Luke 24
Jesus-na hinggatpa
( Matthew 28.1-10; Mark 16.1-8; John 20.1-10 )
24 touegumsung chayon-gi ahaanba numitta ayuk nganna thouraang langkhraba manam nungsiba pot adu puraktuna mongpham taanna laakle. 2 Amasung mongphamdagi nung adu onthok-khiramba makhoyna phangle. 3 adugaa makhoyna changbada ebungngo Jesus-gi hakchaang adu phangde.
4 Amasung makhoyna adugi maramda laangtaknaringeida, asum thoklare, yeng-u, tagup tarengba phi setpa nupaa ani makhoygi manaakta hek leplare. 5 adugaa makhoyna kimankhraduna, leibaakta maru lukthabada, nupaa ani aduna makhoyda haay, asibagi marakta ahingbabu nakhoyna karigi thiribage? 6 ebungngodi asida leitre; touegumsung ebungngobu hinggatpi-khre. ebungngona Galileeda leiringeimakta nakhoyda haaykhiba adu ningsingu. 7 migi machaa nupaa adubu paap-chenba misinggi makhutta pithoktuna Crossta haatpa taay, amasung ebungngona numit humni subada hinggatpa taay, haaykhi. 8 maaduda makhoyna ebungngo-gi waa makhei adu ningsinglakle,
9 Amasung makhoyna mongphamdagi hallaaktuna maram pumnamak asi taraamaathoy adudasu atei pumnamaktasu tamle. 10 Makhoy adudi Magdalene Mary, Johna, amasung Jameski mamaa Mary oirammi; makhoyna loinabi nupi ateisingnasu maramsing asi paakhon-chatpasingda tamlammi. 11 Amasung waahei-sing asi makhoygi mityengda pangaang ngaangbagumba masak amaa oire; aduna makhoyna makhoybu thajaramde.
12 touegumsung Peter-na hougattuna mongpham taanna chenkhre, adugaa mahaakna nonthaaduna yengsinbada, leemon phi aduta ure; amasung thok-khiba thoudok aduda mathanta ngakladuna mayum taanna chatkhre.
Jesus-na Emmaus taanaba lambida unhanba
( Mark 16.12,13 )
13 Amasung yeng-u, numit adumakta makhoygi maraktagi mi ani Jerusalemdagi mile taretlom thappa Emmaus kouba khul amada chatlammi. 14 maaduda makhoyna thok-khiba pumnamak adugi maramda amaaga amaga ngaangna-rammi. 15 Amasung makhoyna ngangnaduna haangdok hangjin tounaringeida, asum thoklare, Jesus masaamak naksil-laktuna, makhoyga loynaba chatminnarammi. 16 touegumsung makhoyna ebungngobu khangdananaba makhoygi mamit seraannahanbirammi.
17 adugaa ebungngona makhoyda haay, nakhoyna chatna chatna amaaga amaga ngangnasanariba asi karino?
Maduda makhoyna awaaba sak oinaa chap leple. 18 Amasung makhoygi marakta Cleopas kouba amanaa ebungngo-da khumlak-e, numit sing asigi manungda Jerusalemda thokkhi thokkiba adu khangdana, nahaak nathanta maaduda lamlanbu oirubra?
19 Amasung ebungngona makhoyda haay, kari kari thok-khibage?
Aduga makhoyna ebungngo-da haay,
thabakta amasung waaheida Eesor-gi maangda amasung misinggi maangda engam ngamba waa taakthokpa Nazarethki Jesus-gi maramdani, 20 haaybadi, athoiba purohit sing amasung eikhoygi luchingba-singna karamna ebungngobu sibagi maranda pithoklage Crossta haatkhibage haaybasini. 21 touegumsung Israelbu handokpigadaba adu ebungngomakni haayna eikhoydi ninglammi. hoy, asi pumnamakki mathaktasu thabak makhei asi thok-khiba ngasina humni subani. 22 Amukkasu eikhoygi eraktagi nupi kharana mongphamda nganna chatluduna eikhoybu ngaakhalle; 23 Amasung makhoyna ebungngo-gi hakchaang phangdrabada, ebungngodi hingi haayba swarga-dut singbu makhoyna manggum urak-e haayna haayrei. 24 Amasung eikhoyga loynaba kana kanaagumbana mongphamda chatluduna, nupising aduna haayraba adugumna phangle, adubu makhoyna ebungngobudi ude.
25 maaduda ebungngona makhoyda haay, he apangba amasung Eesor-gi waa taakthokpa singna haaykhiba pumnamak thaajabada pukning thinba misa! 26 Christa aduna awaaba asi khanglaga, ebungngo-gi matik mangaanda changba taadabra? 27 adugaa Moses dagi amasung Eesor-gi waa taakthokpa pumnamaktagi houduna ebungngo masaagi maramda saas-tra pumnamakta leiba adu ebungngona makhoyda handokpire.
