Mark 14
Jesusbu haatnaba khujin thouraang. Bethanyda Jesusbu thaao heibiba
( Matthew 26.1-13; Luke 22.1,2; John 11.45-53; 12.1-8 )
1 Numit ninigi matungda araan-chaakkhaangba amasung haamei yaaodaba tal chaakkhaangba oirammi, aduga athoiba purohit shing amasung shaastragi ojaashingna marei mara touduna ebungngobu karamna phaaraga haatkadage haayna thirammi;
2 Maramdi, mishinggi marakta ninnadaba chaakkhaangba matamda oiganusi, haayna makhoyna haaynei.
3 Amasung Bethanyda Ebungngona leiba matamda, kusthi thungba Simon-gi yumda luk haba phamlingeida, nupi amanaa ashengba naadki mamal yaamlaba teinathaao haappa angouba nungphu amaa puduna laakle. Mahaakna nungphu adu thugaay-raduna ebungngogi kokthakta heithabire.
4 Aduga makhoy masen-gi marakta nungaaitaba leiba kharana haayrak-e, teinathaao mangba asi kari maramgidamakno?
5 Maramdi teinathaao asi silver shekels 300 Dagi henna yonthoklaga laairaba-shingda piba yaaram-gadabani. Amasung makhoyna mahaakki mathakta murum murum sonnarammi.
6 Touegumsung Jesusna haayrak-e, leijasanu; nakhoyna mahaakpu karigidamak otlibano? Mahaakna eingonda aphaba thabak toubire.
7 Maramdi laairaba-shingdi etat tattana nakhoyga leiminnei, aduna nakhoyna touningba matam khudingmakta makhoyda aphaba touba yaai; touegumsung eidi etat tattana nakhoyga leimin-nabaa natte.
8 Mahaakna ngamjaba adu toujare; phumnaba-gidamak eigi hakchaang maangjounana mahaakna thaao teibire.
9 Amasung eina nakhoyda thaanggei shengna haayribani, taaibang-paal apumbaa sin-thungna aphaba waapaao shaandokkadaba mapham khudingmakta nupi asina toukhiba adusu maabu ningshing nanaba-gidamak ngaangthokkani.
10 Amasung taraanithoigi maraktagi amaa, Judas Iscariot aduna athoiba purohit shinggi maphamda ebungngobu pithoknaba chatthokkhre.
11 Aduga makhoyna madu taaraga, haraaoduna maangonda shel pinaba waa leple. Amasung mahaakna ebungngobu karamna khudong chaana pithokpa yaana-naba thiramli.
Ekon konba chaakkhang
( Matthew 26.17-25; Luke 22.7-14,21-23; John 13.21-30 )
12 Amasung haamei yaaodaba tal chaakkhaangbagi ahaanba numitta, araan-chaakkhaangbagi yaao machaa haatpa matamda, ebungngogi sebokshingna hanggat-charak-e, Ebungngona araan-chaakkhaangba adu hananaaba eikhoyna chattuna kadaayda thouraang shemjaba Ebungngona paambibage?
13 Maduda Ebungngona sebokshinggi anibu thaaduna makhoyda haay, saaharda changu, amasung mi amanaa eeshing-pul puduna nakhoybu oknagani; mahaakki tung ellu,
14 Aduga mahaakna changkhiba yum adugi mapuda haayyu, ojaana haay, eina eigi sebokshingga loynanaa araan-chaakkhaangba chaananaba eigi ka adu kadaaydano?
15 Amasung mahaakna mapot machei shunaa laanglaba mathak thangba ka achouba amaa nakhoybu uhan-gani; mapham aduda eikhoygidamak thouraang tou.
16 Maduda sebokshingna chatthokkhiduna saaharda changlaga, Jesusna makhoyda haaykhiba adugumna phangle; amasung makhoyna araan-chaakkhaangba thouraang toure.
17 Amasung numidaang oirakpada Ebungngona taraanithoi aduga loynanaa laak-e.
18 Aduga makhoyna phamduna chaaringeida Jesusna haayrak-e, eina nakhoyda thaangei shengna haayribani, nakhoygi naraktagi amana, eigaa chaaminnariba aduna, eibu pithokkani.
19 Makhoyna waaraduna ebungngoda amam-mam oinaa haayba hourak-e, einara?
20 Maduda Jesusna makhoyda haayrak-e, pukham amatada eigaa loynanaa khut lupminnariba taraanithoigi amani.
21 Maramdi migi machaanupa aduna maagi maramda ekhiba adugumna chatlibani, touegumsung migi machaanupa adubu pithokpa mi aduda awaabanida! mi aduna poklam-dragadi magidamak pharamgadabani.
22 Amasung makhoyna chaaringeida Ebungngona tal louduna bor piraga madu thugaayre, amasung makhoyda piduna haay, nakhoyna lou; maasi eigi hakchaangni.
