Acts 6
Pakhonchatpa mi taret khan-gatpa
1 Amasung numit shing asigi manungda sebokshinggi mashing hen-gatpada, Greek lol louba Jewish-shingna Hebrewshinggi mathakta murum murum shonba houre, maramdi makhoygi lukhraabishingbu numit khudinggi mateng pang-bibada thouoibiramde.
2 Maduda taraanithoi aduna sebok mayaambu kouraduna haay, pijapithakki thougan changnabagi damak eikhoyna Eeshorgi waa thaadokpham thokte.
3 Maram aduna, he echin-enaaosha, mingchat aphaba, thawaay ashengbaga loushinggana thanba nupaa taret nakhoygi naraktagi thibiyu; thabak asigi mathakta eikhoyna makhoybu thamgani.
4 Touegumsung eikhoynadi haayjabada amasung waa adugi thouganda etat-tattana pukning changjagani.
5 Maduda waa asina miyaam apumbabu pelhalle, aduga makhoyna thaajabaga thawaay ashengbagana thanba nupaa Stephen kouba, Philip, Prakhor, Nikanor, Timon, Parmina, amasung Antiyokki Jewish dharma louba Nikalai, makhoy asibu khan-gattuna,
6 Paakhon-chatpashinggi mamaangda lephalle; amasung makhoyna haayjarabada, makhoygi mathakta khut thambire.
7 Aduga Eeshorgi waapaao chaaokhatlammi, Jerusalemda sebokshinggi mashing yaamna yaamkhatlammi, amasung purohit shing mayaam yaamna thaajaba aduba ellammi.
Stephenbu Hotchillaaktuna Phaaba
8 Amasung Stephenna thoujaal amasung paanggalna thalladuna, mishinggi marakta achouba angakpasu khudamsu tourammi.
9 Touegumsung Libertine kouba loisanggi, Cyreneshinggi, Alexandrshinggi mi kharana Ciliciadagi amasung Asiadagi mi kharagana hougattuna, Stephen-ga waa marei yetnei.
10 Amasung mahaakna loushing amasung thawaayna ngaangliba adugi maangda makhoyna leppa ngamlamde.
11 Maduda makhoyna nupaa kharabu haayhalle, mahaakna Mosesgi amasung Eeshorgi mathakta usittaba waa ngaangba eikhoyna taare.
12 Aduga makhoyna mishingbu, ahallaman shingbu amasung shaastragi ojaashingbu thoudongle, amasung maangonda hotchillaklaga, mahaakpu pharaduna, ahallup taanna pusille;
13 Amasung, mi asina ashengba mapham asigi amasung waayel yaathang adugi mathakta ngaangba tokte;
14 Maramdi Nazarethki Jesus asina mapham asi maanghan-duna, Mosesna eikhoyda pithoklaba hounabi adu hongdokkani haayna mahaakna haayba eikhoyna taare, haayba minamba saakhishingbu makhoyna lepkhathalle.
15 Aduga ahallupta phamliba pumnamakna maangonda sangtrik shaangna yengbada, mahaakki mamaay adu swargadutki maigumna ure.