Acts 27
Rome chatnaba Paulgi hi khongchat; Kritta laakpa
1 Amasung eikhoyna Itali youna hi tongnaba lepnarabada, makhoyna Paulbu amasung atei kanaa kanaagumba keishumshangda thamliba mishingbu ningthouren-gi laanmi kaanglupki chaammagi mapu Juliya kouba amada pithokle.
2 Aduga Asiagi mapaanda leiba mapham maphamda hongadouriba Adramuttiyagi hi amada tongduna, eikhoyna samudrada shaandoklakle; amasung Thessalonicada leiba Macedoniagi mi Aristarchusna eikhoyga loynarammi.
3 Mathanggi numitta eikhoyna Sidonda hi thanglaga, Juliyana Paulbu yaamna channa toubiduna, mahaakki marup mapaangshinggi maphamda chattuna nungaaihannaba mahaakpu thadopki.
4 Aduga mapham adudagi samudrada shaandoklakpada, nungshitna eikhoygi maayoknaba maramna, eikhoyna Cyprusgi marum marumda hollakle.
5 Amasung Ciliciaga Pamphyliagagi maangda leiba samudra laanthoktuna, eikhoyna Luciusgi murada thungle.
6 Mapham aduda laanmi chaammagi mapu aduna Itali taanna hongadouriba Alexandrgi hi amaa phangla duna, eikhoybu hi aduda tonghalle.
7 Aduga numit kuina eikhoyna tapna tapna hi hollaaktuna, Klidagi mamaangda waana thunglabada, nungshitna eikhoybu manglomda hen-gathandabagi maramna, Salmonigi mamaang Kritki marum marumda hollakle.
8 Amasung waana ethat adugi chaangjouda nakna nakna hollaaktuna, Laseya saahargi manaakta leiba phajaba hithangpham kouba karigumba mapham amada eikhoy thungle.
Paulna Miletusda thungba amasung akanba nong nungshit hi yeikhaayba
9 Amasung matam yaamna kuina changlabada, amasung chara henba matam adu chatkhraba maramna, hi khongchat adu houjik khudong thiraklabada,
10 Paulna makhoyda mitna shinghanduna haay, ebungngokhoi, hi khongchat asida puriba potki amasung higita shoyba amasung yaamna mangba nattana eikhoygi thawaaygisu oigani haayba eina ui.
11 Touegumsung chaammagi mapu aduna Paulna haayba waa adudagidi hinao shaaba amasung higi mapu adugi waa adudana henna pukning thingjillammi.
12 Aduga hithangpham adu ningthamtha lenba mapham chadaba maramna, karigumba pambeina Phinida youduna, mapham aduda ningthamtha lenba ngamlabdi, haayna mi ayaambana mapham adudagi samudrada shaandoknaba waa taanare; Phini haayba mapham adudi awaangnongpok amasung khanongpok onduna leiba Kritki hithangpham amani,
13 Aduga khagi nungshitna liri liri sitlakpa, makhoyna makhoygi apaamba adu thungle haayna ningduna, hi thaadoklaga, Kritki chaangjouda nakna nakna hollakle.
14 Adubu matam kharagi matungda Urakulo kouba akanba nungshit nongleina madudagi yeitharakle;
15 Aduga hi adubu pharaduna nungshit maayoknaba ngamdrabada, adumna thaadoktuna eikhoybu humdokhalle.
16 Amasung Kaoda kouba apikpa ethat amagi marumda chellaaktuna, eikhoyna waana hi machaa adu phajille;
17 Madu thaanggatlaga, makhoyna hi adu hibhamda laakshinduna chenhannaba pambei sijinnare; aduga makhoybu Surttida yeisinba yaai kiduna, makhoyba langyaanphina-chingba chingtharaga, asumna chathalle.
18 Amasung eikhoybu nong nungshitna thoidokna waahallabada, matunggi numit aduda makhoyna hidagi potchei hunthaba houre;
19 Aduga humni shubaa numit aduda makhoymakki makhutna higi mapot machei hundokle.
20 Amasung numit yaamna kuina eikhoygi ethakta numitnasu thawaanmi chaknasu nganbikhidrabada, amasung akanba nong nungshitna eikhoygi ethakta kupkhrabada, houjik eikhoy hinggani haaybagi asha pumnamak leikhidre.