23 Aduga Ebungngona tenggot louduna thaagat-charaga makhoyda pire, amasung makhoy pumnamakna madudagi thakle.
24 Aduga Jesusna makhoyda haayrak-e, maasi waalepnaba adugi ayaamba-gidamak taabikhraba eigi eeni.
25 Eina nakhoyda thaanggei shengna haayribani, Eeshorgi leibaakta eina anouba thakkadaba numit adu oidriba phaaoba eina angur maheidagi amuk thaklaroi.
26 Aduga makhoyna eshei shaklaga Mount of Olive chingda chatthokkhre.
Sebokshingna Jesusbu thaadokkadaba adu Ebungngona maangjounana khanghanba
( Matthew 26.31-35; Luke 22.31-34; John 13.36-38 )
27 Amasung Jesusna makhoyda haay, nakhoy pumnamak khudi thiba thokkani, maramdi maasi ekhrabani, eina yaaoshenbabu yeithugani, amasung yaao shanggu adu echaai chaai-thoklagani.
28 Touegumsung eibu hinggat-piraga eina nakhoydagi haanna Galileeda chatkani.
29 Adubu Peterna ebungngoda haayrak-e, pumnamakna khudi thiba thoklagasu eidi thiba thokcharoi.
30 Maduda Jesusna maangonda haay, eina nangonda thaanggei shengna haayribani, ngasi ahing asida yen-laabana anirak khongdringeida nahaakna eihaakpu ahumlak yaaramloi.
31 Touegumsung mahaakna henna henna kanna haayrammi, eina ebungngoga loynanaa shiba phaaoba taarabasu eidi ebungngobu yaadaba suptou toujaroi. Aduga adugumna makhoy pumnamaknasu haayrammi.
Gethsemaneda Jesusgi awaaba amasung Jesusbu phaaba
( Matthew 26.36-46; Luke 22.39-46 )
32 Amasung makhoyna Gethsemane kouba maphamda laak-e; amasung Ebungngona sebokshingda haay, eina haayja-ringeida nakhoy asida phamlamu.
33 Aduga Ebungngona mahaakka loynanaa Peter, James amasung John pure, amasung yaamna ngaakpa amasung pukning olaang onshaaonaba houre.
34 Aduga Jesusna makhoyda haay, eigi thawaay shigadouba makhei waare, nakhoy asida leiduna mitsheng khaang-u.
35 Amasung Ebungngona manglom khara chatlaga, leibaakta tuthaajaduna, maasi oiba yaarabadi, pungpham asi ebungngodagi laanthoknaba haayjarak-e.
36 Aduga, abba, epa, pumnamak ebungngogi maphamda engam ngambani; tenggot asi eingondagi louthok-piyu; touegumsung eigi ningba oidaduna ebungngogi ningba oibiribani, haayna Ebungngona haayjei.
37 Amasung Ebungngona laakpada makhoy tumlammi, aduga Peterda haay, Simon, nang tumlibra? Nangna pung amaa mitsheng khaangba ngamdra?
38 Nakhoyna athembada taadanaba mitsheng khaangduna haayjou; thawaaynadi maning-e, touegumsung hakchaangnadi sholli.
39 Aduga amuk haanna Ebungngona chatthokkhiduna, chap mannaba waahei haayduna haayjei.
40 Amukka Ebungngona seboksinggi manakta laakpada makhoyna tumduna leiramba thengnare, maramdi makhoygi mamit yaamna lumtharammi; amasung makhoyna ebungngoda kari khumjagadage khanglamde.
41 Aduga Ebungngona ahumlak-shuba oinaa laaktuna makhoyda haay, houjiktagidi tumduna potthajaro; okle; pungpham adu laakle; yeng-u, migi machaanupa adubu paap chenbashinggi makhutta pithok-e.
42 Hougat-lu, eikhoy chatlasi, yeng-u, eibu pithokpa mi adu nakle.
43 Amasung khudak adumaktada Ebungngona waa ngaanglingeida Judas Iscariot, taraanithoigi amaa adu laak-e, amasung athoiba purohit shingdagi, shaastragi ojaashing amasung ahallaman shingdagi kabaak-thaangga cheiga paayba miyaam maaga loynari.
44 Ebungngobu pithokpa mi aduna makhoyda khudam amaa piduna haayrammi, eina chupkadaba mahaak aduni; maabu phaaraga chetna touduna chingthokkho.
45 Amasung mahaakna laaklabada ebungngogi manaakta hek changlaak-tuna haay Rabbi; aduga ebungngobu yaamna chuple.
46 Maduda makhoyna ebungngobu khut-phang-nana phaare.
47 Aduga manaakta leplamba makhoy adugi kanaagumba amanaa maagi kabaak-thaang shattuna, purohitlen-gi minaai adubu yaallakpada manaa shoidatle.
