Acts 8
Christiansingbu ot-neiba amasung chaikhaiba
8 Aduga mahakpu hatpa asida Saulna makhoiga yamirmarammi. Amasung numit aduda Jerusalemda leiba singlup adugi mathakta yamna ot-neiba thokle; maducla pakhonchatpasing nattana, makhoi pumnamak Judea amasung Samariagi lam lamda ichai chaithoknare. 2 Aduga lainingchetpa nipasingna Stephenbu phumlamduna, mahakki damak yamna tengthanare. 3 Touigumsung Saulna yum yumda changduna, nipa nupisingbu chinglaklaga keisumshangda pithokpa aduna singlup adubu otkhairami.
Philipna Samariada chatpa
4 Maram aduna chaithokkhibasing aduna aphaba wapao sandok sandoktuna koichat chatle. 5 Aduga Philipna Samariagi saharda kumthakhiduna makhoida Christabu sandokle. 6 Amasung miyamsingna Philipki wa tabada amasung mahakna touba khuclamsing adu ubada, amata oina mahakna hairiba wa aduda pukning changle. 7 Maramdi sengdaba thawaising changba ayambadagi thawaising aduna khonjel wangna laoduna chongthokle; aduga nakal namma sithaba ayambabu amasung khong tekpasingbu phahanbire. 8 Maduda sahar aduda yamna haraoba thokle.
Angakpa mahei sijinnaba Simon-gi wari
9 Touigumsung sahar aduda mamangngeida angakpa mahei sijinnaramba, maming Simon kouba, kanagumba nipa ama leirammi, aduga mahakna masa mathantabu kanagumba achouba amani haiduna Samariasingbu ngakhallami. 10 Mangonda makhoi apikpadagi achouba phaoba pumnamakna pukning thingjinduna hai, mi asi achouba kouba Ishorgi pangngal aduni.
11 Amasung mahakna mahakki angakpa mahei aduna makhoibu matam kuina ngakhallamba maramna makhoina mangonda pukning thingjillammi. 12 Touigumsung Philipna Ishorgi leibak amasung Jesus Christagi minggi maramda aphaba wapao sandokpa adu makhoina thajarabada, inakhoi nipasu nupisu baptist lourammi. 13 Maduda Simon masanasu thajaraduna, baptist louraga Philipka itattattana loinarammi, aduga khudamsing amasung achouba toungamdaba thabaksing thokkhiba adu uduna mahakna ngakllammi.
Peterga John-gana Samariada chatpa
14 Amahiksung Samariana Ishorgi wa loure haiba Jerusalemda leiba pakhonchatpasingna tarabada, makhoina Peter amasung Johnbu makhoida thabire. 15 Makhoi anina kumtharaklabada, makhoina thawai asengba phangnanaba makhoigi damak haijabire. 16 Maramdi thawai asengbana makhoi kana amagi thakta tabiramdri, adubu prabhu Jesusgi mingda makhoibu baptist toubibatani. 17 Matam aduda makhoigi mathakta makhoina makhut thambirammi, amasung makhoina thawai asengbabu phangjarammi.
18 Aduga pakhonchatpasinggi khut thambibada, thawai asengbabu pibire haiba Simonna urabada, mahakna makhoida shen katladuna hai, 19 Eina kanagumba amagi thakta ikhut thamlaga, mahakna thawai asengbabu phangnanaba, matik asi eingondasu pibiyu.
20 Touigumsung Peterna hai, nanggi lupa nangga mangminnasanu, maramdi Ishorgi khudonbu senna leiba yai haina nangna ningle. 21 Thabak asida nanggi saruk nattraga tamba nongdam kari amatta leite, maramdi nanggi pukchel Ishorgi mangda chumde. 22 Maram aduna nanggi phattaba asidagi pukning hongu, aduga yagadaba oirabadi, nanggi pukninggi ningba adu nahakpu kokpinanaba prabhuda nonjou. 23 Maramdi nangdi nasingkha phattabada amasung dharma nattabagi apunbada lei haiba eina ui.
24 Maduda Simonna khumlak-i, nakhoina hoina haikhiba adu amata ithakta tadananaba, eigi damak nakhoina prabhuda nonjabiyu.
25 Asum touna makhoina prabhugi wa adu ningthina sakhi piduna hairamlaga, Samariasinggi khun ayambada aphaba wapao sandok sandoktuna Jerusalemda hallak-i.
Philip amasung Ethiopiagi masa onba mi ama
26 Touigumsung prabhugi dutna, Philipta hairak-i, hougatlo, aduga Jerusalemdagi Gaza tanna kumthaba lambi aduda makharomda chatlu; madu lamhangni.
27 Maduda mahakna hougattuna chatle. Aduga yengu, Ethiopiagi masa onba nipa, Ethiopiasinggi rani Kandakigi lal pumnamakki mathakta pannariba, matik chaoba aduna Jerusalemda Ishorbu khurumjananaba chatlui; 28 Aduga mahakna hallakpada mahakki kang manungda phamduna Ishorgi wa takthokpagi lairik Isaiah adu paduna leirammi.
29 Amasung thawai aduna Philipta hai, manakta chattuna kang asiga loinou. 30 Maduda Philipna mangonda chensinkhiduna Mahakna Ishorgi wa takthokpagi Lairik Isaiah adu pariba taraduna hai, nahakna pariba adu khangbra?
31 Aduga mahakna hai, kanagumbana eibu takpidrabadi, eina karamna ngamgadage? Adudagi mahakna Philippu, kakhattuna eihakka phamminnabiyu, haijare.
32 Amasung mahakna paramliba sastragi mapham adu asini:
Yaobu hatnanaba chingbagum Ibungobu chingle, aduga yao machana magi matu kakpagi khongdabagum, adugumduna Ibungona ya kakhatte.
33 Ibungona nollukpa aduda Ibungogi wayel louthokkhre. Ibungogi miron kanana phongdokkadage? Maramdi Ibungogi thawai prithibidagi puthokkhibani.
34 Aduga masa onba nipa aduna Philipta khumlak-i, eina nahakpu haijari, Ishorgi wa takthokpana masi kanagi maramda hairibano? Masagi maramda haijabra, nattraga kanagumba atoppagi maramda haibra? 35 Maduda Philipna maya kakhattuna, sastra asidagi houna mangonda Jesusbu sandokle.
36 Amasung makhoina lambida asum chatlakpada karigumba ishing manakta thunglare, aduga masa onba nipa aduna hai, yengbiyu, ishing lei! Eibu baptist toubibada kari apanba leibage? 37 Aduda Philipna hai, nahakna nahakki thammoi pumnamak yaona thajarabadi yai. Maduda mahakna khumlak-i, Ishorgi macha nipa adu Jesus Christani haiba eina thajei. 38 Adudagi mahakna kang khamnaba yathang pire, aduga Philipsu masa onba nipasu makhoi anina ishing aduda kumthaduna, mahakna mahakpu baptist toubire.
39 Aduga makhoina ishing adudagi kakhatlaklage, prabhugi thawaina Philippu puthokkhi, amasung masa onba nipa aduna mahakpu amuk hanna ukhidre, maramdi mahak harao haraona chatkhirammi
40 Touigumsung Philippu Asadodda phanglare, aduga mahakna Caesareada thungladriba phaona sahar pumnamakta chattuna aphaba wapao sandoklak-i.