Genesis 47

1 Asumna Josephna changshinkhraga Pharaohda haayrammi, "eigi epaga echin-enaaoshinggana makhoygi areiba haameng yaaogi shanggu, shaa-san amadi makhoygi areiba pumnamak puduna Cannan-gi lamdagi laakle. Makhoy houjikti Goshen-gi lamda leiri."

2 Mahaakki machin manaaoshinggi manungdagi mangakhak puduna Pharaohda chathallammi.

3 Pharaohna Josephki machin manaaoshingda haayrammi, "nakhoygi sinpham karino?" makhoyna pharaohda haayrammi, "eikhoigi epa epushinggi hantaktagi haameng yaaoshenba oinaa hourakpa maramna nanaai eikhoysu haayriba sinphamsi toujei."

4 Makhoyna pharaohda haayrammi, "leibaksida nanaai eikhoy shaaidaangjage haayduna laakcharibani. Thoidokna chaak tangba asida Cannan-gi lamduda nanaai eikhoygi haameng yaaonachingba shanggushingsi shajik pijanaba mapham amatta leitre. Maramsina nanaai eikhoyna nollukna haayjari nanaai eikhoyda Goshen-gi lamsi pinabiyu."

5 Maasida Pharaohna josephta haayrammi, "Nahaakki napaa amadi nachin nanaaoshingna nahaakki nakada changjarakle.

6 Egypt kouba lamsi nahaakki nakhutta leiribani. Leibaaksigi Khwaaidagi pharaba lamduda nahaakki napaa amadi nachin nanaaoshingsi leihallu. Makhoy Goshen-gi lamduda khundahallu Karigumba nahaakna matik chaaba mi makhoygi maraktagi khandokpa ngamlabdi eigi shaa-sanshingbu yengshinnaba happu."

7 Masigi matungda Josephna mapaa Jacobpu Pharaohgi maangda puraklaga ekaai-khumnaba uthanlammi. Jacobna Pharaohbu bor pirammi.

8 Pharaohna Jacobta haayrammi. “nahaak chahi kayaa surabage?"

9 Jacobna Pharaohda khumlammi, "eina taaibang maalemsida leiraklibasi chahi 130 shure. Eigi punsida ngasi phaaoba thoina awaaba nanglaktri. Asi youraba phaaobada eigi epa epushingna taaibang chinjaak chaakhiba matamdu youdribani."

10 Jacobna maasi haayraduna bor piramlaga Pharaohgi konung thaadoktuna chatkhi.

11 Josephna mapaa amadi machin manaaoshingdu leitaana leinanaba mapham amaa pirammi. Pharaohna yaathang pikhiba matung ennaa makhoyna Egyptki manungda Khwaaidagi phaba Ramseski lamda leipham pikhi.

12 Josephna mapaa amadi machin manaaoshinggi emunggi mi matung ennaa chaananaba matik chaana pikhi.

13 Matamduda maalemsi shinba thungna chinjaak phangdaba houraklammi. Chaak tangbadu asukki matik tamthirammi Egypt amadi Cannan-gi lamshingsidasu chengchak loisinba houraklammi.

14 Josephna Egyptta leiriba mishingdagi peisa khomgatlammi. Canaandagisu asumna peisa khomgatlammi. madugi Mahut oinaa makhoyna cheng pirammi. Josephna peishaashingdu Pharaohgi mayumda puraklammi,

15 Egyptta amadi Canaanda leiramba mishinggi peishaashingdu loina chading toukhrabada, Egyptki mishingna Josephta laaklaga eikhoygi chinjaak pibiyu, eikhoy chaaba phangdaduna ebungngogi maangda karigidamak sirugadage' eikhoygi khutta peisa leitre haaybasinachingba waashingsi haayjarammi.

16 Maduda Josephna haayrammi, "nakhoygi shaa-sanshingdu eingonda pirabadi mamal oinaa eina nakhoyda chinjaak piba ngamgani. Maasi makhoygi peisa letre haaybasi khangbadagi haaybatani."

