Revelation 1

Johnda Phongdokpiba waa

Waahoudok amasung khurumjaba

1 shoydana thuna thokkadaba waaram, Jesus Christana ebungngogi manaaishingda utpinanaba Eeshorna ebungngoda pibiraba phongdokpiba asini; aduga Ebungngona ebungngogi dut thabiduna manaai Johnda maasi khanghanbire;

2 Mahaakna Eeshorgi waagi amasung Jesus Christagi saakhigi maramda, haaybadi, mahaakna ukhi ukhiba pumnamakki maramda saakhi pire. 

3 Taakthokpagi waashing, asi khon thokna paaba mahaak amasung taaba makhoy, aduga madugi manungda ekhi ekhiba adu ngaakpa makhoy yaaiphabani; maramdi matam adu nakle.

4 Johnna Asiada leiba shinglup taretki maphamda ebani: 

oiriba, oiramba amasung laakkadouriba ebungngo maangondagi, ebungngo mahaakki phambaal maangda leiriba thawaay tarettagi,

5 Amasung thaajaba yaaba shakkhi, ashibashingdagi ahaanba pokpa, amasung Prithibigi ningthoushinggi mapu oiba Jesus Christadagi thoujaal amasung engthaba nakhoyda leibisanu. Eikhoybu nungshibiba, ebungngogi, eena eikhoygi paaptagi eikhoybu thaadokpiraba;

6 Aduga eikhoybu ningthou-leibaak amasung ebungngogi mapaa Eeshorgi maphamda purohit shing oihanbiba ebungngoda matik mangaan amasung paanba adu loyba naaidaba oisanu. Amen.

7 Yeng-u, ebungngodi leichin-ga loynanaa laak-e; aduga mit khudingna amasung ebungngobu tana thinkhibashing aduna ebungngobu ugani; aduga Prithibigi jaat pumnamakna ebungngogi maramda waabana thabak yeinagani. Hoy, Amen. 

8 Oiriba, Oiramba amasung laakkadouriba, engam ngamba Eeshor aduna haay, eidi Alpha amasung Omega aduni.

Migi machaanupagi maramda uhanbiba

9 Nakhoygi nachin nano amasung Jesusgi marida awaa-anaang, ningthou-leibaak, amasung khangheibagi sharuk nakhoyga phangminnaba John eina Eeshorgi waagi amasung Jesusgi saakhigi maramda Patmo kouba ethatta leirammi.

10 Ei Eeshorgi numitta thawaayda leirammi, aduga pereshinggagigumna achouba khonjen amanaa etungda asi haayba eina taare,

11 Nahaakna uriba adu laairikta esinduna shinglup taretta, haaybadi, Ephesianda, Smarnada, Pargamada, Thyatirada, Sarddida, Philadelphiyada amasung Layodikeyada mudu tharo. 

12 Amasung eingonda ngaangba khonjen adu unanaba eina olLarnmi. Aduga ollaklaga eina sanaagi thaaoumei makhong taretpu,

13 Amasung thaaoumei makhongshing adugi mayaaida migi machaanupa maanba, khumit thumna phi thollaba aduga sanaagi khwaangjetna thabak akoybada thollaba amabu ure.

14 Amasung makokka mashamga angouba shaa matugum, un-gum ngouwi; aduga mamitna meigi meirigummi,

15 Amasung makhong khongdonna meiphamda phudonglaba ningthijaba pithraai gummi; aduga mahaakki khonjenna eeshing mayaamgi eraokhon gummi.

16 Amasung makhut yetta thawaan-michak taret lei, machindagi athouba maya ani paanba kabaak-thaang thok-e, aduga mahaakki maaythongdi yaamna nganba numitkummi. 

17 Amasung eina ebungngobu ujabada, ashibagumna eina ebungngogi khuyaada tuthajare. Aduga Ebungngona makhut yetna ethakta thambiduna haay, kiganu; eidi ahaanba amasung Akonba,

18 Aduga hingliba aduni; amasung eidi sirakle, aduga yeng-u, eidi loyba naaidana hingli, amasung shibagi aduga khamnung leibaakki sho eingonda lei.

19 Maram aduna nahaakna ukhi ukhiba adu, oiri oiriba adu amasung asigi matungda thokla thoklagadaba adu eyu;

20 Eigi khut yetta nahaakna ukhiba thawaan-michak taret amasung sanaagi thaaoumei makhong taret adugi athuppa waa adudi: thawaan-michak taret adudi shinglup taret adugi dutshingni, aduga thaaoumei makhong taret adudi shinglup taretni.