2 Corinthians 4

Aaphaaba waapaao saandokpada thounaaphaaba amasung pukchel tingba

4 maram aduna eikhoyna nungsibiba phangbagi matung enna, thougan toujaba asi phangbagi maramna, eikhoyna sonthade. 2 touegumsung eikhoyna marei mara touna chattaduna, adugaa Eesor-gi waa minamna sijinnadaduna, achumba uhanbagi mapaanna Eesor-gi mityengda mi khudinggi achum-aran khangnaba pukningda eikhoy esa isabu khanghanjaduna, ekaaibagi arot arotpa thabak eikhoyna thaadokle. 3 Amasung eikhoygi aphaba waapaaosu khumjillabadi, manglibasingda khumjinbani. 

4 Eesor-gi murti oiriba Christagi matik mangaangi aphaba waapaaogi mangaan adu nganthoktaananaba, makhoygi marakta thaajadabasinggi pukningbu taaibang-paanda laaina mit tanghalle. 5 maramdi eikhoyna eikhoy esa isabu saandokpa natte, adubu Christa Jesus-na Eesorni, adugaa eikhoy esaana Jesus-gi maramgi damak nakhoygi nanaaini haayna saandokpani. 6 maramdi, amaambadagi mangaan nganbigani, haaykhiba Eesor aduna Christagi maaythongda Eesor-gi matik mangaangi akhangba adugi mangaan adu pinanaba, eikhoygi thamoi nungda ngaan-bire.

Paulgi asonba amasung Eesor-gi paanggal

7 touegumsung paanggalgi thoidok hendokpa adu eikhoy esa ethantadagi oidaduna, Eesor-gi oinanaba, eikhoyna leipakki phuda laal asi libani. 8 eikhoybu maaykei khudingdagi chapsilli, adubu chinde; eikhoyna khoiraangli laangi, adubu chamamnade; 9 eikhoybu otneibi, adubu thaadokpide; hunthei adubu mangde; 10 Jesus-gi hingba adusu eikhoygi hakchaangda phongna-naba, Jesus-gi siba adu hakchaangda matam leiba khibikta eikhoyna koipu puri. 11 maramdi Jesus-gi hingbu adusu eikhoygi sigadaba esaada phongna-naba, Jesus-gi maramgi damak hingliba eikhoybu matam leiba khibikta sibada pithokli. 12 adunadi sibana eikhoyda, adubu hingbana nakhoyda thabak touri. 

13 touegumsung, eina thaajare, maram aduna eina ngaangle, haayna ekhraba adugi matung enna, thaajabagi mannaba thawaay eikhoyda leibanina eikhoynasu thajari, maram aduna eikhoynasu ngangli; 14 maramdi ebungngo Jesus-bu hinggatpiraba ebungngo mahaakna eikhoybusu Jesusga loynanaa hinggatpigani, amasung nakhoyga loynanaa eikhoybu lephanbigani haayba eikhoyna khang-e, 15 maramdi ayaambagi mapaanna yaamkhatlaba thoujaanna Eesor-gi matik mangaangi damak thaagatchaba yaamhannanaba, nakhoygi maramgi damak maram pumnamak oiri.

Ngaihakki oiba awaa-anaang amasung lomba naaidaba matik mangaan

16 maram adugi damak eikhoyna sonthade; adubu eikhoygi mapaanthangba mi adu manglabasu, eikhoygi manungthangba mi adudi nongma nongmagi nourak-e. 17 maramdi ngaai-haakki oiriba eikhoygi ayaangba awaa-anaang aduna eikhoygidamak matik mangaangi lomba naaidaba chaang henna henna yaamna thokhalli; 18. eikhoyna ubaa pot aduda yengdaduna, udaba pot aduda yenglingeida maadu thok-hanbani maramdi ubaa pot adu kuina leite, adubu udaba pot adu lomba naaidaba lei.