21 Aduga chara henba kuiraklabada, matam aduda Paulna makhoygi mayaaida leptuna haay, he ebungngokhoi, nakhoyna eigi waa enbiduna, Krittagi hollamdrabadi, ashoyba amasung amaangba asi phanglamloidabani.
22 Adubu houjikti eina nakhoygi thawaay waadannaba thougatchari; maramdi hi nattana, nakhoygi narakta amata thawaay mangba leiroi.
23 Maramdi eina ebungngogi mi oiba, ebungngobasu eina thougan toujaba, Eeshor adugi dut amanaa ahing asida enaakta leptuna haay,
24 Kiganu, Paul; nang Caesargi maangda leppa taare; aduga yeng-u, nangga loynanaa hi tongminnariba pumnamakpu Eeshorna nangonda pibire.
25 Maram adugi damak, ebungngokhoi, thawaay waabiganu, maramdi eingonda haaybikhiba adugumna thokkani haayna eina Eeshorda thaajei.
26 Adubu eikhoy karigumba ethat amada taaba taare.
27 Touegumsung taraamarini shubaa ahing oirabada, Adriya samudrada eikhoybu humdok humjin touduna puringeida, ahing nongyaai aduwaaida hi honbashingna karigumba kangphal naksillakli haayna khallammi.
28 Maduda makhoyna eeshing tambada lam kun luba phangle; aduga khara chatlaga amuk haanna tambada makhoyna lam taraamanga luba phangle.
29 Aduga eikhoybu karigumba nungjaao maphamda taahanba yaai kiduna, makhoyna hirudagi longgor mari thadaraga, nongannaba haayjaduna leirammi.
30 Amasung hi honbashingna hinaodagi longgorshing puthokkadaba matagum hi machaa adu thadaduna hidagi chenthoknaba hotnaringeida,
31 Paulna laanmi chaammagi mapuda amasung lamnishingda haay, makhoy asina hinungda adum leitrabadi, nakhoybu kanbiba ngamloi.
32 Matam aduda laanmishing aduna hi machaa adugi thouri kakthatlaga, madu thaadokle.
33 Aduga nongallamdaaida Paulna makhoy pumnamakpu khara chaanaba haayjarammi. Mahaakna haay, ngasi numit taraamarini nakhoyna ngaaiduna karisu chadaduna chara hellakle. 34 Maram aduna khara chaanaba eina nakhoybu haayjari; maramdi asi nakhoygi thawaay kannanabagi damakni, maramdi nakhoy kanaagumbagi koktagi sham manaa amata maangloi.
35 Aduga mahaakna asi haayraga, tal louduna pumnamakki maangda Eeshorda thaagat-charaga, madu thugaayduna chaaba houre.
36 Maduda pumnamakna thawaay nungaairaduna makhoymaknasu chaare.
37 Amasung hinungda eikhoy pumnamakna mi 276 oirammi. 38 Aduga makhoyna chaaba oklabada, samudrada gehu adu hundok khiduna hi adu yaanghanba houre.
39 Amasung nonggallabada, makhoyna lam adu khangdre; adubu nungphou leiba karigumba eeshingna hanjinba amaa makhoyna ubaa phangle; maduda hi adu kalluba ngamgadra haayduna makhoyna waa taanarammi.
40 Aduga langgorshing adu hundoktuna samudrada thamlamle; matam adumaktada makhoyna hirugi nou punba adu thaadokle; aduga mamaanggi langyaanphi adu nungshitlomda thaanggattuna, nungphou taananaba makhoyna hotnarammi.
41 Touegumsung samudra ani oknaba maphamda tararabada, hi adu leingoida chensinkhre; aduga hinao adu yeisinkhiduna, lengba yadaduna leire, adubu hiru adu eethak kabana thugaayba hourammi.
42 Amasung phaadokshing kanaagumbana eroiduna naanthokkhiba yaai haayduna, makhoybu hatsi haayna laanmi shingna waa taanare.
43 Touegumsung Paulbu kanbiningduna, chaammagi mapu aduna makhoygi taanaramba adu khamle; aduga eroiba ngambashing aduna hidagi haanna chongthaaduna, kangphaanda thungsanu;
44 Amasung leihoubashing aduna, kanaa kanaagumbana upakta, aduga atei kharana higi kari karigumba potta laansanu haayduna yaathang pire. Amasung asum touduna pumnamak kangphaanda kanbiba phangjarare.