Exodus 8
Hangoi Thok-hanba
1 Eeshorna Mosesda haayrammi, "Pharaohgi manaakta chatlaga maasi haayyu: Eeshorna asumna taakpiri madudi eigi mishingdu Eibu khurumjanaba thaadok-u.
2 Karigumba nahaakna makhoybu thaadoktaba thoklabadi, nahaakki nareibaaksi thungna hangoi thok-handuna khongthaapham leihalloi.
3 Nile turendasu hangoi ngaakta thok-han-gani. Hangoishingsina nahaakki konungda, tumpham kada, phamung mathakta nahaakki nanaaishinggi mayumshingda, nahaakki leibaaksida leiriba mishinggi mayumda, leirang amadi kolliknachingba pumnamakki mathakta kahan-gani.
4 Hangoishingsina nahaakki amadi nahaakki mishinggi mathaktasu kakhaathan-gani."
5 Matamsida Eeshorna Mosesda haayrammi, "Aaronda haaygadabani: cheidu pairaga turelshingda amadi loukhong aduga pukhrida leiriba eeshingdu phuraga kangphaanda kakhatlu." 6 Asumna aronna makhut tingthoktuna Egyptta leiriba eeshingduda cheina phurammi. Khudak adumaktada hangoi mashing laakngamdana Egypt leibaaktu shinba thungkhi.
7 Jadu heibashingnasu mahei shijinnaduna makhoyna toubagumna Egypt leibaak shinba thungna hangoi thok-hankhi.
8 Masigi matungda Pharaohna Moses amadi aronbu kouraga haayrammi, "eigi amadi eigi mishinggi maangda leiriba hangoishingsi manghankhinaba Eeshorda haayjabiyu. Adu oirabadi eina nakhoygi mishingsi Eeshorbu khurumjanaba yaathang pinabigani."
9 Mosesna Pharaohda haayrammi, "nahaakkidamak, nanaaishinggi amadi leibaakkidamak eina haayjagadouba matam amaa lepthokpiyu. Eina haayjaba matamda nakhoygi nayumda hangoi amaa phaaoba leihalloi. Adubu Niledadi leihankhiba taay."
10 Pharaohna haayrammi, "hayengmak toubiyu." maasida Mosesna haayrammi, ningthouna ningbiribadumak thok-hanjagani. Eikhoygi Eeshorga chaaoba mannaba laai atei amaa leite haaybasidangdi khangbiyu.
11 Hangoishingsi nahaakki konung amadi nanaaishing amadi miyaamgi yumdagi loina manghanjagani. Adubu Niledadi leigani."
12 Maasi haaynaraga Moses amadi aron Pharaohgi maphamdagi hankhi. Pharaohga yaanakhiba matung ennaa Mosesna hangoishingdu mangkhinaba Eeshorda haayjarammi.
13 Mosesna haayjaba matung ennaa Eeshorna hangoishingdu manghanbikhi. Yumda, sumangda, Loubukta leiramba hangoishingdu loina sihallammi.
14 Egyptta leiriba mishingduna hangoishingdu mapei mapei peirammi. Maramsina leibaak shinba thungna namthi hanamba thokkhi.
15 Pharaohna khara saphare haaybadu ubada pukning hongninglamde. Eeshorna maangjounana haaykhibaguna makhoyna haayjaba waadu Pharaohna manadasu haplamde.
Haying thok-hanba
16 Matamsida Eeshorna Mosesda haayrammi, "Aaronda haayyu: Nahaakna paairiba cheidu leimaayda leiriba uphullakta thaaduna Egypt leibaak shinba thungna leinanaba haying thokhallu. 17 Masimak makhoyna toukhi. aronna cheidu paayduna makhut tingthoklammi aduga leimaayda leiriba uphullakta phurammi. Masina maram oiduna mi amadi shaashinggi mathakta haying tongba hourammi. Leimaayda leiramba uphulshingdu haying onduna Egypt leibaak thungna leikhi.
