaa oirammi. Adubu mahaakki mamaadu maramchat phattabi nupi amaa oirammi. Jephthahgi mapadi Gilead oirammi.

2 Gileadki nupi ateinasu machaanupa kayaamarum pokkhi. Mahaakki ashengba nupishingduna pokpaa machaanupashingduna chaaoraklaga mahaakpu yaamna thina toubikhi. Makhoyna maangonda haaykhi, “nahaak atoppa nupina pokpani. Maramsina eikhoygi epaagi sharuk amaa phaaoba nahaakna phangba yaaroi."

3 Masigi matungda Jephthah machin manaaoshinggi makhuttagi naanthoktuna chenkhi. Mahaak tobaki lamda leikhi. Mahaakna mi maramchat naaidabashing khomjinduna lutnachingba touba houkhi.

4 Matam khara leiraga Amonshingna Israelgi mathakta laan hourakkhi.

5 Amon-shingna Israelgi mathakta lalhouraklabada Gileadki ahanshingna Tobta leiriba Jephthahbu lourui.

6 Makhoyna Jephthahda haayrammi, "Amonishinga eikhoyga thengnagadouriba laansida nahaakna luchingba oibiyu."

7 Jephthahna Gileadki ahanshingda haayrammi, "nakhoyna eibu tukkachana toukhiba nattra? maramsina nakhoyna eibu epaagi yumdagi taanthokkhiba nattra? nakhoyna awaaba tarba matamda eigi enaakta karigidamak laaklibano?"

8 Gileadki ahanshingna Jephthahda haayrammi, "maramdunani eikhoyna nahaakki naphamda laakliba. Nahaak eikhoyga loynanaa leigadabani. Nahaak laaklaga Amonishingbu maaythiba pigadabani. Nahaakna Gileadta leibashinggi luchingba oigadabani."

9 Jephthahna Gileadki ahanshingda haayrak-e, "phare, nakhoyna Amonishinggi mathakta laandanaba eibu ereipakta amuk haanna puduna chatlabadi aduga masimak yabiduna Eeshorna makhoybu eigi ekhutta pinabirabadi eina nakhoygi luchingba oiba taay."

10 Gileadki ahanshingduna Jephthahda haayrammi, "Eeshorna eikhoygi saakhi oinaa leiribani. Nahaakna haayribadu eikhoy shoydana yagani."

11 Asumna waaphamdu yaanarabada Jephthahna Gileadki ahanshinga chatkhi. Miyaamna mahaakpu makhoygi luchingba oihankhi. Jephthahna Mizpahda Eeshorgi maangda leptuna mahaakna ebungngogi maphamda haayjaningba waa loynaba haayjakhi.

12 Jephthahna Amonishinggi ningthou maphamda mi thaaduna paao amaa thaakhi. maasida mahaakna haaykhi, ”eina chingliba leibaaksigi mathakta nahaakna laandaba laaklibadu nahaakna eibu yaaningdaba kari leibage?"

13 Amonishinggi ningthouna paaopuba nupaaduda asumna haaykhi, "Israelna Egypttagi laakpa matamda eigi lam munkhi. Arnondagi houraga Jabbok amadi Jordan phaaoba makhoyna loushinkhi. Maramsina laan toudana haayriba lamshingsi eingonda amuk hallaklabadi yaamna henna phaba oigani."

14 Jephthahna Amonishinggi ningthougi maphamda paaopuba nupaa amaa tharaduna

15 Asumna haayhankhi, "Jephthahna asumna haayri Israelna Moab nattraga Amonishinggi lamdu loukhide

16 Adubu Israelna Egypttagi laakpa matamda angaangba samudradu phaaoduna chatkhi. Aduga makhoy Kadesta thungkhi.

17 Matamduda Israelna Edomgi ningthouda mi thaaduna haayhankhi, "ebungngogi naphamda nanaai eikhoyna nollukna hanggatchari nanaai eikhoybu ebungngogi leibaaksi phaaoduna chathanbiyu." adubu Edomgi ningthouna makhoyna haayjabadu tabikhide. Makhoyna Moabki ningthoudasu masimak haayjakhi adubu mahaaknasu tabikhide. Asumna Israel Kadesta matam khara leikhi.

18 Masigi matungda makhoyna lamhaang phaaoduna chatlaga Edom amadi Moabki lamdugi nakanda koiduna chatkhi. Makhoyna Moabki nongpok thangba lamduda thunglaba matungda Arnon-gi waangmada shang shaaduna leikhi. Arnon Moabki lam oirabasu nakhoyna Moabki lamda changkhide.

19 Masigi matungda Israelna Hesbonda paalliba Amorishinggi ningthou Sihonda haayjakhi: eikhoygi leibaak taanna chatchakhinaba ebungngogi leibaaksi phaaoduna chatchakhige.

20 Sihonna Israelbu thaajadaba maramna mahaakki leibaaktu phaaoduna chathankhide, asumna Sihonna mahaakki laanmishing punshinduna Jahazda peiduna thamkhi. maasida mahaakna Isrelga laanthengnakhi.

