Revelation 12
Nupi amasung chinglaaigi maramda uhanbiba
12 Amasung achouba khudam amaa swargada ure; nupi amanaa numitna phi gum elle, adugaa thaana makhong khaada, amasung thawaan-michak taraanithoigi luhupna makok thakta leirammi; 2 adugaa mahaakti mironbini, amasung mahaakna chabokpa chingnaduna pok-kadabagi naduna lao-khongi:
3 Amasung atei khudam amaa swargada ure: adugaa yeng-u, makok taret machi taraa paanba amasung makok taret adugi mathakta ningthou luhup uppa acouba angaangba chinglai ama. 4 Amasung maagi mameina atiyagi thawaan-michaksinggi saruk ahumgi saruk amabu chinisinduna prithibida hunthare. adugaa nupi aduna machaa poklaga, chinglai aduna machaa adubu chaathoknanaba, machaa pokkadourabi adugi maangda leppi.
5 Amasung mahaakna machaa nupaa amaa pokle; machaa nupaa aduna jaat pumnamakpu jotki cheina ngaksenbigani, adugaa machaa asibu Eesor-gi maphamda amasung ebungngo mahaakki phambaalda pak pukhatkhre. 6 Amasung nupi aduna lamjaaoda chenkhre. Mapham aduda makhoyna mahaakpu numit 1,260 yokthakpinanaba, Eesor-na laangbiraba mahaakki mapham lei.
7 Amasung swargada laal oirakle; Mikhayelga mahaakki dutsinggana chinglai adugaa soknanaba thoklaktuna, chinglaiga maagi dutsinggana laal soknare; 8 adubu makhoyna ngamsu ngamdre, swargada makhoygi mapham amuk henna phangsu phangdre. 9 Amasung chinglai achouba, lil hanuba, diyaabol amasung seitaan kouraba, taaibang-paal apumbabu minamba mapu adubu, hunthare; maabu prithibida hunthare, adugaa maagi dutsingbu maaga loynanaa hunthare. 10 adugaa swargada awaangba khonjen amanaa asi haayba eina taare,
houjikti eikhoygi Eesor-gi kanbiba, paanggal amasung leibaak adu, adugaa ebungngo mahaakki Christagi matik adu laakle; maramdi eikhoygi echin-enaaosingbu theijinba mapu, ahing nungthil eikhoygi Eesor-gi maangda theijinba adubu hunthakhre.
11 Amasung makhoyna maabu yaao machaa adugi maramna amasung makhoygi, sakhigi waa adugi maramna ngamle, adugaa makhoyna makhoygi thawaaybu siba phaaoba pam-ude.
12 maram aduna, he swarga amasung masigi manungda paallibasa, haraaojaro: Prithibigi amasung samudragi damakti awaabanida, maramdi diyaabol aduna maagi matam khajikta lei haayba khaangduna, yaamna mei houna saoduna nakhoy taanna chatthakhre.
13 Amasung chinglai aduna maabu prithibida hunthakhre haayba khanglabada, machaa nupaa pokpi nupi adubu otneire. 14 adugaa nupi aduna lamjaaoda mahaakki mapham, matam amagi, matam anigi amasung matam tangkhaygi damak lil adugi maangdagi mahaakpu yokthakpiba mapham adu taanna painanaba, maangonda achouba egal uchek adugi masa ani pibire.
15 maaduda lil aduna nupi adubu eesing eechaaona puhankhinanaba, nupi adugi matungda turel-gumna eesing maagi machindagi kamthokle. 16 adubu prithibina nupi adubu pang-bire, amasung prithibina machin kakhattuna, chinglai aduna machindagi kamthokpa turenda adu yotsinkhre. 17 adugaa chinglai aduna nupi aduda saaoraduna mahaakki dhaara leihouriba, Eesor-gi, yaathang makhei ngaakpa amasung Jesus-gi saakhi chetna paayba makhoy adugaa laan soknanaba chat-thokle. adugaa madi samudragi leingoi mathakta leple.