1 Peter 1
Peterna iba ahanba leirik
Khurumjaba
1 Jesus Christagi pakhon chatpa Peterna Pontada, Galatianda, Kappadokiyada, Asiada, amasung Bithyniada leiba ichai chaikhiba lamlankhibasing oiba, 2 Ipa Ishorgi hanna khangba matung inna, yathang innabagi damak amasung Jesus Christagi ee khikpinabagi damak, thawaina sengdokpibagi mapanna khan-gatpasingda: thoujal amasung ingthaba nakhoida yamkhatsanu.
Aran khubamgi asagi damak Ishorbu thagatchaba
3 Eikhoigi prabhu Jesus Christagi Ishorsu mapasu oiba adubu thagatchei. Ibungo mahakna yamna nungsiheibagi matung inna asibasinggi maraktagi Jesus Christabu hinggatpiba mapanna hingliba khourangna ningbagi damak, 4 Amasung mangdaba, amakpa leitaba, mutkhidaba, nakhoigi damak sargada khakpiraba phangpham thokpagidamak eikhoibu amuk hanna pokpire; 5 Ishorgi panggalna aroiba matamda phongnanaba thourang langlaba aran khubamgi damak thajabagi mapanna nakhoibu ngakpi senbire. 6 Asida houjik matam khara phaoba, kannaba oirabadi, makhal makha ayamba chang yengbada nakhoibu thawai wahallabasu, nakhoina yamna haraojei. 7 Meina phudonglabasu manggadaba sanadagi henna mamal luraba nakhoigi thajabagi asengba aduna Jesus Christabu phongdokpidaba, thagatpa, matik mangal amasung ikai khumnaba thoknanaba, nakhoibu chang yengbani.
8 Uhouba phangdaba Ibungobu nakhoina nungsi; houjik nakhoina Ibungobu udramaksu thajei, 9 Aduga nakhoigi thajabagi aromba, thawaigi aran khubam adu, phangbanina, nakhoina hainingai leitaba amasung matik mangalna thanba hiraobaga loinana yamna harao-i.
10 Aran khubam asigi maramda nakhoina phanggadaba thoujal adugi maramda Ishorgi wa takthokpasingna hanna takthoktuna, maram okna humduna thire. 11 Christana awa khanggadaba amasung asisinggi matungda matik mangal phanggadabi adu makhoigi nungda leiba Christagi thawaina hanna sakhi piduna taklamba adu kari karamba matamda oigadabano haiba makhoina thirammi. 12 Makhoina masa mathantagi damakta nattaduna, nakhoigi damak makhoina waramsing asi thougan tourammi haiba makhoida phongdokpire; houjik waramsing asi sargadagi thabirakpa thawai asengbana aphaba wapao sandokpasinggi mapanna nakhoida haidokpire; waramsing asi sargadutsingna thawai yaona yengsinningi.
Christian-gi lamchat
13 Maram adugi damak nakhoi nakhoigi pukninggi khwang laksinduna, pukning phajillu, aduga Jesus Christabu phongdokpibada nakhoida pubirakliba thoujal aduda nakhoigi khourangna ningba changkhonna thammu. 14 Haiba inba angangsinggumna, nakhoina ahanba khangdringeigi apaibagi sakpham loudaduna, 15 Nakhoibu koubiba Ibungo mahakna sengbagumna, nakhoi nasasu nachat natou pumnamakta asengba oiyu; 16 Maramdi masi asumna ikhre, nakhoi asengba oiyu, maramdi ei asengbani.
17 Amasung misak mimai yengdana mi khudinggi thabak matung inna wayelbiba Ibungo mahakpu nakhoina Ipa kourabadi, nakhoigi langpheigi matam adu kina lellu. 18 Maramdi lupa nattraga sana, manggadaba pot asina nattaduna, asoiba amasung amakpa leitaba yao machigumba Christagi mamal luraba ina, 19 Nakhoibu nakhoigi napa napusingdagi thangtharakpa aremba mipandagi handokpire haiba nakhoina khangi. 20 Christabu taibangpal houdringeida aoibamak hanna khangkhrabani; 21 Adubu asibasinggi maraktagi hinggatpiraba amasung Ibungoda matik mangal pirabi Ishorda Ibungogi mapanna thajaba nakhoigi maramgi damak matamgi aroibada Ibungobu phongdokpibani; aduna Ishorda nakhoigi thajaba amasung khourangna ningba leibani.
22 Nakhoina nachin nanaosingbu tousinnaba yaodaba nungsiba phaoba achumbada haiba inbana nakhoi nakhoigi thawai sengdokcharaga, thawai yaona pukningdagi nakhoi amaga amaga nungsi nou. 23 Maramdi mangba yaba marudagi nattana, mangba yadabadagi, hingba amasung lengdana leiba Ishorgi wa adugi mapanna nakhoibu amuk hanna pokpire. 24 Maramdi,
hakchang panba pumnamak napigumbani, amasung madugi matik mangal pumnamak adu napigi mapan gumbani. Napina khuikhi, amasung mapanna kenkhi;
25 Touigumsung Prabhugi waheidi lomba naidana leibani, Amasung nakhoida sandokkhiba aphaba wapao adu wahei asini.