48 Amasung Jesusna makhoyda khumlak-e, daakubu phaaga-dabagumna kabaak thaangga cheiga loynanaa eibu phana-naaba nakhoyna thoklaklabra?
49 Numit khuding eina Ningnashangda tambiduna nakhoyga loynanaa leiramlabasu nakhoyna eibu phaade. Touegumsung maasi shaastragi waa thungna-nabani.
50 Amasung makhoy pumnamakna ebungngobu thaadoktuna chenkhre.
51 Amasung kanaagumba paakhang amanaa phi yaaodaba mashaada leemon phi amaa enduna ebungngogi tung elle; aduda makhoyna mahaakpu phare;
52 Adubu mahaakna leemon phi adu thamlamduna maphi yaaodana makhoydagi chenkhre.
Purohitlen-gi maangda Jesusbu waayenba
( Matthew 26.57-68; Luke 22.54,55,63-71; John 18.13,14,19-24 )
53 Amasung makhoyna Jesusbu purohitlen-gi maphamda pukhatkhre; aduga athoiba purohit shing, ahallaman shing amasung shaastragi ojaashing pumnamakna mahaakka loynanaa tinnare,
54 Amasung Peterna purohitlen-gi sumang manung phaaoba ebungngogi tung thaaplaapna enkhi aduga phamnaaibashingga meingaanda phamminnaduna mei tiklammi.
55 Aduga athoiba purohit shingga ahallup apun-bagana Jesusbu haatna-naba mathakta saakhi thirabasu phanglamde.
56 Maramdi ayaambana ebungngogi mathakta araanba saakhi pirammi, amasung saakhi adu eman mannaramde.
57 Amasung mi kharana hougattuna ebungngogi mathakta minamba saakhi pirak-e,
58 Madudi, eina Ningnashang, khutna shaaba asi maanghallaga numit humnigi manungda khutna saadaba atoppa amaa saabigani, haayduna mahaakna haayba eikhoyna taay.
59 Aduga asum haayrabasu makhoygi saakhi emaan mannade.
60 Amasung purohitlenna mayaaida lepkhattuna Jesusda hanglak-e, nahaak kari amata khumloidra? Nanggi nathakta mishing asina saakhi piriba asi karino?
61 Touegumsung Ebungngona tuminna leiduna karisu khumdre. Amukka purohittlenna ebungngoda hangduna haay, thaagatkadaba Mapu adugi machaanupa Christa adu nahaakla?
62 Maduda Jesusna haayrak-e, Ei-makni; aduga migi machaanupa aduna matik chaaobagi khut yetthangbada phamba amasung swargagi leichinlakta laakpa nakhoyna ugani.
63 Maduda purohitlenna maphi shegaairaduna haay, asidagi henna eikhoyna saakhi louba kari kaannabano?
64 Eeshorbu thina ngaangba adu nakhoyna taare; nakhoyna kari khanbage? Amasung makhoy pumnamakna shiba matik chaay haayduna ebungngobu araanba taahalle.
65 Aduga kharana ebungngoda tin sitchinba, maay khumbiba, khudumna shuba, amasung kanaana nangbu phubage haayyu haayba houre. Amasung phamnaaibashingna ebungngobu khubaakna thaaduna lousille.
Peterna Jesusbu yaadaba
( Matthew 26.69-75; Luke 22.56-62; John 18.15-18,25-27 )
66 Amasung Peterna makhaada sumangda leiringeida; purohitlen-gi minaai leishaabi amaa laak-e;
67 Amasung Peterna mei tikpa ubada mahaakpu yenglaga maangonda haay, nangsu Nazarethki mi, Jesus aduga loynarambani.
68 Touegumsung mahaakna yadaduna haay, nangna haayriba adu eidi khangsu khangde, bhapsu tade. Amasung mahaakna maangonda chatthokkhre; aduga yen-laabana khongle.
69 Aduda leishaabi aduna mahaakpu uduna manaakta leppashingda amuk haayba houre, mi asi makhoygi maraktagini.
70 Adubu mahaakna amuk yaadre aduga ngaaihaak leiraga manaakta leppa-shingna Peterda amuk haayrak-e, aoibamk nang makhoygi maraktagini; maramdi nangdi Galileegi mini.
71 Touegumsung, nakhoyna ngangnariba mi asibu ei khangde, haayduna mahaakna mashaabu siraap toujaba amasung shari shonba hourakle.
72 Aduga khudak adumaktada yen-laabana anirak-shuba oinaa khongle. Amasung yen-laabana anirak khongdringeida nangna eibu ahumlak yaaramloi, haayna Jesusna karamna maangonda haaykhi haayba waa adu Peterna ningshinglakle. Amasung mahaakna madu khanbada kappa houre.