Romans 15
15 Amahiksung akanba eikhoina ithantagi nungainaba toudaduna, kandabasinggi asonba adu pubigadabani. 2 Eikhoi mi khudingmakna magi magi keiroi leikaibu phananaba amasung semgatnaba touduna pelhansi. 3 Maramdi Christanasu Ibungo mathantabu pelhande; Touigumsung ikhiba asigumbani, Ibungo mahakpu paothokpasinggi paothoklaba wa adu ithakta tare. 4 Maramdi sastradagi thokpa khangheiba amasung insinbibagi mapanna eikhoina tarang tarang khangna ningba phangnanaba, mamangngeida ikhi ikhiba adu eikhoigi tamnanabagidamak ikhibani.
5 Pukning amata oina nakhoina chin amana eikhoigi prabhu Jesus Christagi Ishorsu mapasu oiba adubu thagatnaba, 6 Christa Jesusgi matung inna amaga amaga mannaba pukning adubu khangheibagi amasung insinbibagi Ishorna nakhoida pibisanu.
7 Maram asina Christansu nakhoibu lousinbibagunma, Ishorgi matik mangalgi damak nakhoi amana amabu lousinnou. 8 Maramdi eina haribani, ipa ipusingda waleppasing adu chetnanaba, amasung atoppa jatsingna Ibungo mahakki nungsibibagi maramna Ishorbu thagatnanaba, 9 Ishorgi achumba adugi damak Christabu unkakpagi thougan touba mi oihalle; ikhiba asigumbani,
Maram aduna eina atoppa jatsinggi marakta Ibungo nahakpu thagatchagani, amasung Ibungo nahakki mingbu sakchagani.
10 Aduga amuk mahakna hai, atoppa jatsa, nakhoina Ibungo mahakki, mishingga loinana hatiominnou.
11 Aduga amuk, atoppa jat pumnamaksa, prabhubu thagatlu, amasung jat pumnamakna Ibungo mahakpu thagatsanu.
12 Aduga amukka Isaiahna hai, Isaiahgi mara leigani amasung atoppa jatsinggi mathakta mapu oinaba ama phaorakkani, Ibungo aduda atoppa jatsingna tarang tarang khangna ninggani.
13 Thawai asengbagi panggalna nakhoigi tarang tarang khangna ningba hengatnanaba, tarang tarang khangna ningbagi Ishorna nakhoigi thajabada haraoba amasung ingthaba pumnamakna nakhoibu thalhanbisanu.
Paulna thouna phana iba
14 Amahiksung, he eigi ichin inaosa, nakhoi nasamak aphabana thalle, mahei pumnamak phangle amasung amana amabu waraknabasu ngamle haiba ei isamaknasu nakhoigi maramda thajare. 15 Touigumsung atoppa jatsingda ei Christa Jesusgi thougan touba mi oijagadabani haiba Ishorna eingonda pinabiraba thoujal adugi maramna, nakhoibu amuk ningsinghannabagum eina nakhoida maram khara kharada henna thouna phana ijei. 16 Thawai asengbana sengdokpikhraba atoppa jatsingbu katchaba adu yabiba oiraknanaba, eina purohitkum Ishorgi aphaba wapao adugi thogan toujari.
17 Maram aduna Ishorgi mari oiba thabakta eina Christa Jesusda eigi chaothokchaba phangjei. 18 Maramdi wahei amasung thabakna, khudamsing amasung angak angakpagi panggalda, thawai asengbagi panggalda atoppa jatsinggi haiba inbagi damak Christana eigi ipanna toukhi toukhiba adu nattana, eina kari amata ngangba thouna pharoi. 19 Asum touna Jerusalemdagi, amasung ikoi koina Illurikam phaoba eina Christagi aphaba wapao isu suna sandokchare; 20 Hoi, asumna eina mi atoppa amagi yumpham mathakta sagattananaba, Christagi ming ikhang khangdriba mapham aduga aphaba wapao sandoknaba eigi wakhalgi tendam oijare; 21 Ikhiba asigumbani,
Ibungogi maramda pao ithung thungdriba makhoina ujagani, amasung ita tadriba makhoina khanglakkani.
Paul masagi khujil thourang
22 Adugi marmnasu nakhoida lakkadabagi matam ayambada eibu khambani. 23 Touigumsung houjikti maikei asida amuk mapham phangdrabana, aduga chahi yamna kuinadagi nakhoida yamna lakninglibana, 24 Karigumba matamda eina Spenda chatpada (Maramdi eigi langphei khongchatta eina nakhoibu unagani aduga ahanbada eina nakhoigi kanglupka khara nungngaiminnaraga, nakhoina adomda eibu lambida thindokpigani haina ningjei)
25 Touigumsung houjikti eina asengbasinggi thougan tounaba Jerusalem tanna chatkadouri. 26 Maramdi Jerusalemda leiba asengbasinggi marakta lairabasinggi damak karigumba khara katchabana Macedonia amasung Akhaiyagi penjaba oire. 27 Hoi, makhoigi penjaba oire; aduga makhoidi makhoida laman tonbani. Maramdi atoppa jatsingna makhoigi thawaigi oiba pot phangminnaba oirabadi, hakchanggi oiba pottasu makhoina makhoida thougan tounaba laman tonba oire. 28 Maram aduna eina thabak asi loiduna, makhoida mahei asi sengna pithoklamlaga, eina nakhoidagi Spen tanna chatkani. 29 Amasung eina nakhoida lakpa matamda Christagi athanba borga loinana eina lakchagani haiba khangjei.
30 Amahiksung, ichin inaosa, Judeada leiba haiba indabasingdagi einu kanbinanaba, amasung Jerusalemgi damak eina toujaba thougan adu asengbasingna yabinanaba, 31 Eigidamak Ishorgi maphamda nakhoi eiga loinana yamna kanna haijaminnanaba, eikhoi prabhu Jesus Christagi mapanna, amasung thawai asenbagi nungsibana eina nakhoida nijari; 32 Aduna eina Ishorgi ningba matung inna nakhoida haraona lakchaduna, nakhoiga loinana pothajaba phangminnanabani. 33 Houjikti ingthabagi Ishorna nakhoi pumnamakka loinabisanu. Amen.