18 Jadu toubashingna haying thok-han-ge laaklanarammi adubu makhoyna haying thok-hanba ngamkhide. Maramsina mi amadi shaashinggi mathakta haying yaamna tonglammi.
19 Jadu heibashingna pharaohda haayrammi, "masidi Eeshor makna touribani. Maasi khangbadi phei. Maasi haaydunasu Pharaohgi pukning hongba leiramde. Eeshorna haanna haaykhiba gumna makhoyna haayjarabasu mahaakna tabiba leiramde.
Haying khongyaambi thok-hanba
20 Maasi ubada Eeshorna Mosesda haayrammi, "Pharaohna ayuk turenda kumlakpa matamda mahaakka unnaba laambelda ngaaiduna leiyu. Maangonda haayyu: Eeshorna asumna taakpiri madudi Eibu khurumjanaba eigi mishingdu thaadokpikho.
21 Karigumba nahaakna eigi mishingsi thaadoktaba thoklabadi nahaakki amadi nanaaishinggi aduga miyaamgi mathakta, nakhoygi emungda aduga Egyptta leiriba mishinggi mayumda amadi nahaakna lepliba maphamsida mashing laakngamdaba haying khongyaambi shanggu shanggu thaaraktuna leihan-gani.
22 Adugumba numittuda eigi mishingna leiriba Gosen kouba lamduda haying amatta leihalloi. Matamduda nahaakna Eisi ashengba Eeshor maalemsida amatta ngaibaduni haayba khangba ngamgani.
23 Matou asumna eigi mishing amadi nahaakki mishing tongaan taahan-gani. Masimak hayeng thokkani."
24 Eeshorna haayribasimak oihankhi. Pharaohgi konung, manaaishinggi amadi miyaamgi yum khudingda haying mashing laakngamdana leikhi. Maramsina Egyptta leibaakta haying yaamna leimanbadagi leibaak maangle haayna laaonakhi.
25 Matamduda Pharaohna Moses amadi aronbu kouraduna haayrak-e, "phare, leibaaksigi manungda nakhoyna apaamba maphamda chatlaga Eeshorbu khurumjou."
26 Mosesna haayrammi, "ningthouna haayribadu enba yaaroi. Maramdi eikhoygi Eeshorgi maphamda thou katchaba matamda Egypta leiriba mishingna khangba ngamloidouba pot yaaori. Egyptta leiriba mishingna yaaningdaba pottu eikhoyna thougi potlum oinaa makhoygi mamaangda paangthokpa matamda makhoyna eikhoybu nungna tharoidra?
27 Eikhoygi Eeshorna pibiba yaathang matung ennaa numit humnigi laambel lamhaangda chattuna eikhoyna thoudu thougadabani."
28 Maramsina Pharaohna haayrammi, "karigumba nakhoyna yaamna thaapna chatloi haayrabadi, nakhoygi Eeshorda thou toujarunaba lamhaangda chathalgani. Eigidamaksu haayjabiyu."
29 Mosesna haayrammi, "eina nahaakki naphamdagi yaamna thaapna chattuna Eeshorgi maphamda hayenggi numitta Pharaoh, manaaishing, mahaakki mishinggi mathakta Laaichat oinaa taariba hayingshingsi mangkhinaba haayjagadouribani. Eeshorgi khuyaada thou oinaa tourunaba thouraangduna leijariba mishingsida Pharaohna minambadi toubiganu."
30 Waasi haayramlaga Mosesna Pharaohgi maphamdagi hankhiduna Eeshorgi khuyaakhaada changjaraduna haayjarammi,
31 Mosesna haayjaba matung ennaa Eeshorna Pharaoh, manaaishing amadi mahaakki mishinggi mathakta taariba hayingshingdu manghankhi. Laaichat oinaa thok-hankhiba hayingshingdu amaa phaaoba phangkhide.
32 Adubu houjik phaaoba Pharaoh mapukning hongbadi leiramde. Maramsina mahaakna mishingdubu thaadokkhide.