17 Maramsina makhoyna shaashingdu Josephki manaakta puraklammi, Josephna haameng yaaogi shanggu, shaa-sangi shanggu amadi lolashinggi mahut oinaa makhoyda chinjaak pikhi. Haayriba chahiduda mahaakna makhoygi shaashingduga shinnaduna chinjaak pibirammi.

18 Haayriba chahisi loikhraba matungda chatliba chahiduda makhoyna Josephki maphamda laaklaga haayrammi, eikhoyna ebungngogi maphamda karisu lotpa leiroi. Eikhoygi peisa, amadi shaashing loina ebungngogi khutta leire. Ebungngona uribasi mangaire eikhoygini haayna karisu leitre. Leiriba haaybabu eikhoy esha amadi lamshingsi mangaire.

19 Eikhoy eshaamak amadi eikhoygi lamshingsi yonjarage aduga chinjaak pibiyu. Eikhoy eshaamak amadi lamshingsi Pharaohgi khutta minaai oinaa loushinbiro. Eikhoy Shidanaba mahei marong pinabiyu. Adu oirabadi lamshingsi leikangladi oidaba yaai.

20 Matou asumna Egyptki lamshingdu pharaohgidamak leishinkhi. Chaak tangbadu asukki matik tamthirammi Egyptta leiriba mishingna makhoygi louchashingdu yonba taakhi. Lamshingdu Pharaohgi oikhirammi,

21 Egyptki ngamkhei thungna leiriba mishingdu Pharaohgi minaai oikhi.

22 Mahaakna leikhidaba lam haaybabu purohit shingna leiribadudani. Thoidokpa maramdi Pharaohna purohit shingduda talab pirammi. Maramsina makhoyna lamshingdu yonkhide.

23 Masigi matungda Josephna mishingda haayrammi, "yeng-u, ngasidi nakhoy nashaamak aduga nakhoygi lamshing Pharaohgidamak oikhrabani. Maphamsida marudu leire. Maasi louduna nakhoygi loubukta hullo.

24 Lourokpa matamda mangaa thokpagi amaa Pharaohgi oigadoubani. Mangaa thokpagi maridi nakhoygi oigadabani. maduna nakhoygi hunnaba maru nakhoygi emung manunggi chaanaba aduga nakhoygi nachaashinggi chaanaba oigadoubani."

25 Makhoyna haayrammi, nahaakna eikhoygi punsi kanbire maramsina yeng-u Ebungngona pennanaba nanaai eikhoy Pharaohgi minaai oijagani."

26 Matou asumna Josephna Egyptta niyaam amaa oinaa haayribasi chatthakhi. Maasi ngasi phaaoba chatnari. Houjik phaaoba Pharaohna mangaa thokpagi sharuk amamam phangli. Masigi manungda chankhidaba haaybabu Purohit shingna leiriba lamshingdudani.

Jacobki aroiba asa

27 Matou asumna Israelna Egyptki lam Gosenda leirammi. Makhoygi sharuk thungduna maphamduda yaamna maraang kaina mahei marong loktuna paanba hourammi.

28 Egyptta Jacobna chahi 17 Leikhi. Jacob chahi 147 punsikhi.

29 Israelna shigadouba matam naksillaklabada machaanupa Josephpu kouraduna haayrak-e, "karigumba nahaakna eibu nungshirabadi nahaakki nakhutta eigi ephaigan makhaada thammu. Eina ningbadu nahaakna kaidana paangthokkani haayna waashak-u. Egyptta eibu phumbiganu. 

30 Eigi epa epugi manaakta eibu phumbiyu. Egypttagi eibu puduna makhoybu phumkhiba maphamduda eibusu phumbiyu. "Mahaakna khumkhi, "nahaakna apaambadu eina shoydana tougani."

31 Mapaana maangonda haayrammi, "adu oirabadi nahaak waashak-u. Josephna waashaklammi, "masi haaynaba loiraga Israelna lukhumlomda marai lukthakhirammi.