Matthew 13

Sarga leibakki maramda Jesusna piba pandam taret maru hunba

( Mark 4.1-9; Luke 8.4-8 )

13 Numit adumaktada Jesusna yum adudagi lengthoklaktuna samudra mapanda phamle. 2 Amasung miyam yamna Ibungoda tillare, aduna Ibungona hi amada lengsinduna phamlammi; aduga miyam apumbana samudra mapanda leplammi. 3 Amasung Ibungona makhoida pandam piduna wa yamna nganglak-i, Madudi, yengu, maru hunba mi aduna hunba thoklakle. 4 Amasung mahakna asum hullakpada maru kharana lambigi mapanda taraduna ucheksingna laklagachathokkhi. 5 Aduga kharana leipak kaya yamna leitaba nunglakta tai, amasung leipak luna leitabagi maramna thuna hourakle. 6 Aduna numit karakpa matamda madu pumba khuithare, amasung mara leitaba maramna kangsu kangsille. 7 Aduga kharana tingkhang marakta tai, amasung tingkhang adu houraktuna madu pumbabu namhatli. 8 Touigumsung ateisingdi aphaba leipakta taduna, kharana saruk chama, kharana humphu, kharana kunthra mahei palli. 9 Manakong panba mahak aduna tajasanu.

10 Matung aduda seboksingna Ibungoda laktuna haijei, Ibungona karigi pandam piduna makhoida ngangbibage? 11 Aduga Ibungona makhoida khumlak-i, sarga leibakki athuppa wa khangnanaba nakhoida pibirabani, adubu makhoidadi pibide. 12 Maramdi areiba mahak aduda pibigani, aduna mahakki thoina henna leijagani; Touigumsung leitaba mahak adudagi mahakki leijaba adu phaoba louthokkhigani. 13 Maram asidagi eina makhoida pandam piduna nganglibani, maramdi makhoina yengdunasu ude, tadunasu tade, amasung khangde. 14 Aduga Isaiahgi takthokpa wa asi makhoida thungli.

      "nakhoina tabadi tagani, aduga supkhang khangloi; amasung ubadi ugani, aduga wakhaldi supta taroi.

15 Maramdi makhoina mamitna uba, manakongna taba, makhoigi pukningna khangba, amuk onsillakpa amasung eina makhoibu phahanba yadananaba, mishing asigi pukning pangsinkhre, makhoigi mana tathire, amasung makhoigi mamit uisille."

16 Touigumsung nakhoigi namit yaiphabani, maramdi nakhoina ujei, amasung nakhoigi nanakong yaiphabani, maramdi nakhoina tajei. 17 Maramdi eina nakhoida thanggei sengna hairibani, Ishorgi wa takthokpa amasung dharmachenba ayambana nakhoina uba adu uninglammi, adubu ukhide; aduga nakhoina taba adu taninglammi, adubu takhide.18 Adu oirabadi nakhoina maru hunbagi pandam asi tao. 19 Kanagumba amana sarga leibakki wapao taraga, madu khangdrabada, phattaba aduna laktuna magi thamoida hunkhiba adu louthokkhi; lambi mapanda hunba aduna mahak asini. 20 Aduga nunglakta hunba mahak aduna wapao adu taraga, thuna haraona loujei; 21 Adumnadi oiraga mangonda mara leitabana, ngaihaktamak khangi; Touigumsung wapao asigidamak awaba taba nattraga otneiba phanglaba matamda, mahakna thuna khudi thiduna tui. 22 Aduga tingkhang marakta hunba mahak aduna wapao adu tai, aduga taibangpanbagi wakhal amasung  lan-gi lounamna wapao adubu namhattuna, mahak mahei yandaba oirak-i. 23 Aduga aphaba leipakta hunba mahak adudi wapao adu taduna khangi, mahakna lepnamak mahei yanduna, kharana saruk chama, kharana humphu, kharana kunthra henna thok-i.

Napi maru

24 Ibungona makhoida atoppa pandam ama piduna hairak-i, sarga leibak adu magi loubukta aphaba maru hullamba mi amaga changdamnei. 25 Touigumsung mishingna tumlingeida mahakki yeknabana laklaga, gehugi marakta napi marusu hullamduna chatkhre. 26 Adubu mapambi chaoraktuna mahei panba matamda, napi marusu ure. 27 Aduga yumbu adugi minaisingna laktuna mangonda hai, Ibungo, nahakna aphaba maru nahakki loubukta hullamba nattra? Adu oirabadi, napi maru leiriba asi kadaidagino? 28 Aduda mahakna makhoida hai, yeknaba amana masi touramlabani! minaising aduna mangonda hai, adudi eikhoina chattuna madu peisillu haibara? 29 Touigumsung mahakna hai, peisilluganu, adu nattrabadi, nakhoina napi maru pengthokpada maduga loinana gehu adusu phuktokpa yai. 30 Gehu loktriba phaoba animak houminnarasanu, amasung lokpa matamda eina akhaobasingda, napi adu hanna khomjinduna mei thanaba mapun oina punllu, aduga gehu aduna eigi keida peisillu haigani.

