Matthew 8

Jesusna angakpa thabak touba houba: kusthi thungba amabu, laanmi chaammagi mapugi manaaibu amasung Simon-gi manem-bokpu phahanbiba

( Mark 1.40-45; Luke 5.12-16 )

1 Jesusna ching adudagi kumtharakpa matamda, miyaamshingna ebungngogi tung elaaklammi; 2 Amasung yeng-u, kusthi thungba amanaa ebungngogi manaakta laaklaga khurumjaduna haay, he Eeshor, Ebungngona yaabirabadi, eibu shenghanbiba ngammi.

3 Amasung Ebungngona khut tingthoklaga maabu shokpiduna haay, eina yaare, nahaak shengjaro. Amasung khudak adumaktada maagi kusthi laaina adu shengkhre.

4 Aduda Jesusna maangonda haayrak-e, yeng-u, nang kanaadasu haaydokkanu; adubu chatlu, purohitta nashaamak utcharu, amasung makhoyda saakhi pinanaba, Mosesgi yaathang matung ennaa katnaba pot adu katcharu.

5 Amasung Capernaumda Ebungngona changlaba matungda laanmi chaammagi makok amanaa laaklaga khurumjaduna haay,

6 Eeshor, eigi enaai adu naakal naamma shithaba anaabana yaamna waana yumda hiptuna leiri. 7 Ebungngona maangonda haay, eina laaktuna mahaakpu phahn-gani.

8 Amasung laanmi chaammagi makok aduna khumlak-e, Eeshor, Ebungngona eigi yumda lengbirakpa etik chaade, touegumsung yaathang aduta taakpiraga eigi enaaigi anaaba phajagani.

9 Maramdi eimaksu mapugi makhaada leiba mini amasung eigi ekhaada laanmishing leiri; amasung eina mi asida, chatlu, haayraga mahaakna chatli; atoppa amada, laak-u, haayraga laak-e; aduga eigi enaaida, asi tou, haayraga touwi

10 Amasung Jesusna madu taabada ngakladuna ellibashingda haayrak-e, eina nakhoyda thaanggei shengna haayribani, Israelgi marakta asup yaamna thaajaba mi amatasu eina phangde.

11 Aduga eina nakhoyda haayri, nongpok amasung nongchuptagi ayaamba laaktuna swarga leibaakta Abraham, Isaac amasung Jacobka phamminnagani;

12 Touegumsung ninthougi leibaak adugi machaashingbu mapaan-gi amaambada hundokkani; mapham aduda kappa amasung maya kraakkraak chikpa oigani.

13 Amasung Jesusna laanmi chaammagi makok aduda haayrak-e, chatlo, nahaakki thaajabagi matung ennaa nangonda oisanu. Amasung pungja aduda mahaakki manaai adu anaaba pharammi.

14 Amasung Jesusna Petergi yumda changlaklabada, maagi manembok ningtham chanduna hiplamba uraduna,

15 Ebungngona maagi makhut shoklabada ningtham chanbadu phakhare; amasung manaa hougattuna ebungngobu thougan toujarak-e.

16 Amasung numidaangda mishingna ebungngoda bhutna pubashingbu purakle, amasung waahei amanaa bhut shing adubu taanthoktuna anaabashing pumnamakpu phahanbire.

17 Eeshorgi waa taakthokpa Isaiahbu haayhankhiba, ebungngo makna eikhoygi ashol-ana loubirammi amasung laaina pumnamakpu pubirammi, haayba asi thungna-nabani.

18 Adudagi Jesusna mahaakki akoybada miyaamshingna leiba uraduna waangmada laaknanaba yaathang pibire.

19 Amasung shaastragi oja amanaa ebungngoda laaktuna haayjarei, he oja, Ebungngona lengba mapham khudingda tung enjage.

20 Amasung Jesusna maangonda haay, lamhuishinggi makhul lei, amasung atiyagi uchekshinggi mahum lei; touegumsung migi machaanupa adugi kok thamphamdi leite.

21 Amasung sebokshinggi maraktagi atoppa amanaa ebungngoda haayjarak-e, Eeshor, haanna epaabu potloynanaba eina chatchaba yaabiyu.

22 Touegumsung Jesusna maangonda haay, eigi etung ellu, amasung ashibashingna makhoygi ashibashingbu potloynanaba thamlammu.

Nong nungshit khaamjinba

( Mark 4.35-41; Luke 8.22-25 )

23 Amasung Ebungngona hida tonglabada ebungngogi sebokshingna tung eenjarammi.

24 Amasung yeng-u, samudrada akanba nong-nungshit houraktuna, hi adu eethakna kupsillakle; touegumsung ebungngodi tumduna leirammi.

25 Maduda makhoyna laaktuna ebungngobu houdoklaga haayjarak-e, Eeshor, kanbiyu, eikhoy maangle.

26 Amasung Jesusna makhoyda haay, he thaajaphaattabasa, nakhoyna karigi kiribano? matung aduda Ebungngona lepkhattuna nungshit amasung samudrabu khaamjille; amasung yaamna tapthakhre.

27 Amasung mishing aduna ngakladuna haayrak-e, nungshit amasung samudramakna mahaakki yaathang elliba asi karamba mino?

Bhutna puba Gadarenesgi mi

( Mark 5.1-20; Luke 8.26-39 )

28 Amasung Ebungngona Gadarenesgi lamda laakpada mongpham maraktagi thoklakpa bhutna puba mi ani ebungngoga oknare. Makhoy thoidokna akibagi mashak oiduna, lambi adomda kanaa amatana chatpa ngamnadre.

29 Amasung yeng-u, makhoyna laaoduna haayjarak-e, he Eeshorgi machaanupa, nangga eikhoyga kari thoknaba leibage? Matam adu youdringeida Ebungngona eikhoybu waahanbige haayna asida laakpiribra?

30 Makhoydagi khara thaapna ok mayaamgi shanggu amaa chaaduna leirammi.

31 Amasung bhut shing aduna ebungngoda nonjaduna haayjarak-e, eikhoybu taanthokpirabadi, ok shanggu aduda eikhoybu thajinbiyu.

32 Amasung Ebungngona makhoyda chatlu haayna yaathang pibire. Amasung makhoyna thoklaktuna okshing aduda changkhre; amasung yeng-u, shanggu apumbaa adu angamba adudagi samudrada hothaduna eeshingda sikhre.

33 Amasung sellambashing aduna chenkhiduna saahar aduda changkhraga, thokkhiba pumnamak amasung bhutna pubashinggi maramdu tamlure.

34 Adudagi yeng-u, saahar pumnamak aduna Jesusbu unanaba thorakle; amasung makhoyna ebungngobu uraba matamda makhoygi lamdagi chatthokkhinanaba haayjare.