28 Amasung makhoyna chatkadaba khul adu naksil-lakpada, ebungngona amuk chatkhatkadabagum toure. 29 aduna makhoyna ebungngobu kanna haayjare, eikhoyga loynanaa leibiyu, maramdi numidaang-waai oire adugaa numit yaamna thengkhre. maaduda ebungngona makhoyga leiminnanaba lengsil-le.
30 Amasung ebungngona makhoyga loynanaa channaba phamthaarabada asum thoklare, ebungngona tandum adu louraduna bor pibire, adugaa maadu thugaayduna makhoyda pire, 31 Amasung makhoygi mamit paangthokhalle, adugaa makhoyna ebungngobu khanglakle; maaduda ebungngona makhoydagi mangkhre. 32 Amasung makhoyna amaaga amaga haaynei, ebungngona lambida eikhoyga ngaangnabada adugaa eikhoyda saas-tragi waa handokpiringeida eikhoygi thammoi chaklamdra?
33 adudagi makhoyna pungja adummaktada hougattuna, Jerusalemda hal-lakle, amasung taraamaathoy adugaa makhoyga loynaba singgana pullap tinnaduna, 34 aoibamk Eesor-bu hinggatpi-khre amasung Simon-da uhalle, haaynaramba makhoyna phangle. 35 maaduda lambida thok-khiba, amasung tandum thugaaybada makhoyna ebungngobu karamna khnglakpa adu makhoyna lirammi.
Sebok-singda Jesus-na masaabu uhanba
( Matthew 28.16-20; Mark 16.14-18; John 20.19-23; Acts 1.6-8 )
36 Amasung makhoyna waaram asi ngangnaringeida, ebungngo masaamakna makhoygi mayaaida leptuna makhoyda haay, nakhoyda tapthaba oisanu. 37 touegumsung makhoyna thukkhattuna kibana thawaay amaa ure ninglammi.
38 Amasung ebungngona makhoyda haay, nakhoyna karigi laangtaknaribano, adugaa nakhoygi pukningda kari maramna chinanba thoklibano? 39 eigi khut amasung khong yeng-u, eimakni, eibu soktuna yeng-u; maramdi eigi lutong leiba nakhoyna ubagumna thawaaygidi leite.
40 maaduda ebungngona asi haayraga, makhut amasung makhong makhoyda uhalle. 41 adugaa makhoyna haraaobana thajadringeida amasung ngaklingeida ebungngona makhoyda haay, asida nakhoygi karigumba achaapot leibra? 42 maaduda makhoyna ebungngo-da arouba nga machet amaa (amasung khoihi khoira ama) pire. 43 adugaa ebungngona maadu louraga makhoygi mamaangda chaare.
44 Amasung ebungngona makhoyda haay, eina nakhoyga leiminnaringeida, eina nakhoyga ngangnakhiba waasing adu asini, haaybadi, eigi maramda Mosesgi waayel yaathangda, Eesor-gi waa taakthokpa singgi amasung eseigi laairikta ekhiba pumnamak adu thunghanba taay.
45 Matam aduda makhoyna saas-tra khngba yaana-naba ebungngona makhoygi pukning haangdokpire;
46 adugaa ebungngona makhoyda haay,
Christa aduna awaaba khangba, amasung numit hummi subada asiba-singgi maraktagi hinggatpa oigadabani; 47 adugaa Jerusalemdagi houduna jaat pumnamakta ebungngo-gi mingda pukning hongba amasung paap kokpiba adubu saandok-kadabani, haayna asum ekhrabani. 48 nakhoydi pumnamak asigi sakhini. 49 Amasung yeng-u, eigi epaana waaleppa adu eina nakhoyda thaarakanni; adubu mathaklomdagi nakhoybu pangganna phigum enbidriba phaaoba saharda nakhoy leirammu.
Swargada lengkhatkhiba
( Mark 16.19,20; Acts 1.9-11)
50 Amasung ebungngona makhoybu Bethany manaak phaaoba lamjingbiraklaga, ebungngo-gi khut thaanggattuna makhoybu bor pibire. 51 Amasung ebungngona makhoybu bor pibiringeida asum thoklare, ebungngona makhoydagi khaaynaduna, swargada, ebungngobu pukhatpikhre. 52 maaduda makhoyna ebungngobu khurumjaraga, yaamna haraaona Jerusalemda hal-lakle. 53 Amasung makhoyna Eesor ningna sangda eetat-tattana Eesor-bu thaagattuna leirammi. AMEN