Hanggam maru, hamei

( Mark 4.30-32; Luke 13.18-21 )

31 Ibungona atoppa pandam ama piduna makhoida hairak-i, 

sarga leibak adudi, mi amana louduna mahakki loubukta hullamba hanggam maru amagumbani. 32 Maduna maru ateidagi henna pik-i, Touigumsung hourakpa matamda atei mana mashingdagi henna chaoraktuna upambi ama oirak-i; aduna atiyagi ucheksingna pairaktuna magi masasingda mahum sarei.

33 Ibungona atoppa pandam ama makhoida hairak-i, 

sarga leibak adudi, nupi amana yam chang ahumda, pumnamak adu kamkhattriba phaoba, louduna happa hamei adugumbani.

34 Jesusna hiram pumnamak asi miyamda pandam oina nganglammi, amasung Ibungona pandam yaodana karisu nganglamde;

35 Maduna Ishorgi wa takthokpabu haihankhiba adu thungba yananabani, haibadi,

      "Eina pandam oina ya kakhattuna nganggani, taibangpal houngeidagi lotliba pumnamak adu eina haidokkani."

36 Adugi matungda Jesusna miyam adubu thadoklamduna, yum adugi manungda lengsille; amasung Ibungogi seboksingna laktuna Ibungoda hai, loubukki napi marugi pandam adu eikhoida phongdokna takpiyu, 37 Aduda Ibungona khumlak-i, aphaba maru hunba mahak adu migi macha nipa aduni; 38 Loubuk aduna taibangpanni; aphaba maru adu makhoidi ningthou leibakki macha nipasingni; napi maru aduna phattaba adugi macha nipasingni; 39 Makhoibu hunba yeknaba aduna diyabolni; lokpa matam aduna taibangpanbagi aroibani; aduga akhaobasing aduna sargadutni. 40 Maram aduna napi adu khomjillaga meida thajinbagumna taibangpanbagi aroibada matou adugumna oiragani. 41 Migi macha nipa aduna mahakki sargadutsing tharaktuna, khudi thihanba pumnamak amasung ayol aral toubasingbu Ibungogi leibaktagi khomjinduna makhoibu meigi komda langsin-gani, 42 Mapham aduda kappa amasung maya krak krak chikpa oigani. 43 Matam aduda dharma chenbasingna makhoigi mapagi leibakta numitkumna nganthokkani. Manakong panba mahak aduna tajasanu.

Aronba lan, mukta, in

44 Sarga leibak adu loubukta lotpa lan-gumbani; madu mi amana phangjaraduna lotle, amasung haraona chatkhiduna mahakki leijaba pumnamak yonthoklaga, loubuk adu leijei.

45 Amukka, sarga leibak adu aphaba mukta thiba lallonba mi amagumbani; 46 Amasung mamal yamlaba mukta ama phangjaduna, chatkhraga mahakki leijaba pumnamak yonthoktuna madu leijare.

47 Amuksu, sarga leibak adu samudrada hunba, nga jat khudingmak khomjinba in amagumbani; 48 Maduna thallaba matamda makhoina samudra mapanda chingkhatle, aduga phamtharaduna aphaba makhei tunggonda khumjille, Touigumsung phattaba makhei hundokkhre. 49 Taibangpanbagi aroibada matou adugumna oiragani. Sargadutsingna laktuna dharmachenba-singgi maraktagi phattabasingbu khaidoklaga, 50 Makhoibu meigi komda langsin-gani. Mapham aduda kappa amasung maya krak krak chikpa oigani.

51 Maram pumnamak asi nakhoina khanglabra? Makhoina Ibungoda hairak-i. Hoi. 52 Aduda Ibungona makhoida hairak-i, maram aduna sarga leibakta sebok oihalraba sastragi oja khudingmak mahakki lan-geidagi anouba amasung ariba potsing puthoklakpa yumbu amagumbani,

Nazarethta Jesusbu yabidaba

( Mark 6.1-6; Luke 4.16-30)

53 Amasung asum thoklare, Jesusna pandamsing asi haiba loiraga, mapham adudagi lengthokkhre.

54 Aduga Ibungona masamakki khunda lengduna, makhoigi loishangda asumna makhoibu tambirammi, maduda makhoina ngakladuna hairak-i, nipa asigi lousing amasung toungamdaba thabaksing asi kadaidagino? 55 Masi u suba adugi macha nipa nattra? Mahakki mamadu Mary koudra? Aduga manaosingdi James, Joseph, Simon amasung Judas nattra? 56 Machansing pumnamaksu eikhoiga leiminnariba nattra? Adu oirabadi, nipa asida pumnamak asi kadaidagino? 57 Matou asumna makhoina Ibungoda khudi thire. Touigumsung Jesusna makhoida hai, Ishorgi wa takthokpa mibu mahakmakki mareibakta amasung mahakmakki imung manungda nattana ikaikhumnadaba natte. 58 Amasung makhoigi thajadabagi maramna mapham aduda Ibungona tougamdaba thabak yamna touramde.