21 Israelgi Eeshorna Sihon amadi mahaakki mishingbu Israelgi makhutta taahankhi. Israelgi mishingna makhoybu maaythiba piraga Amorishinggi lamdu loukhi.

22 Makhoyna Amorishinggi lam oiriba Arnondagi Jabbok youraga lamhaang koyna laaklaga Jordan youba phaaoba amaa loushinkhi.

23 Matou asumna Israelgi Eeshorna Israelgi mishinggi mamaangda Amorishingbu maku hubamakhei mangtak-hankhi. Nakhoyna haayriba lamsi lourage haayribra?

24 Nahaakki laai Chemosna nahaakkini haayna tamkhraba lamdudagi henna paambra? eikhoygi Eeshorna eikhoygi emit emangda mingondagi louthoktuna eikhoyda pikhraba lamshingdu eikhoygi oigadoubani.

25 Nahaak Moabki ningthou Zipporgi machaanupa Balaktagi henna kanheibara? nahaak Israelgi mayokta leppa ngamjagadra?

26 Israelna Hesbon amadi masigi manungda taariba khunshing aduga Aroer amadi masigi manungda taramba khunshingda chahi 300 Chupnaa leiringei matamdadi nahaakna haayriba lamsi loushinhouba yaade?

27 Maramsina nahaakki naphamda eina thoidokpa ayon araan amatta toukhide adubu nahaakna eigi ethakta laan houge haayna laaklibasi thoidokna achouba naran amani. Waayel Mapu oiriba Eeshorna ngasi kouba nongsida Israelgi mishing amadi Amorishinggi marakta chap chaana waayenbisanu."

28 Adubu Amorishinggi ningthou Jephthahna thaakhiba paaodu thaoina toukhide.

29 Masigi matungda Eeshorgi thawaayna Jephthahbu enshinbirammi. Maramsina mahaakna Gilead amadi Manasseh phaaoduna Mizpah youraga Amonshinggi lamda taakhi.

30 Matamduda Jephthahna Eeshorgi ming panduna waashakhi. Mahaakna haaykhi, "karigumba Ebungngona amonishingbu eigi ekhutta pibigadoubiba oirabadi,

31 Eina Amonishingbu ngamduna ereipakta hallakpa matamda eigi eyumdagi ehaan haanna eibu unaba thorakpa midu Eeshorgi khuyaakhaada meida thaaduna touba pujagi potlam oinaa katchaagani."

32 Maasi haayramlaga Jephthahna Amonishinggi mathakta laandarunaba khongshaankhi. Eeshorna makhoybu mahaakki makhutta taahankhi.

33 Mahaakna Amonshingbu Aroergi Minnith phaaobada leiriba saahar kundugi lam loidriba phaaoba tannaduna haatkhi. Matou asumna Amonishingbu Israelgi mishinggi mamaangda marai lukthakhi.

Jephthahgi machaanupi

34 Haayriba laansi loiraga Jephthah mayumda hallakkhi. Mahaakna Mizpah youba matamda mahaakki machaanupina pung yeiduna amadi jaagoi shaaduna mahaakpu okpa laakkhi. Mahaak nupimachasikhakta pokcharammi. Haayriba nupimachasi nattana atoppa angaang leiramde.

35 Mahaakna machaanupidu ubada awaabana thamoi puba yadaduna maphi shegaaikhi amasung haayrak-e, "onthokpanida ebemma, nahaakna eibu thawaay yaamna nungaaihande. Nahaakna eibu khudong thiba taahalle. Eeshorgi maphamda eina waashak pandom lomkhrabadi maramsina haayriba waashaktu kaiba yaade."

36 Nupimachaaduna maangonda haayrammi, "ipa ebungngo, epaagi kaiba yaadaba waashak karigumba Eeshorgi maangda shaakkhiba leirabadi madu kaidanaba eingonda toubiba yabadu chatthabiyu. Houjikti Eeshorna Amonshingbu epaagi khutta taahallabanina haayriba waashaktu kaidana paangthokkadabani."

37 Mahaakna mapaanda makha taana haayjarak-e, "eina ngasi nijariba asidangdi thunghanbiyu madudi asini eibu thaa anigi matam pinabiduna emannabishinga koyna chingda chattuna leishaabi oinaa shikhigadoubsigi maramda awaa nungaai waarinajage.

38 Maasida Jephthahna haayraklammi. "phare, thungjaro. Yaathang phanglabada mamannabishingga loinaduna nupi oibi amagi athoiba shenglaba lamchattu thaaduna tengthaajaduna matam lenkhi.

39 Thaa ani surabada mahaak mapaagi manaakta hallakkhi. Mapaagi waashak matung ennaa mahaakpu meida thaaduna puja tounakhi. Haayriba nupisi nupaa tinnadribi amaa oirammi. Thoudoksidagi Israelgi manungda chatnabi amaa houjik phaaoba leihouwi madudi

40 Chahi khudinggi Israelda leiba leishaabishingna numit marini chupana Gileadki Jephthahgi machaanu-pidubu ningshingduna tengthaa-naaoibagi thoudok amaa paangthok-e.